នាវាទេសចរណ៍បរទេសមួយគ្រឿង ឈ្មោះ Nautica មានសញ្ជាតិ MARSHALL ISLAND ផ្ទុកមនុស្សជាច្រើន​ជាតិសាសន៍ជិត ១.០០០នាក់ បានចូលចត​នៅ​កំពង់ផែស្វយ័តក្រុងព្រះសីហនុ (ផែចាស់) នៅថ្ងៃទី២២ ខែកុម្ភៈ ឆ្នាំ២០២៣ ដោយមានគោលបំណងមកទស្សនាប្រទេសកម្ពុជា រយៈពេល១ថ្ងៃ។

លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានប្រាប់កម្ពុជាថ្មីថា នាវាទេសចរណ៍នេះ មានផ្ទុកមនុស្សជាច្រើនជាតិសាសន៍សរុបចំនួន ៩៤២នាក់ ដែលមាននាវិកសរុបចំនួន ៤០៧នាក់ ស្រី៦៩នាក់ (៣៦សញ្ជាតិ ) និងមានភ្ញៀវទេសចរសរុបចំនួន ៥៣៥នាក់ ស្រី២៨៨នាក់ (២៤សញ្ជាតិ ) ក្នុងនោះ សញ្ជាតិដែលមានភ្ញៀវច្រើនជាងគេគឺសហរដ្ឋអាមេរិក ។

បើតាមលោកប្រធានមន្ទីរ ភ្ញៀវទេសចរនៅក្នុងនាវាទាំងអស់ នឹងចេញដំណើរកម្សាន្តនៅតាមតំបន់នានា ក្នុងប្រទេសកម្ពុជា ដោយក្នុងនោះ ភ្ញៀវមួយចំនួន ទៅកម្សាន្តលេងនៅតំបន់ឆ្នេរ ខេត្តព្រះសីហនុ តាមវត្តអារាម សហគមន៍ សាលារៀន ផ្សារ ហើយមួយចំនួនទៀតទៅគោលដៅតំបន់ទេសចរណ៍ខេត្តសៀមរាប និងរាជធានី​ភ្នំពេញជាដើម។

​​​លោក តាំង សុចិត្តគ្រឹស្នា បានលើកឡើងទៀតថា ការវិលត្រឡប់របស់នាវាទេសចរណ៍ធំៗចូលមកជាបន្តបន្ទាប់នេះ ដោយសារគេមើលឃើញថា កម្ពុជា ជាតំបន់មានសក្តានុពល និងគ្រប់គ្រងជំងឺកូវីដ-១៩ បានល្អប្រសើរ ពិសេសទៅលើសន្តិសុខសុវត្ថិភាពជូនភ្ញៀវទេសចរ។ លើសពីនេះទៀត ការអភិវឌ្ឍហេដ្ឋារចនាសម្ព័ន្ធ ក៏បានល្អប្រសើរផងដែរ។

​​ប្រធានមន្ទីរទេសចរណ៍ បានគូសបញ្ជាក់ថា ចាប់ពីពេលនេះទៅ នាវាទេសចរណ៍ធំៗ នឹងបន្តចូលមកកម្ពុជា ថែមទៀត ចន្លោះពី ៤៥-៥០នាវា ក្នុងមួយឆ្នាំៗ ពិសេសនៅក្នុងឆ្នាំ ២០២៣នេះ ប្រសិនបើមិនមានការងើបឡើងវិញនៃជំងឺកូវីដ-១៩ និងបញ្ហាផ្សេងៗទៀត។

សូមបញ្ជាក់ថា ឈ្មោះ Nautica ដែលចូលចតនៅខេត្តព្រះសីហនុនេះ មានប្រវែងបណ្តោយជាង១៨០ម៉ែត្រ ទទឹងជាង ៣០ម៉ែ្រត ជំរៅជាង ៦ម៉ែត្រ។ នាវានេះ នឹងចាកចេញទៅវិញនៅម៉ោង ៦ល្ងាចថ្ងៃដដែលនេះ ដោយបន្តដំណើរឆ្ពោះ​ទៅប្រទេសវៀតណាម៕