កងវិស្វកម្មបញ្ជាគ្រឿងចក្រកាយផ្លូវទឹកបង្ហូរទឹកចេញពី​ភូមិ​រុនតាឯក ដែល​រង​ការ​ជន់លិច

ក្រោយពីទទួលបានព័ត៌មានតាមបណ្តាញសង្គម ដែលប្រជាពលរដ្ឋបានបង្ហោះរូបភាពទឹកលិចភូមិដ្ឋានប្រជាពលរដ្ឋ ដែលបានស្ម័ត្រចិត្តរុះរើលំនៅដ្ឋានចេញពីតំបន់រមណីយដ្ឋានអង្គរទៅរស់នៅតំបន់អភិវឌ្ឍន៍រុនតាឯក ស្ថិតនៅក្នុងឃុំ រុនតាឯក ស្រុកបន្ទាយស្រី ខេត្តសៀមរាប ដោយសារមានភ្លៀងធ្លាក់ជាប់ៗគ្នាប៉ុន្មានថ្ងៃមកនេះ។

នៅថ្ងៃទី២៦ កក្កដា កម្ពុជាថ្មីបានទៅដល់ទីតាំងភូមិដ្ឋានរបស់បងប្អូននៅភូមិអភិវឌ្ឍន៍រុនតាឯក ដែលរដ្ឋបាន​បែងចែក​ដីឡូត៌មានទំហំ ២០ម៉ែត្រ គុណ ៣០ម៉ែត្រនោះ ធ្វើជាកម្មសិទ្ធិផ្ទាល់ខ្លួនស្របច្បាប់។

ជាក់ស្តែងរាល់ពេលដែលមានភ្លៀងធ្លាក់ជាប់ៗគ្នា គឺតែងតែមានការលិច ឬ ដក់​ទឹកនៅតាមដីទីទំនាបដោយសារ​ប្រព័ន្ធចរន្តទឹកហូរតាមប្រឡាយហូរមិនទាន់ ហើយ​ណាមួយដោយសារក្រុមការងាររៀបចំហេដ្ឋារចនាសម្ព័ន្ធផ្លូវថ្នល់ និង ដាក់ប្រព័ន្ធលូនៅមិនទាន់រួចរាល់។ យ៉ាងណាមិញ​ កម្លាំងកងវិស្វកម្មក៏បានបញ្ជាគ្រឿងចក្រដើម្បីជួយអន្តរាគមន៍ភ្លាមៗដែរ ក្នុង​គោលបំណងបើកផ្លូវទឹកឲ្យចរន្តទឹកហូរបានលឿនបញ្ចៀស​ការ​លិចលង់​បន្តទៅទៀតនៅតាមតំបន់មួយចំនួន។

ពលរដ្ឋម្នាក់​ដែលបានស្ម័ត្រចិត្តចាកចេញពីតំបន់រមណីយដ្ឋានអង្គរ (មកពីភូមិខ្វៀន) និង​បានរស់នៅតំបន់អភិវឌ្ឍន៍រុនតាឯកបានឲ្យដឹងថា ករណីទឹកលិចភូមិដ្ឋានរបស់បងប្អូននៅតំបន់នេះ ច្រើនតែលិចផ្ទះដែលមាន​ដីឡូត៌​នៅក្នុងទំនាបកណ្តាល។ ចំពោះដីឡូត៌នៅតាមដងផ្លូវធំៗមិនរងការលិចលង់អ្វីឡើយ។

ស្រ្តី​រូប​នេះ​បានបន្តទៀតថា នៅពេលមានភ្លៀងធ្លាក់ខ្លាំងជាប់ៗគ្នារាល់ថ្ងៃ ធ្វើឲ្យតំបន់មួយចំនួនលិចរយៈពេលមួយអាទិត្យក៏មាន កន្លែងខ្លះពីរថ្ងៃ កន្លែងខ្លះទៀតតែមួយយប់ក៏ស្រកអស់។ ករណីទាំងនេះ​បណ្តាលមកពីមិនទាន់មានប្រព័ន្ធលូទឹកបង្ហូរចេញគ្រប់គ្រាន់ ដែលអាជ្ញាធរបានកំពុងរៀបចំនៅឡើយ៕

អត្ថបទ៖ គឿនវេត