ព័ត៌មានជាតិ
បញ្ចប់បរិញ្ញាបត្រ យុវតីម្នាក់សុខចិត្តចោលការងារទីក្រុងទៅជួយសហគមន៍តំបន់ដាច់ស្រយាល
សហគមន៍អេកូទេសចរណ៍ ជី ផាត នាខេត្តកោះកុង បានទាក់ទាញបេះដូងនិស្សិតស្រីម្នាក់ឱ្យទៅបម្រើការងារនៅទីនោះ ក្រោយបញ្ចប់ការសិក្សាថ្នាក់បរិញ្ញាបត្រជំនាញទេសចរណ៍ នៅរាជធានីភ្នំពេញ។
កញ្ញា ព្រាប សុមាវត្តី បានឱ្យ«កម្ពុជាថ្មី» ដឹងនៅថ្ងៃទី០៣ ខែកុម្ភៈ ឆ្នាំ២០២៣ នេះថា កញ្ញាមានស្រុកកំណើតនៅខេត្តកំពង់ចាម និងបានបញ្ចប់ការសិក្សាជំនាញទេសចរណ៍នៃសាកលវិទ្យាល័យភូមិន្ទភ្នំពេញក្នុងឆ្នាំ ២០២២។ ថ្មីៗនេះកញ្ញាបានស្ម័គ្រទៅបម្រើការងារនៅក្នុងសហគមន៍អេកូទេសចរណ៍ជីផាត (CBET Booking Coordinator) ក្នុងតួនាទីជាអ្នកសម្របសម្រួលការកក់ពីភ្ញៀវជាតិ និងអន្តរជាតិក្នុងសហគមន៍អេកូទេសចរណ៍។
មុនពេលទៅបម្រើការងារនៅតំបន់ដាច់ស្រយាលឆ្ងាយពីគ្រួសារ កញ្ញាធ្លាប់បានធ្វើការតាំងពីកំឡុងឆ្នាំ ២០១៨ ក្នុងហាងកាហ្វេមួយកន្លែងនៃអាកាសយានដ្ឋានអន្តរជាតិភ្នំពេញដែលមានតួនាទីជា Barista & Service។
ច្បាស់ណាស់ អាចមានមនុស្សមួយចំនួនពិតជាឆ្ងល់ហើយថា កញ្ញា ព្រាប សុមាវត្តី រៀនចប់ថ្នាក់បរិញ្ញាបត្រផ្នែកទេសចរណ៍ តែហេតុអ្វីបានជាកញ្ញាបោះបង់ការងារនៅក្នុងទីក្រុង ហើយសម្រេចចិត្តទៅបំពេញការងារនៅតំបន់ជីផាត ដែលអាចនិយាយបានថា ជាតំបន់មួយដែលដាច់ស្រយាលមួយទៅវិញ។
បើតាមការគូសបញ្ជាក់របស់កញ្ញា ព្រាប សុមាវត្តី «មូលហេតុដែលខ្ញុំបានសម្រេចចិត្ត មកធ្វើការនៅតំបន់ទេសចរណ៍ជីផាតនេះ ពីព្រោះខ្ញុំចូលចិត្តធម្មជាតិ ព្រៃឈើ នឹងសត្វព្រៃ ហើយអ្វីដែលកាន់តែពិសេស បានធ្វើការជាមួយប្រជាជន អាចជួយអភិវឌ្ឍន៍ដល់សហគមន៍»។
កញ្ញាបន្តថា «ម្យ៉ាងវិញទៀត ខ្ញុំចង់ជួយផ្សព្វផ្សាយ ដល់ប្រជាពលរដ្ឋ ឱ្យជួយលើកស្ទួយវិស័យទេសចរណ៍ ក្នុងស្រុកពិសេសនៅតំបន់អេកូទេសចរណ៍បែបសហគមន៍ មួយនេះតែម្តង»។
កញ្ញា សុមាវត្តី បានបន្ថែមថា បើទោះបីជាតំបន់ទេសចរណ៍ជីផាត ដាច់ស្រយាលក៏ពិតមែន ប៉ុន្តែការងារមួយនេះ ជាការងារដែលកញ្ញាស្រលាញ់និងពេញចិត្ត ដូច្នេះកញ្ញានឹងមិនបោះបង់ចោលនោះទេ។ អ្វីដែលអាចធ្វើបាន កញ្ញានឹងជួយលើកស្ទួយផ្សព្វផ្សាយសហគមន៍មួយនេះ ឱ្យមានភាពរីកចម្រើនតាមរយៈភ្ញៀវទេសចរជាតិ និងអន្តរជាតិ ដែលបានចូលមកទស្សនា។
ទន្ទឹមនេះ កញ្ញា ព្រាប សុមាវត្តី ក៏បានលើកឡើង ពីបញ្ហាប្រឈមមួយចំនួនដែលកញ្ញាបានជួបប្រទះ កំឡុងពេលមកបំពេញការងារនៅទីនេះ ប្រមាណជា ៣ចំណុចដូចខាងក្រោម៖
- ដោយហេតុថា កញ្ញាបានមករស់នៅក្នុងទឹកដីខេត្តកោះកុង តែម្នាក់ឯង ដែលជាទឹកដីថ្មី ដូច្នេះ មិនអាចដឹងថា មានមនុស្សប៉ុន្មាននាក់ដែលស្អប់ ឬស្រលាញ់ទេ ប៉ុន្តែអ្វីដែលកញ្ញាអាចធ្វើបាន គឺបង្កើតទំនាក់ទំនងឱ្យបានច្រើន ធ្វើល្អទៅកាន់អ្នកដទៃ
- បញ្ហាមួយទៀត ច្បាស់ណាស់ថាមនុស្សមួយចំនួនបានដឹងថា ជីផាត ជាតំបន់ដាច់ស្រយាល ដូច្នេះវាពិបាកនៅក្នុងការធ្វើដំណើរទៅមក (ផ្លូវស្ងាត់ហើយទៅណាមកណាម្នាក់ឯង)
- ចុងក្រោយ គឺពិបាកនៅក្នុងការស្វែងរកទិញទំនិញក៏ដូចជារបស់របបផ្សេងៗ តម្រូវការផ្ទាល់ខ្លួនមួយចំនួន ព្រោះវាជាតំបន់ដាច់ស្រយាល។
កញ្ញា ព្រាប សុមាវត្តី ក៏រៀបរាប់ឱ្យដឹងខ្លះៗផងដែរ ពីតំបន់ទាក់ទាញពាក់ព័ន្ធសហគមន៍អេកូទេសចរណ៍ជីផាត គឺភ្ញៀវទេសចរ អាចដើរលេងកម្សាន្តក្នុងព្រៃ មើលសត្វព្រៃ ទឹកធ្លាក់ ទឹកឆាយ។ លើសពីនេះ ក៏នៅមានវត្ថុបុរាណដូចជា ពាងបុរាណ ផ្នូរបុរាណ។ ជាងនេះទៀត ភ្ញៀវទេសចរជាតិនិងអន្តរជាតិ អាចធ្វើសកម្មភាពជាមួយប្រជាពលរដ្ឋដូចជាការស្នាក់នៅជាលក្ខណៈផ្ទះស្នាក់ អាចរៀនសូត្រពីរបៀបរស់នៅពលរដ្ឋមូលដ្ឋាន អាចញាំអាហារនិងចំអិនអាហារជាមួយប្រជាជន ជាមួយគ្នានេះ ក៏អាចចូលរួមផ្សារភ្ជាប់ជាមួយពលរដ្ឋក្នុងភូមិផងដែរ។
ក្រៅពីនេះភ្ញៀវទេសចរអាចជិះទូកមើលថ្ងៃរះ ថ្ងៃលិច ជិះកាយាក់ ជិះទូកមើលអំពិលអំពែកពេលរាត្រី ជិះទូកចាក់បង្កងពេលយប់ ការបោះតង់តាមមាត់ព្រែកជាដើម។
ជាចុងក្រោយនេះ កញ្ញា ព្រាប សុមាវត្តី ក៏សំណូមពរដល់ភ្ញៀវទេសចរជាតិ និងអន្តរជាតិ មេត្តាចូលរួមគ្រប់សហគមន៍ទាំងអស់នៅក្នុងប្រទេស ដើម្បីជួយលើកស្ទួយ និងការអភិវឌ្ឍវិស័យទេសចរណ៍នៅក្នុងស្រុកឱ្យកាន់តែមានភាពរីកចម្រើន៕
ដោយ៖ ថារី
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ