ព្រះសង្ឃ គណៈកម្មការវត្តភ្នំជ័យគិរី និងអាជ្ញាធរស្រុកកំពង់សៀម រៀបចំការប្រណាំងទូកងក្នុងថ្ងៃបុណ្យភ្ជុំបិណ្ឌ

ដើម្បីចូលរួមអបអរសាទរថ្ងៃបុណ្យភ្ជុំបិណ្ឌ ព្រះសង្ឃ គណៈកម្មការវត្ត រួមទាំងអាជ្ញាធរស្រុកកំពង់សៀម នៅថ្ងៃទី ២៥​ ខែកញ្ញា ឆ្នាំ ២០២២ បានរៀបចំការប្រណាំងទូកងជាលក្ខណៈប្រពៃណី ក្នុងគោលបំណងអភិរក្សទូកងជាទំនៀមទំលាប់ខ្មែរ ផង និងដើម្បីបង្កបរិយាកាសសប្បាយរីករាយជូនដល់ប្រជាពលរដ្ឋ ផងដែរ។  

ព្រះធម្មានុលក្ខណ៍ សេង ម៉េងលក្ខណ័ ព្រះលេខាធិការគណៈខេត្ដកំពង់ចាម និងជាព្រះប្រធានលេខាធិការដ្ឋាន នៃសាលាគណៈខេត្ដកំពង់ចាម និងជាព្រះគ្រូសូត្រស្តាំ ក្នុងវត្តភ្នំជ័យគិរី ឬវត្តភ្នំហាន់ជ័យ មានថេរដីកាថា ឆ្នាំនេះមានប្រជាពុទ្ធិបរិស័ទច្រើន ចាប់ពីកាន់បិណ្ឌវេនទី ១មក ហើយបើចំថ្ងៃឈប់សម្រាកវិញ គឺមានពុទ្ធិបរិស័ទមកធ្វើបុណ្យទាន និងមកដើរលេងកម្សាន្តយ៉ាងច្រើននៅទីនេះ។  

ក្រោយពីខកខានការប្រណាំងទូកង រយៈពេល ១ឆ្នាំមកហើយ ដោយសារកម្ពុជាជួបវិបត្តិកូវីដ-១៩ ផងនោះ ទើបឆ្នាំនេះ ព្រះសង្ឃ គណៈកម្មការវត្ត រួមទាំងអាជ្ញាធរ បានរៀបចំប្រកាសរកទូកង តាមបណ្តាវត្ត នៅតាមដងទន្លេមេគង្គបានចំនួន ១០ទូក ស្មើនឹង ៥គូ។

ទន្ទឹមនឹងនេះដែរ ព្រះអង្គ ម៉េងលក្ខណ៍ ក៏បានបន្ថែមថា ការប្រណាំងទូកងនេះ ក្នុងគោលបំណងបង្កើតភាពសប្បាយរីករាយ ក្នុងឱកាសពិធីភ្ជុំបិណ្ឌនេះផង និងបង្ហាញពីការអភិរក្សទូកងជាទំនៀមទំលាប់ខ្មែរ ផង។

សូមជម្រាបថា នៅខេត្តកំពង់ចាម មានរមណីយដ្ឋានជាច្រើនកន្លែង កំពុងត្រៀមទទួលភ្ញៀវទេសចរក្នុងរដូវភ្ជុំបិណ្ឌនេះ។ ជាក់ស្ដែង នៅរមណីយដ្ឋានប្រាសាទនគរបាជ័យ, រមណីយដ្ឋាន ភ្នំប្រុស-ភ្នំស្រី , រមណីយដ្ឋានទឹកឆា, រមណីយដ្ឋានភ្នំហាន់ជ័យ, និងតំបន់ទេសចរណ៍ជាច្រើនទៀត៕  

អត្ថបទ៖ ឡេក ចាន់ពេជ្រ