ព័ត៌មានជាតិ

កយកា បញ្ជូនអ្នកស្ម័គ្រចិត្តជាង ៨០០ នាក់ មកជួយអភិវឌ្ឍន៍ប្រទេសកម្ពុជា

បានផុស

៧ ខែ មុន

នៅ

ថ្ងៃអង្គារ ១១ តុលា ២០២២

ដោយ

ចាប់តាំងពីឆ្នាំ ២០០៣ រហូតមកដល់ខែតុលា ឆ្នាំ ២០២២ នេះ ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំនៅកម្ពុជា បានបញ្ជូនអ្នកស្ម័គ្រចិត្តចំនួន ៨០២ នាក់ មកជួយអភិវឌ្ឍន៍ប្រទេសកម្ពុជា លើជំនាញផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្ដីប្រកាសព័ត៌មានរបស់ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំនៅកម្ពុជា ចុះថ្ងៃទី ១០ តុលា បានឲ្យដឹងថា ក្នុងចំណោមអ្នកស្ម័គ្រចិត្ត ៨០២ នាក់ បច្ចុប្បន្ននេះ មានអ្នកស្ម័គ្រចិត្តកយកា-KOICA ចំនួន ៣៤ រូប កំពុងបំពេញការងារស្ម័គ្រចិត្តរបស់ខ្លួនតាមបណ្ដាខេត្ត និងរាជធានីមួយចំនួន ដែលមានដូចជា ខេត្តបន្ទាយមានជ័យ បាត់ដំបង សៀមរាប ពោធិ៍សាត់ កំពង់ចាម កំពង់ឆ្នាំង កណ្ដាល តាកែវ ព្រៃវែង កំពត និងរាជធានីភ្នំពេញ លើជំនាញអប់រំភាសាកូរ៉េ អភិវឌ្ឍន៍យុវជន អប់រំកុំព្យូទ័រ គិលានុបដ្ឋាយិកា អប់រំកុមារតូច និងអប់រំតន្ត្រី។ ចែករំលែកនូវបទពិសោធន៍ ចំណេះដឹង និងជំនាញ ដើម្បីធ្វើឲ្យប្រសើរឡើងការរស់នៅ និងជីវភាពរបស់ប្រជាជន និងដើម្បីរឹតចំណងមិត្តភាពរវាងប្រទេសទាំងពីរ។

ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំនៅកម្ពុជា បានរៀបចំការប្រជុំអ្នកស្ម័គ្រចិត្តប្រចាំឆ្នាំ ២០២២ របស់ខ្លួន ដែលមានរយៈពេលបីថ្ងៃ គឺចាប់ពីថ្ងៃទី ៥ ដល់ ៧ ខែតុលា ឆ្នាំ ២០២២ នៅសណ្ឋាគារភ្នំពេញ បន្ទាប់ពីការបញ្ជូនអ្នកស្ម័គ្រចិត្តសាជាថ្មី កាលពីខែធ្នូ ឆ្នាំ ២០២១ កន្លងទៅ ក្រោមអធិបតីភាពរបស់ លោក Rho Hyun-jun នាយកប្រចាំប្រទេស លោក Kim Kwang Wook នាយករង បុគ្គលិក និងអ្នកស្ម័គ្រចិត្តកយកា-KOICA ប្រមាណជា ៤៥ នាក់។

កិច្ចប្រជុំនេះមានគោលបំណងផ្ដល់នូវវគ្គបណ្ដុះបណ្ដាលមួយចំនួនដែលមានដូចជា ការគ្រប់គ្រងគម្រោង ពង្រឹងសមត្ថភាពភាសាខ្មែរ និងវាយតម្លៃអំពីសកម្មភាពការងាររបស់អ្នកស្ម័គ្រចិត្តដែលបាន និងកំពុងតែបំពេញការងារតាមស្ថាប័នដៃគូនីមួយៗ។ អ្នកស្ម័គ្រចិត្ដមានឱកាសនៅក្នុងការចែករំលែកនូវសមិទ្ធផលដែលសម្រេចបានរបស់ខ្លួន បន្ទាប់ពីការបញ្ជូនទៅធ្វើការតាមស្ថាប័ន។ បន្ថែមលើនេះទៅទៀត កម្មវិធីនេះ មានគោលបំណងពង្រឹងទំនាក់ទំនងរវាងអ្នកស្ម័គ្រចិត្ត និងអ្នកស្ម័គ្រចិត្ត ការិយាល័យ ក៏ដូចជាជាមួយនឹងអ្នកស្ម័គ្រចិត្តមកពីស្ថាប័នផ្សេងផងដែរ។

នៅក្នុងកម្មវិធីនេះ អ្នកស្ម័គ្រចិត្ត ក៏បានចែករំលែកនូវបទពិសោធន៍ល្អៗដែលខ្លួនបាន និងកំពុងអនុវត្តតាមស្ថាប័ននីមួយៗ ហើយវាក៏ជាផ្នែកមួយដែលអ្នកស្ម័គ្រចិត្តផ្សេងទៀតអាចយកទៅអនុវត្ត និងរៀនសូត្រតាមនាពេលអនាគតផងដែរ៕

អត្ថបទ ៖ សំអឿន