មកដឹងជំនួញដំបូងរបស់អ្នកឧកញ៉ា សុខ គង់ ​មុនក្លាយជាមហាសេដ្ឋី

ស្តាប់ការរៀបរាប់របស់អ្នកឧកញ៉ា សុខ គង់ ពីមួយដំណាក់កាលទៅមួយដំណាក់កាល ហាក់មានការតស៊ូ និងជួបទុក្ខវេទនាជាខ្លាំង ទម្រាំក្លាយជាមហាសេដ្ឋីមានប្រាក់វាល់លានដូចសព្វថ្ងៃនេះ។

ជាមួយនឹងភាពជោគជ័យ និងមុខជំនួញធំៗជាច្រើននាពេលបច្ចុប្បន្ន សាធារណជនប្រហែលជាចង់ដឹងហើយថា តើមុខជំនួញដំបូងរបស់អ្នកឧកញ៉ា សុខ គង់ គឺជាអ្វី? និងចាប់ផ្តើមដោយរបៀបណា?

អ្នកឧកញ៉ា សុខ គង់ បច្ចុប្បន្នមានវ័យជិត ៧០ឆ្នាំ គឺជាកូនអ្នកនេសាទ និងរកស៊ីជួញដូរផលនេសាទ តាមដង​ទន្លេមេគង្គ ក្នុងខេត្តព្រៃវែង។ ក្រោយថ្ងៃ ៧មករា ឆ្នាំ ១៩៧៩ ភ្លើងសង្គ្រាមបានលុតផុតទៅ គ្រួសារអ្នកឧកញ៉ា សុខ គង់ បានផ្លាស់ទីលំនៅពីខេត្តព្រៃវែង មករស់នៅ ច្បារអំពៅ រាជធានីភ្នំពេញ ជាមួយដើមទុនមាស ១ជីកន្លះ ដោយចាប់​មុខរបរដំបូងបើកសិប្បកម្មកិនជ័រកៅស៊ូ ទាំងដែលលោកគ្មានជំនាញនោះទេ។

អ្នកឧកញ៉ា សុខ គង់ បានរៀបរាប់តាមរយៈសៀវភៅ«អាថ៌កំបាំងពីក្រោយភាពជោគជ័យរបស់អ្នកឧកញ៉ា សុខ គង់» ចងក្រងរៀបចំដោយលោក យិប ឆេង លាប និងលោក រស់ គង់ ដូច្នេះថា«នេះជាការប្រថុយមួយយ៉ាងធំ តែខ្ញុំគិតថា ខ្ញុំបានសម្រេចចិត្តយ៉ាងត្រឹមត្រូវក្នុងការជ្រើសរើសមុខរបរនេះ។ គួបផ្សំនឹងសំណាងផង អ្វីដែលខ្ញុំគិតត្រូវនោះគឺថា ក្នុងពេលដែលគេប្រើប្រាស់កង់ជាទូទៅធ្វើជាមធ្យោបាយដឹកជញ្ជូន និងធ្វើដំណើរ ខ្ញុំគួរតែប្រកបរបរដែលពាក់ព័ន្ធកង់។ អ្វីដែលមានតម្រូវចាំបាច់ និងតម្លៃខ្លាំងពេលនោះ គឺសម្បក និងពោះវៀនកង់»។

អ្នកឧកញ៉ា សុខ គង់ បន្ថែមថា ខ្ញុំគ្មានជំនាញផលិតពោះវៀន និងសម្បកកង់ទេ ហើយពេលនោះសាធាតុគីមីដែលលាយ​សម្រាប់កែច្នៃជ័រកៅស៊ូឆៅ ឱ្យទៅជាផលិតផលពាក់កណ្តាលសម្រេច ដូចជា កៅឡាំងជាដើម មានការខ្វះខាត​ថែម​ទៀត។ ប៉ុន្តែដោយនិស្ស័យជាអ្នកចង់ចេះចង់ដឹង និងចង់សម្រេចគោលដៅ ខ្ញុំបានសុំរៀនពីមិត្តភ័ក្ត្រដែលគេប្រកបរបរ​នេះស្រាប់ ហើយបានដើរសាកសួរគេពីសាធាតុកៅឡាំងនេះ មាននៅទីណា? ទីបំផុតខ្ញុំ បានដឹងថា សាធាតុនេះ សម្បូរមាននៅខេត្តក្រចេះ។ ខ្ញុំបានទៅរក ហើយយកមកសាកល្បង និងធ្វើពិសោធជាច្រើនលើកច្រើនសារ ទម្រាំងបាន​សម្រេចចេញជាកៅស៊ូមានគុណភាពស្វិតល្អ។

រៀនបណ្តើរសាកល្បបណ្តើរមានការខាតបង់យ៉ាងច្រើន ទាំងពេលវេលា និងថវិកា តែទោះយ៉ាងណា អ្នកឧកញ៉ា សុខ គង់ អះអាងថា មិនរួញរាឡើយ គឺខិតខំទាល់តែបានជោគជ័យ។ ក្រោយមកលោក ក៏បានសុំរៀនជំនាញ ចំណេះដឹង​បន្ថែម​ពីការផលិតនៅរោងចក្ររដ្ឋមួយកន្លែងនៅម្តុំ ទួលគោក។

បើតាមអ្នកឧកញ៉ា សុខ គង់ នាសម័យនោះ សម្បកកង់ផលិតនៅវៀតណាមមានគុណភាពអន់ ដែលគេតែងបង្អាប់ថា របស់ទ្រឿង ធ្វើឱ្យអ្នកប្រើប្រាស់មានការខ្លាចរអារក្នុងការទិញ។ ដោយសិប្បកម្មដំណើរការល្អ ពេលនោះអ្នកឧកញ៉ា សុខ គង់ បានពង្រីកទីតាំងជាច្រើនកន្លែង ជាបន្តបន្ទាប់។

ក្រោយទទួលបានជោគជ័យក្នុងការផលិតកៅស៊ូអ៊ុតសម្បកកង់រួចមក អ្នកឧកញ៉ា សុខ គង់ បានស្រាវជ្រាវ ផលិត​នូវសម្ភារៈពីជ័យមួយចំនួនផ្សេងទៀត ដូចជាស្បែកជើងជាដើម។

ពីមួយដំណាក់កាលទៅមួយដំណាក់កាល ប្រទេសចេះតែមានការរីកចម្រើន ការធ្វើជំនួញរបស់អ្នកឧកញ៉ា សុខ គង់ រីកលូតលាស់ឥតឈប់ឈរ ដោយបានពង្រីកអាជីវកម្មធំៗជាបន្តបន្ទាប់រហូតដល់បច្ចុប្បន្ន។ ក្នុងនោះ អ្នកឧកញ៉ា សុខ គង់ បានក្តោបក្តាប់មុខជំនួញជាច្រើន នៅក្រោមក្រមហ៊ុន សូគីម៉ិច អ៊ិនវេសមេន គ្រុប រួមមាន៖ ក្រុមហ៊ុន សុខា អាហរ័ណ នីហរ័ណ (ធ្វើអាជីវកម្មនាំចូល និងចែកចាយផលិតផលប្រេងឥន្ធនៈ ហ្គាស កៅស៊ូក្រាលថ្នល់), ក្រុមហ៊ុនហ៊ុន គង់ហុង កាត់ដេរ, ក្រុមហ៊ុនវិនិយោគទុន សូគីម៉ិច កម្ពុជា, ក្រុមហ៊ុន សុខា អូតែល, សណ្ឋាគារសុខាឆ្នេរ ក្រុងព្រះ​សីហនុ, សណ្ឋាគារ សុខាអង្គរ, សណ្ឋាគារសុខាសៀមរាប, សណ្ឋាគាររេស៊ីដង់ភ្នំពេញ, សណ្ឋាគាររមណីយដ្ឋាន​ឋានសួគ៌​សុខា, ក្រុមហ៊ុនបូកគោហ្វាម, ក្រុមសុខារៀលអ៊ីស្តេត, ក្រុមហ៊ុនជោរៃភ្នំពេញយ៉ញវេនឈ័រ ខូ អិល ធីឌី និងក្រុម​ហ៊ុន សុខ គង់ អាហរ័ណ នីហរ័ណ(គិរីរម្យ) ជាដើម៕