ក្រុមគ្រូពេទ្យ TYTA ព្យាបាល​ជំងឺប្រជាពលរដ្ឋស្រុកស្រីសន្ធរ ជាង ៣ ពាន់នាក់ ដោយឥតថ្លៃ​​

នៅព្រឹកថ្ងៃទី២០ ខែឧសភា ឆ្នាំ២០២៣ ក្រុមគ្រូពេទ្យស្ម័គ្រចិត្តយុវជនសម្តេចតេជោ (TYTA) បាន​ចុះពិនិត្យ​ព្យាបាល​ជំងឺទូទៅ​ ជូនប្រជាពលរដ្ឋ ជាង ៣ ពាន់នាក់ ដោយឥតថ្លៃ​ក្នុងស្រុកស្រីសន្ធរ​ ខេត្តកំពង់ចាម​។

ក្រុមគ្រូពេទ្យស្ម័គ្រចិត្តយុវជនសម្តេចតេជោ (TYTA)​ បានចុះពិនិត្យព្យាបាលជំងឺទូទៅដូចជា៖​ ជំងឺមាត់ធ្មេញ ពិនិត្យអេកូ និងរោគស្រ្តី ជំងឺបេះដូង ពិនិត្យជំងឺភ្នែក វះកាត់តូច ជំងឺឫសដូងបាត ជំងឺសន្លាក់ ជំងឺសើស្បែក ជំងឺត្រចៀក ច្រមុះ បំពង់ក ថត X-Ray ពិនិត្យឈាម និងបញ្ជូនទៅព្យាបាលបន្តក្នុងករណីមានជំងឺធ្ងន់ធ្ងរ​។

ជាលទ្ធផល ក្រុមគ្រូពេទ្យបានពិនិត្យ និងព្យាបាលជំងឺជូនប្រជាពលរដ្ឋ​ នៅ​ក្នុងស្រុកស្រីសន្ធរ​ បានចំនួ​ន ៣ ០២០ នាក់ ស្មេីនឹង ៥ ៨១៣ ករណី។

វេជ្ជបណ្ឌិត​ ស៊ូ ស៊ីផាណ្ណា ​តំណាងលោកជំទាវបណ្ឌិត ពេជ ចន្ទមុន្នី អនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA)​ បានឡេីងថា​ កាយវិការមនុស្សធម៌របស់សមាគមគ្រូពេទ្យស្ម័គ្រចិត្តយុវជនសម្តេចតេជោ​ ពិតជាមានការចូលរួមសកម្មក្នុងការជួយលេីកកម្ពស់សុខមាលភាព​ របស់ពលរដ្ឋតាមមូលដ្ឋាន។

គួរបញ្ជាក់ថា ការពិនិត្យព្យាបាលនេះ មានការចូលរួមពី​ វេជ្ជបណ្ឌិត​ ស៊ូ ស៊ីផាណ្ណា ជានាយកប្រតិបត្តិសមាគមប្រធានប្រតិបត្តិ​ TYTA ​​និង​ លោក លូ គឹមឈន់ ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្រីសន្ធរ ព្រមទាំង លោក ហេង វណ្ណនី អភិបាលរង អភិបាលរងខេត្ត តំណាង​​ អភិបាលខេត្តកំពង់ចាម និង លោក​ ឈួន​  វិន​ រដ្ឋលេខាធិការក្រសួងសាធារណៈការ និងដឹកជញ្ជូន​ និងជាប្រធានជនបង្គោលយុវជនចុះជួយស្រុកស្រីសន្ធរ​ដោយមានក្រុមគ្រូពេទ្យចូលរួម ២៧៨រូប បានពិនិត្យព្យាបាលជំងឺជូនប្រជាពលរដ្ឋ។

អត្ថបទ ​និង​រូបភាព​៖​ ឡេក ​ចាន់ពេជ្រ​