អ្នកសារព័ត៌មានប្រមាណ ៨០០នាក់ហើយ ត្រូវបាន គ.ជ.ប សម្រេចផ្ដល់បណ្ណសម្គាល់ចូលរួមយកព័ត៌មាន  

គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចផ្ដល់បណ្ណសម្គាល់ជាផ្លូវការជូនអ្នកសារព័ត៌មានជាតិ-អន្តរជាតិ ប្រមាណ ៨០០នាក់ហើយ ដើម្បីចូលរួមយកព័ត៌មានក្នុងដំណើរការបោះឆ្នោតជ្រើសតាំង តំណាងរាស្រ្ដ នីតិកាលទី ៧ ឆ្នាំ ២០២៣នេះ។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប បានឲ្យដឹងនៅព្រឹកថ្ងៃទី ២១ ខែមិថុនា ឆ្នាំ ២០២៣ នេះថា គិតត្រឹមថ្ងៃទី ១៨ ខែមិថុនា ឆ្នាំ ២០២៣ គ.ជ.ប បានផ្ដល់បណ្ណសម្គាល់ខ្លួនជាផ្លូវការជូនអ្នកសារព័ត៌មានជាតិ និងអន្តរជាតិ ចូលរួមយកព័ត៌មានក្នុងដំណើរការបោះឆ្នោតជ្រើសតាំង តំណាងរាស្រ្ដ នីតិកាលទី ៧ ចំនួន ៨០៣នាក់។

លោក សោម សូរីដា បានឲ្យដឹងបន្តថា សម្រាប់អ្នកសារព័ត៌មានជាតិ គ.ជ.ប សម្រេចផ្ដល់បណ្ណសម្គាល់ជាផ្លូវការចំនួន ៧៤២នាក់។ ចំណែកអ្នកសារព័ត៌មានអន្តរជាតិ គ.ជ.ប សម្រេចផ្ដល់បណ្ណសម្គាល់ជាផ្លូវការចំនួន ៦១នាក់។ ក្នុងនោះដែរ គ.ជ.ប កំពុងពិនិត្យលើពាក្យស្នើសុំរបស់អ្នកសារព័ត៌មានជាតិ-អន្តរជាតិចំនួន ១៨នាក់ផងដែរ។

សូមជម្រាបថា ការទទួលពាក្យសុំចុះឈ្មោះជាអ្នកសារព័ត៌មានជាតិ ចាប់ពីថ្ងៃទី ១ ខែមេសា ដល់ថ្ងៃទី ១២ ខែកក្កដា ឆ្នាំ ២០២៣។ រីឯការទទួលពាក្យសុំចុះឈ្មោះជាអ្នកសារព័ត៌មានអន្តរជាតិ ចាប់ពីថ្ងៃទី ១ មេសា ដល់ថ្ងៃទី ១៩ ខែកក្កដា ឆ្នាំ ២០២៣។

ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នឹងប្រព្រឹត្តទៅនៅថ្ងៃទី ២៣ ខែកក្កដា ឆ្នាំ ២០២៣។ ការបោះឆ្នោតថ្នាក់ជាតិលើកទី ៧នេះ មានគណបក្សនយោបាយចំនួន ១៨ ចូលរួមប្រកួតប្រជែង ស្វែងរកការគាំទ្រពីប្រជាពលរដ្ឋម្ចាស់ឆ្នោត៕