សម្ដេចតេជោ អញ្ជើញអគ្គលេខាធិការ UN មកភ្នំពេញ ដើម្បីចូលរួមកិច្ចប្រជុំកំពូលអាស៊ាន-អង្គការសហប្រជាជាតិ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២ បានអញ្ជើញលោក Antonio Guterres អគ្គលេខាធិការអង្គការសហប្រជាជាតិ (UN) ចូលរួមកិច្ចប្រជុំកំពូលអាស៊ាន-អង្គការសហប្រជាជាតិ ដែលគ្រោងនឹងធ្វើឡើងនៅរាជធានីភ្នំពេញ នាខែវិច្ឆិកាខាងមុខនេះ។  

ការអញ្ជើញនេះ គ្រាដែលសម្ដេចតេជោ ហ៊ុន សែន បានទទួលជួបពិភាក្សាការងារជាមួយលោក Antonio Guterres អគ្គលេខាធិការអង្គការសហប្រជាជាតិ នៅថ្ងៃទី ២២ ខែកញ្ញា ឆ្នាំ ២០២២ នៅទីក្រុងញូវយ៉ក សហរដ្ឋអាមេរិក។

នៅក្នុងជំនួបនេះ លោកអគ្គលេខាធិការ អង្គការសហប្រជាជាតិ បានស្វាគមន៍សម្ដេចតេជោនាយករដ្ឋមន្ត្រី ហើយលោកបានគូសបញ្ជាក់ថា លោក និងសម្ដេចបានជួបគ្នាចុងក្រោយ នៅទីក្រុងប៉េកាំងប្រទេ​សចិន កាលពីប៉ុន្មានឆ្នាំមុន។ លោក Antonio Guterres បានបង្ហាញក្ដីរីករាយ ជាមួយនឹងកិច្ចសហការជាមួយ រាជរដ្ឋាភិបាលកម្ពុជា។ លោកបានបញ្ជាក់ ថា កន្លងមកយើង ក៏បានគាំទ្រទាំងស្រុងជាមួយនឹងក្រុមការងារ អង្គការសហប្រជាជាតិ ដែលមានមូលដ្ឋាននៅកម្ពុជានោះ ជាពិសេសចំពោះការអនុវត្តរបៀបវារៈអភិវឌ្ឍន៍ឆ្នាំ ២០៣០ នៃអង្គការសហប្រជាជាតិ។

លោកអគ្គលេខាធិការ មានប្រសាសន៍បន្តថា យើងនឹងបង្កើនសាមគ្គីភាពជាមួយបណ្ដាប្រទេស ដែលបានប៉ះពាល់ដោយវិបត្តិទាំងឡាយ រួមទាំងជំងឺកូវីដ-១៩ ផងដែរ។ លោកក៏បានគូសបញ្ជាក់អំពីស្ថានភាព សង្គ្រាមនៅអ៊ុយក្រែន និងអតិផរណាបណ្ដាលមកពីសង្គ្រាមនោះ ដែលបង្កើតនូវការលំបាកជាច្រើនសម្រាប់ប្រជាជននៅទូទាំងពិភពលោក។

លោកបន្ថែមថា អង្គការសហប្រជាជាតិ គឺឈរលើស្មារតីសាមគ្គីភាពជាមួយប្រទេសកំពុងអភិវឌ្ឍន៍និយាយជារួម និងនិយាយដោយឡែកចំពោះប្រទេសកម្ពុជា។ យើងនឹងខិតខំជំរុញការកែទម្រង់នៃហិរញ្ញប្បទានអន្តរជាតិផងដែរ។

ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណចំពោលោកអគ្គលេខាធិការអង្គការសហប្រជាជាតិ ដែលបានឆ្លៀតឱកាសទទួលជួបសម្ដេចនាពេលនេះ។ សម្ដេចតេជោ ក៏បានអរគុណចំពោះអ្វីដែល លោកបានលើកឡើង ជាពិសេសចំពោះបញ្ហាសង្គ្រាមនៅអ៊ុយក្រែន។ សម្ដេចតេជោក៏បានគូសបញ្ជាក់ថា «ឯកឧត្តមមានក្រុមការងាររបស់ឯកឧត្តមដ៏ល្អប្រចាំនៅប្រទេសកម្ពុជា»។

សម្ដេចតេជោ ក៏បានមានប្រសាសន៍អំពីជំនួយវ៉ាក់សាំងកូវីដ-១៩ របស់អង្គការសហប្រជាជាតិ តាមរយៈក្របខ័ណ្ឌកូវ៉ាក់ ដែលជួយដល់ប្រទេសកម្ពុជាផងដែរ ហើយដែលរហូតមកដល់ពេលនេះ កម្ពុជាបានចាក់វ៉ាក់សាំងជូនដល់ប្រជាពលរដ្ឋ បានប្រមាណជា ៩៥%ហើយ នៃចំនួនប្រជាជនសរុប ហើយមួយចំនួននៃប្រជាជន ក៏បានទទួលវ៉ាក់សាំងដូសជំរុញទី ៥រួចទៅហើយ ហើយគិតត្រឹមថ្ងៃទី ២២ កញ្ញានេះ មានអ្នកឆ្លងត្រឹមតែ ៣នាក់តែប៉ុណ្ណោះ។

នៅក្នុងជំនួបនេះដែរ សម្ដេចតេជោនាយករដ្ឋមន្ត្រី បានលើកឡើងពាក់ព័ន្ធទៅនឹងក្របខណ្ឌអាស៊ាន ដោយសម្ដេចបានអញ្ជើញ លោកអគ្គលេខាធិការអង្គការសហប្រជាជាតិ ចូលរួមកិច្ចប្រជុំកំពូលអាស៊ាន-អង្គការសហប្រជាជាតិ ដែលគ្រោងនឹងធ្វើឡើងនៅរាជធានីភ្នំពេញ នាខែវិច្ឆិកា ២០២២ខាងមុខនេះ។ សម្តេចតេជោ បានមានប្រសាសន៍ថា ឆ្នាំនេះ កម្ពុជានឹងរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធផ្សេងទៀត ដែលនឹងមានវត្តមានប្រធានាធិបតី និងនាយករដ្ឋមន្ត្រី ពីបណ្ដាប្រទេសជាដៃគូសន្ទនារបស់អាស៊ាន។

ជាការឆ្លើយតប លោក Antonio Guterres អគ្គលេខាធិការអង្គការសហប្រជាជាតិ បានមានប្រសាសន៍ថា ពាក់ព័ន្ធទៅនឹងបញ្ហាកិច្ចប្រជុំអាស៊ានខាងមុខនេះ លោកនឹងពិចារណានៃការចូលរួមក្នុងកិច្ចប្រជុំនាពេលខាងមុខនេះ ពីព្រោះកន្លងទៅនេះ លោកក៏ធ្លាប់មកប្រទេសកម្ពុជាផងដែរ តែក្នុងនាមជាអ្នកទេសចរណ៍។ ដូច្នេះ លោកពិតជាចង់ត្រឡប់មកប្រទេសកម្ពុជាសារជាថ្មី ជាពិសេសលោកនឹងជំរុញកិច្ចសហប្រតិបត្តិការរវាងអង្គការសហប្រជាជាតិ និងអាស៊ាន៕

អត្ថបទ៖ ឃួន សុភ័ក្រ