មន្រ្តីទូត៖ រុស្ស៊ី ត្រៀមផ្តល់ជំនួយយោធា បើកម្ពុជាស្នើសុំ តែមិនទាន់មានគម្រោងធ្វើសមយុទ្ធយោធារួមគ្នា

មន្រ្តីយោធានៃស្ថានទូតរុស្សីប្រចាំនៅកម្ពុជា បានអះអាងឲ្យដឹងថា កងទ័ពរុស្ស៊ី មិនទាន់មានគម្រោងណាមួយក្នុងការធ្វើសមយុទ្ធយោធាជាមួយកងទ័ពកម្ពុជានោះឡើយ។ ប៉ុន្តែ រុស្ស៊ី នឹងផ្តល់ជាជំនួយយោធាដល់ប្រទេសកម្ពុជា បើសិនមានការស្នើសុំជាផ្លូវការណាមួយ។ ការអះអាងនេះ ធ្វើឡើងនៅក្នុងសន្និសីទសារព័ត៌មានស្តីពីគោលនយោបាយការបរទេសរុស្ស៊ី និងបច្ចុប្បន្នភាពជុំវិញអ៊ុយក្រែននៅស្ថានទូតរុស្ស៊ី នៅព្រឹកថ្ងៃសុក្រនេះ។

លោក Col Sergei Shumilin ជំនួយការអនុព័ន្ធយោធានៃស្ថានទូតរុស្ស៊ីប្រចាំនៅកម្ពុជា បានលើកឡើងថា កងទ័ពរុស្ស៊ី គឺជាប់ចំណាត់លេខ២នៅលើពិភពលោក ហើយកងទ័ពប្រដាប់អាវុធរុស្ស៊ីមានបទពិសោធដ៏សម្បូរបែបក្នុងការចូលរួមនៅក្នុងវិបត្តិផ្សេងៗ។ ពាក់ព័ន្ធនឹងវិស័យកងទ័ពជាមួយកម្ពុជា លោក Col Sergei Shumilin បានអះអាងថា៖«បើសិនប្រទេសកម្ពុជាត្រូវការជំនួយក្នុងវិស័យយោធាណាមួយពីខាងប្រទេសរុស្ស៊ី ប្រទេសរុស្ស៊ី ត្រៀមខ្លួនបើកចំហរដើម្បីផ្តល់ជំនួយនេះ បើសិនយើងទទួលលិខិតជាផ្លូវការ»។

បើតាមលោកជំនួយការអនុព័ន្ធយោធានៃស្ថានទូតរុស្ស៊ីប្រចាំនៅកម្ពុជា គឺនៅពេលបច្ចុប្បន្ននេះ សហព័ន្ធរុស្ស៊ីកំពុងសហការក្នុងវិស័យយោធា ជាពិសេស ផ្នែកបច្ចេកវិទ្យាយោធាជាមួយប្រទេសជាច្រើននៅក្នុងពិភពលោកដែលត្រូវការបទពិសោធ និងជំនួយផ្នែកយោធាពីសហព័ន្ធរុស្ស៊ី។ ដូច្នេះហើយ រុស្ស៊ី ក៏អាចនឹងសហការ និងផ្តល់ជំនួយនេះដល់ប្រទេសកម្ពុជាផងដែរ បើសិនមានការស្នើសុំផ្លូវណាមួយពីរដ្ឋាភិបាលកម្ពុជា។

សូមបញ្ជាក់ថា បច្ចុប្បន្ននេះ រុស្ស៊ីកំពុងជាប់ដៃធ្វើសង្រ្គាមនៅក្នុងប្រទេសអ៊ុយក្រែនដែលមកដល់ពេលនេះ គឺសង្គ្រាមនេះ បានអូសបន្លាយប្រមាណ១ឆ្នាំមកហើយ។ លោក Col Sergei Shumilin បានគូសបញ្ជាក់ជាថ្មីថា មូលហេតុដែលរុស្ស៊ីវាយលុកចូលអ៊ុយក្រែន គឺដើម្បីជួយ និងការពារប្រជាពលរដ្ឋដែលនិយាយភាសារុស្ស៊ី ហើយម្យ៉ាងទៀត ក៏ដើម្បីការពារមិនឲ្យប្រទេសអ៊ុយក្រែនចូលជាសមាជិកអង្គការណាតូ ដែលជាការគំរាមកំហែងដល់សន្តិសុខជាតិរបស់រុស្ស៊ី៕