ព័ត៌មានជាតិ

ប្រធានាធិបតីរុស្ស៊ីជំរុញបង្កើនពាណិជ្ជកម្មជាមួយកម្ពុជាឡើងវិញក្រោយធ្លាក់ចុះយ៉ាងគំហុកបន្ទាប់ពីមានសង្គ្រាមជាមួយអ៊ុយក្រែន

បានផុស

៧ នាទី មុន

នៅ

ថ្ងៃសុក្រ ១៩ មិថុនា ២០២៦

ដោយ

ប្រធានាធិបតីរុស្ស៊ីលោក វ្ល៉ាឌីមៀ ពូទីន បានអញ្ជើញតំណាងធុរកិច្ចកម្ពុជាទៅចូលរួមព្រឹត្តិការណ៍សេដ្ឋកិច្ចរុស្ស៊ីចំនួន២នៅខែកញ្ញា និងតុលា ឆ្នាំ២០២៦ខាងមុខ ដោយសង្ឃឹមថាទំនាក់ទំនងពាណិជ្ជកម្មអាចកើនឡើងបំពេញតាមសក្ដានុពលរវាងប្រទេសទាំងពីរឡើងវិញ។ ការជំរុញនេះត្រូវបានមើលឃើញថា ស្របពេលដែលទំហំពាណិជ្ជកម្មជាមួយកម្ពុជាបានធ្លាក់ចុះយ៉ាងគំហុកបន្ទាប់រុស្ស៊ីធ្វើសង្គ្រាមជាមួយអ៊ុយក្រែនកាលពីឆ្នាំ២០២២មក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបជាមួយនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត នៅក្រៅកិច្ចប្រជុំរំឮកខួបអនុស្សាវរីយ៍៣៥ អាស៊ាន រុស្ស៊ី នៅទីក្រុងកាហ្សាន ថ្ងៃទី១៨ ខែមិថុនា ឆ្នាំ២០២៦ លោក ពូទីន បានលើកឡើងថាទំនាក់ទំនងពាណិជ្ជកម្មរវាងកម្ពុជា និងរុស្ស៊ីកើនតែ២%ប៉ុណ្ណោះនៅឆ្នាំ២០២៥ ដែលមិនទាន់អាចបំពេញនូវសក្ដានុពលពេញលេញនៅឡើយ។ លោកបានអញ្ជើញអ្នករកស៊ីកម្ពុជាដើម្បីចូលរួមវេទិកាសេដ្ឋកិច្ចភាគខាងកើតនៅខែកញ្ញា និងសប្ដាហ៍ថាមពលរុស្ស៊ីនៅខែតុលាខាងមុខ។

លោកថា៖ «សព្វថ្ងៃនេះទំនាក់ទំនងរវាងរុស្ស៊ី និងកម្ពុជាបានបន្តរីកចម្រើន។ នៅចុងឆ្នាំមុនទំនាក់ទំនងពាណិជ្ជកម្មប្រទេសទាំងពីរបានកើនឡើង២%។ ពិតណាស់នេះគឺជាតួលេខតូចមួយ ដែលមិនបំពេញតាមសក្ដានុពលដែលយើងមាននោះទេ»។

ក្នុងជំនួបដែលបានផ្សព្វផ្សាយនៅថ្ងៃទី១៨ ខែមិថុនានោះ សម្ដេចធិបតី ហ៊ុន ម៉ាណែត បានបញ្ជាក់ថាភាពជាដៃគូររវាងកម្ពុជា និងរុស្ស៊ី នឹងមិនផ្លាស់ប្ដូរទេទោះបីភូមិសាស្ត្រនយោបាយមានការប្រែប្រួលក្ដី។

សម្ដេចថា៖ «ខ្ញុំសូមកោតសរសើរចំពោះការចូលរួមរបស់រុស្ស៊ីជាបន្តបន្ទាប់ចំពោះការអភិវឌ្ឍន៍សង្គម សេដ្ឋកិច្ចរបស់កម្ពុជាជាច្រើនឆ្នាំមកនេះ។ ទោះបីជាមានការផ្លាស់ប្ដូរភូមិសាស្ត្រនយោបាយក៏ដោយ ក៏កម្ពុជានៅតែរក្សាជំហរទំនាក់ទំនងជាមួយរុស្ស៊ីនៅតែមិនប្ដូរដោយផ្អែកលើការជឿទុកចិត្តនយោបាយ ការគាំទ្រគ្នាទៅវិញទៅមក ការគោរព និងផលប្រយោជន៍រួម»។

ទំហំពាណិជ្ជកម្មកម្ពុជា-រុស្ស៊ីនៅប៉ុន្មានឆ្មាំចុងក្រោយនេះបានធ្លាក់ជាគំហុកពី ២៣៩លានដុល្លារអាមេរិកនៅឆ្នាំ២០២១ មកនៅត្រឹម ៥៥លានដុល្លារអាមេរិកនៅឆ្នាំ២០២៤ និងកើនឡើងត្រឹម២%ប៉ុណ្ណោះនៅឆ្នាំ២០២៥។ យោងតាមគេហទំព័រទិសដៅរុស្ស៊ីទៅកាន់អាស៊ី ការធ្លាក់ចុះទំហំពាណិជ្ជកម្មនេះគឺដោយសារប្រទេសរុស្ស៊ីត្រូវជាប់ទណ្ឌកម្មពីលោកខាងលិច ហើយទំនិញពីកម្ពុជាមានការពិបាកទៅដល់រុស្ស៊ី ខណៈដែលអ្នករកស៊ីរុស្ស៊ីភាគច្រើនផ្ដោតលើទីផ្សារចិននិងវៀតណាមច្រើនជាងកម្ពុជា។

អ្នកជំនាញវិទ្យាសាស្ត្រនយោបាយ និងសេដ្ឋកិច្ច លោកបណ្ឌិត ញិល រដ្ឋា បានឱ្យកម្ពុជាថ្មីដឹងតាមសារអេឡិចត្រូនិកតេឡេក្រាមថា កម្ពុជានិងរុស្ស៊ីអាចបង្កើនទំហំពាណិជ្ជកម្មនឹងគ្នាឡើងវិញបាន បើទោះបីក្នុងបរិបទដែលរុស្ស៊ីកំពុងរងទណ្ឌកម្មពីលោកខាងលិចក្ដី។ លោកថាទណ្ឌកម្មមិនមែនជារបាំងទាំងស្រុងទេ ហើយអាស៊ាននិងកម្ពុជាក៏មិនបានចូលរួមដាក់ទណ្ឌកម្មរុស្ស៊ីដូចលោកខាងលិចដែរ។ លោកបន្ថែមថា ទណ្ឌកម្មលោកខាងលិចផ្ដោតលើវិស័យហិរញ្ញវត្ថុ បច្ចេកវិទ្យាទ្វេដង និងថាមពលប៉ុណ្ណោះមិនបានដាក់លើផលិតផលកសិកម្ម អាហារ ឱសថ និងទំនិញប្រើប្រាស់ទូទៅឡើយ។

លោកបន្ថែមថា៖ «បញ្ជាធំបំផុតមិនមែន ទណ្ឌកម្ម ទេ ប៉ុន្ដែជា ការភ័យខ្លាចរបស់ធនាគារ ក្រុមហ៊ុនដឹងជញ្ជូន និងអ្នករកស៊ីខ្មែរ ដែលខ្លាចប៉ះពាល់ដល់ទំនាក់ទំនងជាមួយលោកខាងលិច។ បើដោះស្រាយបញ្ហាជំនឿចិត្តនេះបាន ពាណិជ្ជកម្មអាចកើនឡើង»។

លោកបណ្ឌិតបានផ្ដល់មធ្យោបាយចំនួន៥ដែលអាចបង្កើនទំហំពាណិជ្ជកម្មរវាងរុស្ស៊ី និងកម្ពុជា ឡើងវិញបានគឺ ១. ត្រូវពង្រឹងពាណិជ្ជកម្មលើវិស័យដែលមិនប៉ះពាល់ដល់ទណ្ឌកម្មរួមមានកសិកម្ម វាយនភណ្ឌ និងស្បែកជើង ឧសថ និងឧបករណ៍វេជ្ជសាស្ត្រ។ ២. ការប្រើប្រាស់ ប្រព័ន្ធ SPFS របស់រុស្ស៊ី យន្តការទូទាត់ជំនួសបញ្ចៀសការដោះដូរលុយជាប្រាក់ដុល្លារ ប្រើប្រាស់ប្រព័ន្ធធនាគារចិនជាផ្លូវកាត់។ ៣. ប្រើប្រាស់ចំណងប្រវត្តិសាស្ត្រ និងទំនាក់ទំនងមនុស្សដែលអតីតនិស្សិតពីសូវៀត និងរុស្ស៊ីអាចដើរតួជាស្ពានវប្បធម៌ និងធុរកិច្ច រៀបចំបេសកកម្មពាណិជ្ជកម្មទៅកាន់វេទិកាសេដ្ឋកិច្ចរុស្ស៊ី។ ៤. បង្កើតភាពជាដៃគូរសាធារណៈឯកជនរវាងកម្ពុជា និងរុស្ស៊ី រដ្ឋាភិបាលគួរបង្កើត មូលនិធិពាណិជ្ជកម្មកម្ពុជា-រុស្ស៊ី កាត់បន្ថយហានិភ័យដល់វិស័យឯកជន ផ្ដល់ការធានារ៉ា់ប់រងពាណិជ្ជកម្មតាមរយៈធនាគាររដ្ឋ និងទី៥គឺការប្រើប្រាស់អាស៊ានជាខែលការពារ លើការជំរុញចរចាពាណិជ្ជកម្មសេរីរវាងអាស៊ាន និងសហភាពសេដ្ឋកិច្ចអ៊ឺរ៉ាស៊ីឱ្យបានលឿន ហើយកម្ពុជាអាចដើរតួជាប្រទេសសម្របសម្រួលសម្រាប់ប្រទេសអាស៊ានដទៃទៀតក្នុងពាណិជ្ជកម្មជាមួយរុស្ស៊ី។

ប្រទេសរុស្ស៊ីបានបើកការវាយប្រហារលើប្រទេសអ៊ុយក្រែនដែលជាអតីតបងប្អូនគ្នាក្នុងសហភាពសូវៀតកាលពីថ្ងៃទី២៤ ខែកុម្ភៈ ឆ្នាំ២០២២ និងត្រូវបានអន្តរជាតិថ្កោលទោសយ៉ាងខ្លាំងចំពោះសកម្មភាពនេះ។ កម្ពុជាគឺជាប្រទេសមួយដែលចូលរួមជារដ្ឋសហស្ថាបនិក និងបានបោះឆ្នោតគាំទ្រសេចក្ដីសម្រេចរបស់មហាសន្និបាតអង្គការសហប្រជាជាតិ UNGA កាលពីថ្ងៃទី២ ខែមីនា ឆ្នាំ២០២២ ថ្កោលទោសរុស្ស៊ីក្នុងសង្គ្រាមអ៊ុយក្រែន។

យ៉ាងណាក្ដីសម្ដេចតេជោ ហ៊ុន សែន ដែលកាលនោះជានាយករដ្ឋមន្ត្រី បានបង្ហាញក្ដីសង្ឃឹមថាមិត្តរុស្ស៊ីនឹងយល់ពីកម្ពុជាព្រោះកម្ពុជាឱ្យតម្លៃលើច្បាប់អន្តរជាតិមិនគាំទ្រការប្រើប្រាស់កម្លាំង ការត្រៀមដើម្បីប្រើកម្លាំង ឬគំរាមកំហែងការប្រើប្រាស់កម្លាំងប្រឆាំងប្រទេសណាមួយឡើយ៕