លោក គង់ សោភ័ណ្ឌ តែងតាំងមន្ត្រីសាធារណការខេត្តកណ្ដាលចំនួន៦រូប ក្នុងនោះមានអនុប្រធានមន្ទីរចំនួន២រូប

នៅរសៀលថ្ងៃទី២៣ ខែកញ្ញា ឆ្នាំ២០២២នេះ លោក គង់ សោភ័ណ្ឌ អភិបាលនៃគណៈអភិបាលខេត្តកណ្ដាល បានប្រកាសតែងតាំង និងផ្ទេរភារកិច្ចជូនមន្ត្រីរាជការនៃមន្ទីរសាធារណការ និងដឹកជញ្ជូនខេត្តកណ្ដាល ចំនួន ៦រូប។  ក្នុងនោះ តែងតាំងជាអនុប្រធានមន្ទីរចំនួន ២រូប និងប្រធាន អនុប្រធានការិយាល័យ/អង្គភាព ចំនួន ៤រូប។

បើតាមលិខិតរបស់លោក គង់ សោភ័ណ្ឌ ត្រូវបានសម្រេចតែងតាំងលោក ប៉ែត សារ៉ាត់ និងលោក ចេង ឃីម ជាអនុប្រធានមន្ទីរសាធារណការ និងដឹកជញ្ជូន ខេត្តកណ្ដាល និងផ្ទេរភារកិច្ចមន្ត្រីចំនួន ៤រូបផ្សេងទៀត រួមមាន ៖១. លោក ឌួង វណ្ណៈ ជាប្រធានការិយាល័យដឹកជញ្ជូនផ្លូវទឹក និងកំពង់ផែ ២. លោក ជា ឆេកូ ជាអនុប្រធានការិយាល័យបច្ចេក ទេស ៣. អ៊ុច សំនាង ជាអនុប្រធានសេវាដ្ឋានផ្ដល់ប័ណ្ណបើកបរយានយន្ត ៤. លោកស្រី ហ៊ុន អន ជាអនុប្រធានអង្គភាពចុះបញ្ជី និងផ្ដល់ប័ណ្ណបើកបរយានយន្ត។

ឆ្លៀតក្នុងឱកាសនោះ លោក គង់ សោភ័ណ្ឌ ក្នុងនាមអភិបាលខេត្តកណ្ដាល ណែនាំដល់មន្ត្រីដែលទើបត្រូវបានតែងតាំងថ្មីនៃក្របខណ្ឌមន្ទីរសាធារណការ និងដឹកជញ្ជូន ខេត្តកណ្ដាល នាពេលនេះ ត្រូវខិតខំបំពេញការងារ និងភារកិច្ចរបស់ខ្លួនឲ្យអស់ពីកម្លាំងកាយចិត្ត ក៏ដូចជាត្រូវបម្រើសេវាជូនពលរដ្ឋឲ្យបានទាន់ពេលវេលា និងមានប្រសិទ្ធភាពខ្ពស់។

ជាមួយគ្នានេះ លោកអភិបាលខេត្តកណ្ដាល ក៏បានជំរុញដល់មន្ទីរសាធារណការ និងដឹកជញ្ជូន ខេត្តកណ្តាល ត្រូវបន្តខិតខំជួសជុលផ្លូវ ចុះមើលផ្លូវឲ្យបានគ្រប់ទីកន្លែង និងត្រូវត្រួតពិនិត្យករណីឡានដឹកលើសទម្ងន់កំណត់ទាំងឡាយ ដោយត្រូវធ្វើការផាកពិន័យ ហើយអនុវត្តទៅតាមច្បាប់អោយបានម៉ឺងម៉ាត់បំផុត មិនមានការលើកលែងនោះឡើយ៕

ដោយ៖ ធឿន វ៉ាន់សុង