មន្ទីរអប់រំខេត្តកំពង់ចាមត្រៀមមណ្ឌលប្រឡងចំនួន ១៤ រួចរាល់ហើយ

មន្ទីរអប់រំ យុវជន និងកីឡា ខេត្តកំពង់ចាមបានរៀបចំជ្រេីសរេីសមណ្ឌលប្រឡងចំនួន ១៤ មណ្ឌល សម្រាប់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ២០២១-២០២២ រួចរាល់ហើយ។

លោក លី ម៉េង សាន ប្រធានមន្ទីរអប់រំ យុវជន និងកីឡា ខេត្តកំពង់ចាមបានឲ្យដឹងថា ក្នុងសម័យប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២២នេះ ខាងមន្ទីរបានរៀបចំជ្រេីសរេីសមណ្ឌលប្រឡងចំនួន ១៤ មណ្ឌល ក្នុងនោះបែង​ចែកជា២ផ្នែក៖ ផ្នែកវិទ្យាសាស្ត្រសង្គម ៩មណ្ឌល និងផ្នែកវិទ្យាសាស្ត្រ ៥ មណ្ឌលដោយមានបេក្ខជនសរុបទូរទាំងខេត្តដែលបានដាក់ពាក្យប្រឡងមានចំនួន ៨ ៤០៤នាក់។

លោកប្រធានមន្ទីរបានបញ្ជាក់ទៀតថា ឆ្នាំនេះ បេីតាមការគ្រោងទុកនោះខាងមន្ទីរបានជ្រេីសរេីសយកមណ្ឌលក្នុងស្រុកកំពង់សៀម ២មណ្ឌល មានអនុវិទ្យាល័យ អង្គរ និងវិទ្យាល័យ សម្តេចជួន ណាត ហេីយជ្រេីសយកមណ្ឌលស្រុកជេីងព្រៃ មាន៖ វិទ្យាល័យ ហ៊ុនសែន ស្គន់ និងបឋមសិក្សា ហ៊ុន សែន ស្គន់ និងដោយឡែក៩មណ្ឌលទៀត ស្ថិតក្នុងក្រុងកំពង់ចាមទាំងអស់។

សូមបញ្ជាក់ជូនថា ក្រសួងអប់រំ យុវជន និងកីឡានឹងរៀបចំការប្រឡងសញ្ញាបត្រមធ្យមសិក្សាទុតិយភូមិ ដែលនឹងប្រព្រឹត្ដិទៅរយៈពេល២ថ្ងៃគឺថ្ងៃទី០៥-០៦ខែធ្នូ ឆ្នាំ២០២២ខាងមុខនេះ៕

អត្ថបទ៖ ឡេក ចាន់ពេជ្រ