អ្នកអភិវឌ្ឍអចលនទ្រព្យគាំទ្រវិធានការរដ្ឋាភិបាល​លើការពន្យារពេលបង់ពន្ធជាកញ្ចប់ចំពោះក្រុមហ៊ុនអភិវឌ្ឍន៍លំនៅឋាន

អ្នកអភិវឌ្ឍអចលនទ្រព្យគាំទ្រវិធានការរបស់រាជរដ្ឋាភិបាលដែល សម្រេចបន្តពន្យា​ពេលអនុវត្ត​ការបង់ពន្ធជាកញ្ចប់ តាមដំណាក់កាលរហូតដល់ដំណាច់ឆ្នាំ២០២៤ សម្រាប់ក្រុមហ៊ុនអភិវឌ្ឍន៍​លំនៅឋានជាបុរី។

រាជរដ្ឋាភិបាលកម្ពុជាកាលពីពេលថ្មីៗនេះ បានសម្រេចដាក់ចេញនូវវិធានការអភិវឌ្ឍវិស័យសំណង់ និងអចលនទ្រព្យផ្នែកបុរី ដើម្បីរក្សាស្ថិរភាពនៃវិស័យសំណង់ និងអចលនទ្រព្យ ដែលត្រូវបាន​ចាត់ទុក​ជាវិស័យអាទិភាពមួយ ក្នុងការគាំទ្រដល់​កំណើនសេដ្ឋកិច្ច។

លោកបណ្ឌិត គីម ហ៊ាង ប្រធានក្រុមហ៊ុន KW Cambodia ប្រាប់កម្ពុជាថ្មីនៅថ្ងៃទី ១៩ ខែមេសា ឆ្នាំ ២០២៣ នេះថា លោកគាំទ្រចំពោះវិធានការរបស់រដ្ឋាភិបាល ប៉ុន្តែលោកសង្ឃឹមថា រដ្ឋាភិបាលជួយច្រើនជានេះ។

លោកពន្យល់ថា រាជរដ្ឋាភិបាល​ពន្យាពេលការ​យកប្រាក់ចំណេញមូលធន ២០ ភាគរយ រហូតដល់​ដំណាច់ឆ្នាំ ២០២៤ ​ដែលនេះជាមធ្យោបាយល្អរបស់រដ្ឋាភិបាល ខណៈដែល​រដ្ឋាភិបាលធ្លាប់​ពន្យា​ពេល ២ លើកមកហើយ ដែលនេះជាលើកទី ៣។

​លោកបន្តថា ការមិនយកពន្ធប្រថាប់ត្រាទៅលើអចលនទ្រព្យ ​ដែលមានតម្លៃក្រោម ៧ ម៉ឺនជាបុរី។ ត្រង់ចំណុចនេះ មិនអាចជួយបានច្រើនសម្រាប់ប្រជាពលរដ្ឋទូទៅទេ ព្រោះចំណុចនេះលើកលែង​តែបុរី ចំណែកផ្ទះរបស់ប្រជាពលរដ្ឋទូទៅក្រោម ៧ ម៉ឺននៅបង់ដដែល។

ម្យ៉ាងទៀតគម្រោងធំបង់ពន្ធលើសពី ១ លាន ឧទាហរណ៍ថា បង់ ២ លាន អញ្ចឹងពីមុនចែក ២៤ ខែ ឥឡូវចែក ៣៦ ខែក៏ជួយដែរ។ តែលោកថា ការជួយរបស់រដ្ឋាភិបាលសម្រួលបានមួយផ្នែក ប៉ុន្តែបើ​ថា ឱ្យបានគ្រប់គ្រាន់គឺមិនទាន់នោះទេ ខណៈពិភពលោក និងកម្ពុជាផងកំពុងជួបវិបត្តិ​សេដ្ឋកិច្ច​សកល វិបត្តិដីធ្លី រយៈពេល ៣ ឆ្នាំ ចូលឆ្នាំទី ៤។

ការជួយគឺជួយបានមួយផ្នែក ប៉ុន្តែបើតាមការយល់ឃើញរបស់លោក ទាល់តែរាជរដ្ឋាភិបាល ​ជួយ​សម្រួលអ្នកអភិវឌ្ឍន៍លំនៅឋានជាមួយធនាគារដោយទម្លាក់លុយឱ្យម្ចាស់បុរីដែលជាប់គាំងនោះគឺអាចដោះស្រាយបានច្រើន។

សូមជំរាបថា រាជរដ្ឋាភិបាល​បានសម្រេច​ដាក់ចេញនូវវិធានការបន្ថែមជាកញ្ចប់ដោយក្នុងនោះមានដូចជា៖ ពន្យារពេលការអនុវត្តការបង់ពន្ធជាកញ្ចប់តាមដំណាក់កាលរហូតដល់ដំណាច់ឆ្នាំ ២០២៤ សម្រាប់ក្រុមហ៊ុន​អភិវឌ្ឍន៍​លំនៅឋានជាបុរី។ បង្កើនរយៈពេល​នៃការបង់ពន្ធជាកញ្ចប់តាមដំណាក់កាលពី ១២ ខែ ដល់ ១៨ ខែ​ សម្រាប់ក្រុមហ៊ុន​អភិវឌ្ឍន៍លំនៅ​ឋានជាបុរី ដែល​បង់ពន្ធតិចជាង ១ លានដុល្លារអាមេរិក និងពី ២៤ ខែ ដល់ ៣៦ ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរីដែលបង់ពន្ធលើសពី ១ លានដុល្លារអាមេរិក។

បន្តពន្យារពេលការអនុវត្តពន្ធលើចំណេញមូលធនសម្រាប់តែវិស័យអចលនទ្រព្យរហូតដល់ដំណាច់ឆ្នាំ ២០២៤។ បន្តការលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់លំនៅឋានគ្រប់ប្រភេទ ដែលមាន​លក្ខណៈជាបុរីដែលមានតម្លៃក្រោម ឬស្មើ ៧ ម៉ឺនដុល្លារអាមេរិក រហូតដល់ដំណាច់ឆ្នាំ ២០២៤ និង​រួមទាំង​លើកទឹកចិត្តនិងស្នើឱ្យគ្រឹះស្ថានធនាគារ និងហិរញ្ញវត្ថុធ្វើការរៀបចំឥណទានឡើងវិញតាមលទ្ធភាព​ជាក់ស្ដែង៕

អត្ថបទ៖ ឡេង ដេត