សាច់មាន់បង្កកជាង ២តោន ត្រូវបានកម្ទេចចោល​ក្រោយរកឃើញថា​ពុំមានការវេចខ្ចប់ត្រឹមត្រូវ

អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ក ប ប ខេត្តតាកែវ បានសហការជាមួយមន្រ្តីជំនាញគយ និងរដ្ឋាករ បានដកហូតសាច់មាន់បង្កកប្រមាណ ៥០កេស គ្មានរកឃើញថា គ្មានការវេចខ្ចប់បានត្រឹមត្រូវ នាំឱ្យខូចគុណភាព។

តាមរយៈផេកផ្លូវការរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានបញ្ជាក់ថា មន្រ្តីជំនាញ ក.ប.ប. សាខាខេត្តតាកែវ ដោយមានកិច្ចសហការជាមួយមន្រ្តីជំនាញ គយនិងរដ្ឋាករ​ច្រកទ្វារភ្នំដិន និងអមដំណើរដោយរថយន្តមន្ទីរពិសោធន៍ចល័តម្ហូបអាហារបានចុះ​ត្រួតពិនិត្យទៅលើសាច់​មាន់បង្កកដែលនាំចូលមកពីបរទេសតាមច្រកទ្វាភ្នំដិនចំនួន ៥០កេស ដែលក្នុង ១កេសមានទម្ងន់ ៥០គីឡូក្រាម។

បើតាម ក ប ប គោលបំណងនៃការត្រួតពិនិត្យគឺដើម្បីស្វែងរកសារធាតុគីមីដែលនាំឱ្យប៉ះពាល់ដល់សុខភាព​អ្នកប្រើប្រាស់របស់ពលរដ្ឋ ដែលអាចមាននៅក្នុងផលិតផលសាច់មាន់បង្កក និងការវេចខ្ចប់​ពុំសមស្រប​តាមលក្ខណៈបច្ចេកទេសក៏ជាហេតុនាំឱ្យខូចគុណភាពផងដែរ។

មន្រ្តីជំនាញបានបញ្ជាក់ថា តាមលទ្ធផលនៃការត្រួតពិនិត្យ និងរបាយការណ៍របស់មន្រ្តីជំនាញគឺបានរកឃើញថា ពុំមានសារធាតុគីមីហាមឃាត់ទេ ក៏ប៉ុន្តែសាច់មានបង្កកទាំងអស់ ៥០កេសនោះពុំបានវេចខ្ចប់ត្រឹមត្រូវតាមលក្ខណៈ​ស្ដង់ដារបច្ចេកទេសនោះទេ ដូច្នេះមន្រ្តីជំនាញបានធ្វើការដកហូត ដើម្បីកម្ទេចចោលជៀសវាង​មានផលប៉ះពាល់​ដល់សុខភាពអ្នកប្រើប្រាស់៕