អ្នកនាំពាក្យកិច្ចប្រជុំអាស៊ាន ៖ កិច្ចព្រមព្រៀងឯកច្ឆន្ទ ៥ចំណុច នៅតែជាគោលការណ៍គ្រឹះនៃការដោះស្រាយបញ្ហាមីយ៉ាន់ម៉ា

អ្នកនាំពាក្យកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ បានលើកឡើងថា កិច្ចព្រមព្រៀងឯកច្ឆន្ទ ៥ចំណុច នៅតែជាគោលការណ៍គ្រឹះ នៃការដោះស្រាយបញ្ហាមីយ៉ាន់ម៉ា ដែលអាចអនុញ្ញាតឲ្យប្រទេសសមា​ជិកជួយសម្របសម្រួល ដើម្បីរៀបចំឲ្យមានកិច្ចសន្ទនា ក៏ដូចជាផ្សះផ្សាររវាងភាគីជម្លោះ។

លោក គង់​ ភោគ រដ្ឋលេខាធិការក្រសួងការបរទេសកម្ពុជា និងជាអ្នកនាំពាក្យកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ បានថ្លែងក្នុងសន្និសីទសារព័ត៌មាន នៅរសៀលថ្ងៃទី ១០​ ខែវិច្ឆិកានេះថា បញ្ហារបស់មីយ៉ាន់ម៉ា គឺជាបញ្ហាស្មុគស្មាញ ហើយលំបាកដោយត្រូវការពេលវេលា ដើម្បីដោះស្រាយ។

លោកថា «ដូច្នេះនៅពេលដែលយើងមើលទៅលើស្ថានភាព ដែលកំពុងតែកើតមានឡើងនៅក្នុងមីយ៉ាន់ម៉ា យើងមានគោលបំណងមួយថា ចង់ឲ្យចេញលទ្ធផលលឿនតាមដែលអាចធ្វើទៅបាន។ ប៉ុន្តែអ្វីដែលយើងត្រូវគិតគូរផងដែរថា ដោយសារតែភាពស្មុគស្មាញទាំងអស់នេះហើយ អាស៊ានក៏ត្រូវមើលលើបញ្ហានេះ ក្នុងរយៈពេលវែងដូចគ្នាដែរ»។

លោក គង់​ ភោគ មានប្រសាសន៍បន្តថា កិច្ចព្រមព្រៀងឯកច្ឆន្ទ ៥ចំណុច នៅតែជាគោលគ្រឹះនៃការដោះស្រាយបញ្ហារបស់ប្រទេសមីយ៉ាន់ម៉ា។ អ្នកនាំពាក្យកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ បានបញ្ជាក់បន្ថែមថា «អ្វីដែលខ្ញុំអាចលើកឡើងនៅក្នុងពេលនេះ គឺថា កិច្ចព្រមព្រៀងឯកច្ឆន្ទ ៥ចំណុច នៅតែជាគោលគ្រឹះនៃការដោះស្រាយបញ្ហានៃ មីយ៉ាន់ម៉ា ដែលអាចអនុញ្ញាតឲ្យប្រទេសសមាជិកជួយសម្របសម្រួល ដើម្បីរៀបចំឲ្យមានកិច្ចសន្ទនា ក៏ដូចជាផ្សះផ្សាររវាងភាគីជម្លោះ»។

បើតាមលោក គង់ ភោគ អ្វីដែលសមាជិកអាស៊ាន គិតគូរទៅមុខទៀតនោះ គឺថាតើអាស៊ាន នឹងអាចមានវិធីសាស្រ្ដអ្វីបន្ថែមដើម្បីធានាថា នៅពេលដែលអនុវត្តកិច្ចព្រមព្រៀងឯកច្ឆន្ទ ៥ចំណុចនោះ នឹងមានគោលដៅច្បាស់លាស់ និងមានសកម្មភាពមួយប្រាកដប្រជា ដើម្បីងាយស្រួលឲ្យភាគីពាក់ព័ន្ធវាយតម្លៃទៅលើអ្វីដែលអាស៊ាន បានជួយដល់មីយ៉ាន់ម៉ា។

លោក គង់ ភោគ ដដែល បានបញ្ជាក់ទៀតថា នៅក្នុងរបៀបវារៈរបស់ក្រុមប្រឹក្សាសម្របសម្រួលអាស៊ាន នៅព្រឹកថ្ងៃទី ១០ ខែវិច្ឆិកានេះ គឺរដ្ឋមន្ត្រីការបរទេសអាស៊ាន បានពិភាក្សាអំពីបញ្ហាតំបន់ និងអន្តរជាតិ។ ដូច្នេះបញ្ហាមីយ៉ាន់ម៉ា គឺជាផ្នែកមួយនៃការពិភាក្សាហើយ។ លោកថា «រដ្ឋមន្ត្រីការបរទេស គឺមានតួនាទីក្នុងការជជែកវែកញែក ដើម្បីដាក់ចេញនូវគំនិតមួយចំនួន សម្រាប់ជាការពិចារណា ក៏ដូចជាការសម្រេចចិត្តរបស់ថ្នាក់ដឹកនាំកំពូលអាស៊ាន»៕

អត្ថបទ៖ ឃួន សុភ័ក្រ