សម្ដេចតេជោ ហ៊ុន សែន ព្រមានចាត់វិធានការតាមច្បាប់ ចំពោះគណបក្សដែលវាយប្រហារមកលើគណបក្សប្រជាជន

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា​ និងជានាយករដ្ឋមន្ត្រី បានព្រមានចាត់វិធានការតាមច្បាប់ចំពោះគណបក្សនយោបាយខ្លះ ដែលបានបើកការវាយប្រហារមកលើគណបក្សប្រជាជនកម្ពុជា ហើយចាប់ពីពេលនេះតទៅ ត្រូវបញ្ចប់នូវវប្បធម៌ឡាំប៉ាក្រោយការបោះឆ្នោត។

នៅក្នុងពិធីបើកការដ្ឋានសាងសង់ពង្រីក និងលើកកម្រិតគុណភាពកំណាត់ផ្លូវជាតិលេខ ៧ នាព្រឹកថ្ងៃទី ៩ ខែមករានេះ សម្ដេចតេជោ ហ៊ុន សែន បានផ្ញើសារទៅកាន់គណបក្សនយោបាយខ្លះ ដែលបានបើកការវាយប្រហារមកលើគណបក្សប្រជាជនកម្ពុជា។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «ទោះបីអ្នកមិននិយាយដាក់ក្បាលមេក្រូក៏ដោយ តែអ្នកកុំភ្លេចថា នៅក្នុងគ្រប់អង្គប្រជុំរបស់អ្នក គឺមានមនុស្សរបស់គណបក្ស​ប្រជាជន ដែលគេមិនពេញចិត្តចំពោះពួកអ្នក បានបញ្ជូនមក ខ្ញុំចង់សួរអ្នកថា តើអ្នកចង់ប្រែក្លាយខ្លួនទៅជាសត្រូវរបស់គណបក្សប្រជាជនឬក៏យ៉ាងណា»។

សម្ដេចតេជោ ហ៊ុន សែន ផ្ដាំទៅគណបក្សនយោបាយមួយនោះថា បើគណបក្សរបស់ខ្លួន ចង់ឈ្នះឆ្នោត គឺគួរតែឃោសនាអំពីគោលនយោបាយរបស់ខ្លួនទៅ ហេតុអ្វីចាំបាច់វាយប្រហារមកលើគណបក្សប្រជាជនកម្ពុជា?

សម្ដេចតេជោ ហ៊ុន សែន បានបន្ថែមថា «អ្នកលក់ទំនិញរបស់អ្នក អួតទំនិញរបស់អ្នកទៅ ចាំបាច់មកវាយប្រហារគណបក្សប្រជាជន ខ្ញុំសូមដាស់តឿនអ្នក បើសិនជាអ្នកបន្តយើងខ្ញុំនឹងប្រើសិទ្ធិការពារខ្លួន ក្នុងករណីចាំបាច់ តាមរយៈផ្លូវច្បាប់ ខ្ញុំគ្រាន់តែព្រមាន និងដាស់តឿនអ្នក ឲ្យអ្នកបានយល់»។

ជាមួយគ្នានេះ សម្ដេចតេជោ ហ៊ុន សែន បានបញ្ជាក់ថា ចាប់ពីពេលនេះទៅ ត្រូវបានបញ្ចប់នូវវប្បធម៌ឡាំប៉ាក្រោយការបោះឆ្នោត ហើយគណបក្សប្រជាជនកម្ពុជា មិនអាចទទួលយកបានទេនូវពាក្យថា ជាចោរលួចសន្លឹកឆ្នោត។

សម្ដេចតេជោ ហ៊ុន សែន បានថ្លែងបន្ថែយ៉ាងដូច្នេះថា «ពួកខ្ញុំនេះ មិនទុកពួកអ្នកចោទថា ជាចោរមួយជីវិតទេ ខ្ញុំសូមជម្រាបជូន ត្រូវតែបញ្ចប់វប្បធម៌ឡាំប៉ាក្រោយការបោះឆ្នោត គណបក្សប្រជាជន មិនអាចទទួលយកនូវពាក្យថា ជាចោរបន្លំសន្លឹកឆ្នោតទេ អ្នកណាហ៊ាននិយាយបែបនេះ យើងត្រូវតែប្ដឹង ហើយសំណុំរឿងនៅតុលាការកំពូល យើងត្រូវតែធ្វើ»៕

អត្ថបទ៖ ឃួន សុភ័ក្រ​