អ្នកនាំពាក្យ ៖ មេធាវីក្រសួងព័ត៌មាន ផ្ដល់ជំនួយផ្នែកច្បាប់ដល់អ្នកសារព័ត៌មានប្រមាណ ៤០ករណីហើយ  

មន្ត្រីជាន់ខ្ពស់ក្រសួងព័ត៌មាន បានឲ្យដឹងថា មេធាវីក្រសួងព័ត៌មាន បានផ្ដល់ជំនួយផ្នែកច្បាប់ដល់អ្នកសារព័ត៌មានចំនួន ៣០ ទៅ ៤០ករណីហើយ ពាក់ព័ន្ធនឹងវិវាទផ្នែកវិជ្ជាជីវៈ។

នៅក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងព័ត៌មាន” នាព្រឹកថ្ងៃទី ១ ខែកញ្ញានេះ លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានឲ្យដឹងថា ចាប់តាំងពីបង្កើតឲ្យមាន ក្រុមមេធាវីក្រសួងព័ត៌មានមក គឺបានផ្ដល់ជំនួយផ្នែកច្បាប់ដល់អ្នកសារព័ត៌មានចំនួន ៣០ ទៅ ៤០ករណីហើយ។

ក្នុងចំណោមករណីទាំងនោះ បានសម្របសម្រួលក្រៅប្រព័ន្ធតុលាការពី ៨០ ទៅ ៩០ភាគរយ ហើយករណីខ្លះឡើងដល់តុលាការនោះ គឺក្រសួងព័ត៌មាន ផ្ដល់មេធាវីការពារក្ដី តែមកដល់ពេលនេះមានចំនួនតិចតួចប៉ុណ្ណោះ។ លោក មាស សុភ័ណ្ឌ បានបញ្ជាក់ថា ការផ្ដល់ជំនួយផ្នែកច្បាប់ដល់អ្នកសារព័ត៌មាន គឺផ្ដោតទៅលើតែវិវាទផ្នែកវិជ្ជាជីវៈប៉ុណ្ណោះ ដោយមិនផ្ដល់ជំនួយផ្នែកច្បាប់សម្រាប់វិវាទបុគ្គលឡើយ។

សូមជម្រាបថា បន្ទាប់ពីទទួលអនុសាសន៍ពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅឆ្នាំ ២០១៩មក គឺក្រសួងព័ត៌មាន បានបង្កើតក្រុមមេធាវីក្រសួងព័ត៌មាន ដោយសហការជាមួយក្រុមមេធាវីស្ម័គ្រចិត្តសម្ដេច​តេជោ ក្នុងការផ្ដល់ជំនួយផ្នែកផ្លូវច្បាប់ជូនដល់អ្នកប្រកបវិជ្ជាជីវៈសារព័ត៌មាន ក៏ដូចជាអង្គភាពសារព័ត៌មាន នៅពេលដែលមានវិវាទផ្នែកវិជ្ជាជីវៈកើតឡើង ដោយពុំគិតថ្លៃ៕

អត្ថបទ៖ ឃួន សុភ័ក្រ