បញ្ចប់យុទ្ធនាការផ្តល់បណ្ណសមធម៌​ជូន​ពលរដ្ឋ​ ៤២២៩​ គ្រួសារ ស្ម័គ្រចិត្ត​ទៅ​រស់នៅ​ភូមិ​ធម្មជាតិ​រុនតាឯក

ក្រសួងផែនការបានបិទបញ្ចប់យុទ្ធនាការផ្តល់បណ្ណសមធម៌ជូនពលរដ្ឋចំនួន ៤២២៩ គ្រួសាររស់នៅរមណីយដ្ឋានអង្គរដែលបានស្ម័គ្រចិត្តទៅរស់នៅភូមិធម្មជាតិរុនតាឯកនៅថ្ងៃទី០៩តុលាឆ្នាំ២០២២នេះ។

លោក ថេង បញ្ញាធន ប្រតិភូរាជរដ្ឋាភិបាលកម្ពុជាទទួលបន្ទុកអគ្គនាយកផែនការនៃក្រសួងផែនការបានមានប្រសាសន៍នៅព្រឹកថ្ងៃទី០៩តុលានេះថា យុទ្ធនាការផ្តល់បណ្ណសមធម៌ជូនពលរដ្ឋចំនួន ៤២២៩គ្រួសារ ដែលស្ម័គ្រចិត្តទៅរស់នៅភូមិធម្មជាតិរុនតាឯក តាមការសម្រេចរបស់សម្តេចតេជោដែលបានអនុវត្តកាលពីថ្ងៃទី ០៦តុលា បានបិទបញ្ចប់នៅថ្ងៃទី ០៩ តុលា​នេះ បន្ទាប់ពីក្រុមការងារក្រសួងបានផ្តល់បណ្ណសមធម៌ជួនដល់ប្រជាពលរដ្ឋចំនួន ៤២២៩គ្រួសារបានចប់សព្វគ្រប់រួចមក។

កាលពីវេលាម៉ោងជិតរំលងអាធ្រាត្រថ្ងៃទី០៨ ឈានចូលថ្ងៃទី០៩ ខែតុលា ឆ្នាំ២០២២ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចារលើរបាយការណ៍របស់លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ដោយណែនាំឱ្យប្រញាប់រៀបចំផ្តល់បណ្ណក្រីក្រជូនប្រជាពលរដ្ឋទាំងអស់ ដែលបានស្ម័គ្រចិត្តរើលំនៅឋានចេញពីតំបន់រមណីយដ្ឋានអង្គរ និងតំបន់ស្ថិតក្រោមការគ្រប់គ្រងរបស់អាជ្ញាធរអប្សរា។

សម្តេចតេជោនាយករដ្ឋមន្ត្រី បានបញ្ជាក់ថា រាល់ប្រជាពលរដ្ឋស្ម័គ្រចិត្តរើលំនៅឋាននេះ គឺត្រូវផ្តល់បណ្ណក្រីក្រ​ប្រភេទ​ទី១ទាំងអស់ ហើយផ្តល់ប្រាក់ឧបត្ថម្ភតាមអត្រាអ្នករស់នៅទីប្រជុំជន។

បើតាមរបាយការណ៍របស់លោក វង សូត អត្រាផ្តល់ប្រាក់ឧបត្ថម្ភសម្រាប់អ្នករស់នៅទីប្រជុំជននេះ ក្នុងមួយគ្រួសារទទួលបានប្រាក់ ១២ម៉ឺនរៀល, សមាជិកក្នុងគ្រួសារម្នាក់ ទទួលបាន ៤ម៉ឺនរៀល, សមាជិកជាកុមារអាយុពី​ ០ទៅ៥ឆ្នាំក្នុងម្នាក់ ទទួលបាន ៤ម៉ឺនរៀល, សមាជិកជាជនមានពិការភាពក្នុងម្នាក់ ទទួលបាន ៤ម៉ឺនរៀល, សមាជិកជាមនុស្សចាស់ចាប់ពីអាយុ ៦០ឆ្នាំឡើងទៅ ក្នុងម្នាក់ ទទួលបាន ៤ម៉ឺនរៀល និងគ្រួសារមានអ្នកផ្ទុកមេរោគអេដស៍ក្នុងម្នាក់ ទទួលបាន ៤ម៉ឺនរៀលផងដែរ។

លោក ថេង បញ្ញាធន បានបន្តទៀតថា « តាមការបញ្ជាក់របស់សម្តេចគឺច្បាស់ណាស់កន្លែងហ្នឹងគឺថាប្រជាពលរដ្ឋដែលស្ម័គ្រចិត្តទៅរស់នៅភូមិធម្មជាតិរុនតាឯកប្រសិនបើអ្នកហ្នឹងអត់ទាន់មានបណ្ណសមធម៌ថ្មីទេទើបទទួលបណ្ណថ្មីពីខាងខ្ញុំក្រសួងផែនការគឺពេលទទួលបានបណ្ណគាត់ចុះបញ្ជីនឹងទទួលបានថវិកាភ្លាមតែម្តង។រីឯប្រជាជនដែលមានបណ្ណសមធម៌រួចហើយអាចបើកបានជារៀងរាល់ខែនៅថ្ងៃទី២៥។ជាកស្តែងសម្រាប់ខែនេះអាចបើកបាននៅថ្ងៃទិ២៥តុលា»។

លោក ថេង បញ្ញាធន បានបញ្ជាក់ថាចាប់ពីថ្ងៃទី២៥ខែមិថុនាឆ្នាំ២០២០មករហូតមកដល់បច្ចុប្បន្ននេះរាជរដ្ឋាភិបាលបានផ្តល់ប្រាក់ឧបត្ថកម្ភដល់គ្រួសារក្រីក្រប្រមាណ៧០ម៉ឺនគ្រួសារស្មើនឹង២លាន៨សែននាក់។ចំនួននេះមិនរាប់បញ្ចូលប្រជាពលរដ្ឋចំនួន៤២២៩គ្រួសារដែលស្ម័គ្រចិត្តទៅរស់នៅភូមិធម្មជាតិរុនតាឯកនោះទេ៕

អត្ថបទ៖ សំអឿន