សំរាម​ក្នុង​ក្រុង​កំពត​មួយ​ថ្ងៃ​មាន​ពី ១០០ តោនទៅ ១៤០ តោន

លោក នៃ គង់ អភិបាលរងខេត្តកំពតបាន​ឲ្យ​ដឹង​ថា ខេត្ត​កំពត​មាន​តំបន់ទេសចរណ៍ស្អាតហើយទាក់ទាញ ៣៤ កន្លែង​ដែលមានភ្ញៀវទេសចរចូលមកលេងកម្សាន្តក្នុង ១ សប្តាហ៍​ពី ២៥ ០០០ នាក់ទៅ ៣៥ ០០០ នាក់។ ដោយ​ឡែកដោយសា​ការ​អភិវឌ្ឍរួម​ទាំង​កំណើន​ទេសចរ​ ក្រុង​កំពត​​​​ក្នុង​មួយ​ថ្ងៃ​មានសំរាមដែល​ត្រូវ​ប្រមូលចន្លោះ ១០០ តោនទៅ ១៤០ តោន។

លោក​បាន​លើកឡើងថា ប្រព័ន្ធអេកូឡូស៊ីមានសារៈសំខាន់ណាស់សម្រាប់ទ្រទ្រង់ជីវិតមនុស្ស សត្វ ហើយដោយសារកំណើនមនុស្ស កំណើនការប្រើប្រាស់ធនធានធម្មជាតិ បានធ្វើឲ្យប៉ះពាល់យ៉ាងខ្លាំងដល់ប្រព័ន្ធអេកូឡូស៊ី។ ដោយសារកំណើនប្រជាពលរដ្ឋរាល់ឆ្នាំៗ ការអភិវឌ្ឍន៍សេដ្ឋកិច្ចលឿនពេក និងការបោះចោលសំណល់​​ប្លាស្ទិកពាសវាលពាសកាលទើបតម្រូវឱ្យមាន “ការស្ដារឡើងវិញប្រព័ន្ធអេកូឡូស៊ីឡើងវិញ”។

លោក អេង ប៉ូឡូ ប្រធានមន្ទីរបរិស្ថានខេត្តកំពតបានបញ្ជាក់ឱ្យដឹងថា ខ្យល់ដែលយើងអាចដកបានដោយសារតែការរក្សាបាននូវប្រព័ន្ធអេកូឡូស៊ី ធ្វើធនធានព្រៃឈើមានសំណើមជានិច្ច ធ្វើខ្យល់បរិសុទ្ធទប់ស្កាត់ការហូរច្រោះដី ទប់ស្កាត់ការប្រែប្រួលអាកាសធាតុ ទប់ស្កាត់ការបំភាយឧស្ម័នផ្ទះកញ្ចក់ រក្សាបាននូវលំនឹងបរិស្ថាន។

លោកក៏​ស្នើដល់ប្រជាពលរដ្ឋ និងគ្រប់ភាគីពាក់ព័ន្ធទាំងអស់គ្នា ត្រូវបន្តចូលរួមឲ្យបានសកម្មថែមទៀត លើការងាររៀបចំ​គ្រប់គ្រង និងទុកដាក់កាកសំណល់រឹងរាវឱ្យបានត្រឹមត្រូវនៅតាមគេហដ្ឋាន ក៏ដូចជាតាមទីធ្លាសាធារណៈ និងទីប្រជុំជន​។ ជាមួយគ្នានេះអាជ្ញាធរមូលដ្ឋាន ភូមិ ឃុំ សង្កាត់ ស្រុក ក្រុងទាំងអស់ ត្រូវបង្កើតចលនាគ្រប់គ្រងបរិស្ថាន នៅតំបន់គោលដៅរបស់ខ្លួនឲ្យបានម៉ត់ចត់៕

អត្ថបទ៖ សឹង រ៉ាត់