កម្ពុជា-ឡាវ បានឯកភាពគ្នា ជំរុញពិនិត្យលើការសម្រួលការធ្វើដំណើរឆ្លងកាត់ព្រំដែន ពិសេសអាចឲ្យទេសចរ បើកបរដោយខ្លួនឯងឆ្លងកាត់ប្រទេសកម្ពុជា ប្រើប្រាស់ផ្លូវល្បឿនលឿនមកកាន់តំបន់ឆ្នេរសមុទ្រកម្ពុជា។​ ការពិភាក្សា និងឯកភាពគ្នានេះធ្វើឡើង ក្នុងជំនួបទ្វេភាគីរវាងលោក ថោង ខុន រដ្ឋមន្ត្រីក្រសួងទេសចរណ៍កម្ពុជា ជាមួយ អ្នកស្រី សួនសាវ៉ាន់ វិញ៉ាកេត រដ្ឋមន្រ្តីក្រសួងព័ត៌មាន វប្បធម៌ និងទេសចរណ៍ឡាវ នៅទីក្រុងវៀងចន្ទន៍ ប្រទេសឡាវ កាលពីថ្ងៃទី១៣ ខែមីនា ឆ្នាំ២០២៣ ។​

ដោយមើលឃើញពីសក្តានុពលនៃហេដ្ឋារចនាសម្ព័ន្ធថ្មីៗក្នុងប្រទេសទាំងពីរ អាចទាក់ទាញភ្ញៀវទេសចរ រដ្ឋមន្រ្តីទាំងពីរយល់ស្របគ្នាក្នុងការជំរុញឱ្យឧត្តមមន្រ្តីទេសចរណ៍ នៃប្រទេសទាំងពីរពិនិត្យលើការសម្រួលការធ្វើដំណើរឆ្លងកាត់ព្រំដែន តភ្ជាប់គោលដៅទេសចរណ៍សំខាន់ៗនៃប្រទេសទាំងពីរ តាមរយៈការបើកជើងហោះហើរបន្ថែម និងជំរុញពិនិត្យលើការសម្រួលការធ្វើដំណើរឆ្លងកាត់ព្រំដែន។

ពិសេសអាចឲ្យទេសចរបើកបរដោយខ្លួនឯងឆ្លងកាត់ប្រទេសកម្ពុជា ដោយប្រើប្រាស់ផ្លូវល្បឿនលឿន មកកាន់តំបន់ឆ្នេរសមុទ្រកម្ពុជា និងអាចឲ្យទេសចរកម្ពុជា កម្សាន្តតាមរថភ្លើងល្បឿនលឿនរបស់ឡាវពី ទីក្រុងវៀងចន្ទន៍ទៅតំបន់ទាក់ទាញផ្សេងៗរបស់ឡាវ។​

លើសពីនេះ គឺការជំរុញលំហូរទេសចរចិន និងប្រទេសទីបីផ្សេងទៀតមក ប្រទេសទាំងពីរតាមរយៈសក្តានុពលនៃរថភ្លើងល្បឿនលឿនរបស់ឡាវ ផ្លូវល្បឿនលឿនភ្នំពេញ-ខេត្តព្រះសីហនុ។​

បើតាមការឲ្យដឹង ទាក់ទងនឹងការហោះហើរ ភាគីកម្ពុជា គឺស្វាគមន៍ ​និងត្រៀមពិនិត្យសម្រួលផ្តល់គោលនយោបាយ ពិសេសក្នុងការហោះហើរវៀងចន្ទន៍ ភ្នំពេញ ក្រុងព្រះសីហនុ ឬអាចសុំសិទ្ធិ និងគោលនយោបាយ ពិសេសផ្សេងទៀតតាមការស្នើសុំរបស់មិត្តឡាវ។

គួរបញ្ជាក់ផងដែរថា នាអំឡុងពេលនៃកិច្ចប្រជុំនេះ ក៏មានកិច្ចប្រជុំរវាងវិស័យឯកជននៃប្រទេសទាំងពីរដើម្បីពិនិត្យលើការរៀបចំកញ្ចប់ទេសចរណ៍រួម តភ្ជាប់ទំនាក់ទំនងធុរកិច្ចទេសចរណ៍៕