ក្រុមប្រឹក្សាខណ្ឌទួលគោក​ស្នើឲ្យអាជ្ញាធរ​ពង្រឹងសន្តិសុខតាមផ្លូវសហព័ន្ធរុស្ស៊ី​ ខណៈកម្ពុជាត្រៀម​ធ្វើម្ចាស់​ផ្ទះ​ប្រជុំកំពូលអាស៊ាន

ប្រធានក្រុមប្រឹក្សាខណ្ឌទួលគោកលោក ម៉ែន សិរីបានស្នើឲ្យរដ្ឋបាលខណ្ឌទួលគោកពង្រឹងសន្តិសុខ សណ្តាប់​ធ្នាប់​សាធារណៈនៅតាមដងផ្លូវពិសេសនៅតាមបណ្តោយផ្លូវសហព័ន្ធរុស្ស៊ី ខណៈប្រទេសកម្ពុជាត្រូវធ្វើជាផ្ទះក្នុងកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធឆ្នាំ២០២២នេះ។

ការស្នើបែបនេះគឺបានធ្វើឡើងក្នុងកិច្ចប្រជុំសាមញ្ញលើកទី៤១ របស់ក្រុមប្រឹក្សាខណ្ឌទួលគោកនៅសាលាខណ្ឌទួលគោកថ្ងៃទី ២៨ ខែតុលា ឆ្នាំ ២០២២ ក្រោមវត្តមានលោក ម៉ែន សិរី ប្រធានក្រុមប្រឹក្សាខណ្ឌទួលគោក និងលោកកែវ សុភាអភិបាលរងខណ្ឌទួលគោក។

លោក ម៉ែន សិរី មានប្រសាសន៍៖ នៅប៉ុន្មានថ្ងៃខាងមុខនេះ ប្រទេសកម្ពុជានឹងត្រូវធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធឆ្នាំ២០២២។ ដូច្នេះ! លោកស្នើឲ្យមន្ត្រីរបស់ខណ្ឌ សង្កាត់ និងកម្លាំងមានសមត្ថកិច្ច ត្រូវពង្រឹងសន្តិសុខ សណ្តាប់ធ្នាប់សាធារណៈនៅតាមដងផ្លូវឲ្យបានល្អប្រសើរ ពិសេសនៅលើបណ្តោយផ្លូវសហព័ន្ធរុស្ស៊ី ដែលជាផ្លូវ ប្រតិភូឆ្លងកាត់៕

អត្ថបទ៖ ស្រីរ័ត្ន