ស្ពានអាកាសឫស្សីកែវ​ នឹងដាក់ឲ្យប្រេីប្រាស់ជាបណ្តោះអាសន្ន​ចាប់ពីថ្ងៃ​ទី១​ ខែមីនា​ ឆ្នាំ ២០២៣ នេះទៅ។ នេះបើតាម​លោក កើត ឆែ អភិបាលរងរាជធានីភ្នំពេញ។

បើយោងតាមផេកហ្វេសបុកផ្លូវការរបស់លោក កើត ឆែ អភិបាលរងរាជធានីភ្នំពេញនាថ្ងៃសៅរ៍ ទី២៥ កុម្ភៈនេះ រដ្ឋបាលរាជធានីភ្នំពេញ​ ទទួលបានគោលការណ៍អនុញ្ញាតដ៏ខ្ពង់ខ្ពស់របស់​ សម្តេច​តេជោ​នាយករដ្ឋមន្រ្តី​ដាក់ឲ្យប្រេីប្រាស់ជាបណ្តោះ​​អាសន្ន​នូវស្ពានអាកាសឫស្សីកែវ​ ដែលមានប្រវែង​ ៤៨៣​ ម៉ែត្រទទឹង​ ១៥,៨​ ម៉ែត្រ​ ដេីម្បីសម្រួលដល់ការធ្វេី​ដំណេីរ​​​របស់បងប្អូនប្រជាពលរដ្ឋ​ ចាប់ពីថ្ងៃ​ទី១​ ខែមីនា​ ឆ្នាំ ២០២៣នេះទៅ។ នេះជាសមិទ្ធផលថ្មីមួយទៀត​ ក្រោមម្លប់សុខសន្តិភាព​ ក្រោមការដឹកនាំរបស់សម្តេចតេជោ​។

ស្ពានអាកាសថ្មីឫស្សីកែវ បានបើកការដ្ឋានស្ថាបនាកាលពីថ្ងៃទី ៣១ ខែមករាឆ្នាំ២០២២ មានបណ្ដោយ ៤៨៣ ម៉ែត្រ ទទឹង​​ ១៥,៨​ម៉ែត្ រកំពស់ ៥ម៉ែត្រ ដោយហោះនៅលើបណ្ដោយផ្លូវជាតិលេខ៥ នៅ ចន្លោះស្ពានបេតុងឆ្លងកាត់ទន្លេសាបថ្មីដែលបាននឹងកំពុងសាងសង់បានជិតរួចរាល់ហើយដែរ។

គម្រោងនៃការសាងសង់ស្ពានអាកាសថ្មី ហោះនៅលើបណ្ដោយផ្លូវជាតិលេខ៥ នេះ ប្រើប្រាស់រយៈពេលសាងសង់ចំនួន​១៥ ខែ ពោលគឺឲ្យហើយនៅមុនដែលកម្ពុជាធ្វើជាម្ចាស់ផ្ទះនៃព្រឹត្តិការណ៍ប្រកួតកីឡា SEA GAME ២០២៣ នាពេលខាងមុខ៕

អត្ថបទ៖ ស្រីរ័ត្ន