ក្រសួងសង្គមកិច្ច ចាត់ទុកការលើកឡើងរបស់បក្សកម្លាំងជាតិ ជាការកេងចំណេញខាងនយោបាយ

អ្នកនាំពាក្យរបស់ក្រសួងសង្គមកិច្ច នៅរសៀលថ្ងៃទី២ ខែកុម្ភៈ​ នេះ បានទាត់ចោលសេចក្ដីថ្លែងការណ៍របស់គណបក្សកម្លាំងជាតិជុំវិញរឿងថវិការប័ណ្ណក្រីក្រនៅតំបន់រុនតាឯក ដោយចាត់ទុកជាការកេងចំណេញខាងនយោបាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណ៍ចេញមកទាត់ចោលនេះ គឺនៅក្រោយពេលដែល គណបក្សកម្លាំងជាតិ បានចេញសេចក្តីថ្លែងការណ៍ ពាក់ព័ន្ធទៅនឹងការផ្ទុះឡើងនូវការតវ៉ារបស់ពលរដ្ឋរស់នៅតំបន់រុនតាឯកពាក់ព័ន្ធថវិកាប័ណ្ណក្រីក្រដែល ផ្តល់ជូនដោយរាជរដ្ឋាភិបាលតាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា។

ទាក់ទងនឹងបញ្ហានេះ អ្នកនាំពាក្យបានអះអាងថា រាជរដ្ឋាភិបាលបាននិងកំពុងចាត់វិធានការណ៍ដោះស្រាយជូនពលរដ្ឋទៅតាមគោលការណ៍ និងនីតិវិធី ដោយធ្វើយ៉ាងណាមិនឱ្យបាត់បង់ផលប្រយោជន៍របស់ពលរដ្ឋនៅតំបន់រុនតាឯកឡើយ។

អ្នកនាំពាក្យក្រសួងសង្គមកិច្ច ក៏បានអំពាវនាវឱ្យពលរដ្ឋរក្សាភាពស្ងប់ស្ងាត់ នឹងនរ ហើយជឿទុកចិត្ត លើការដឹកនាំរបស់រាជរដ្ឋាភិបាលកម្ពុជា។ អ្នកនាំពាក្យបានអះអាងថា រាជរដ្ឋាភិបាលកម្ពុជា មិនទុកឱ្យពលរដ្ឋដែលជួបការលំបាកចោល ដោយមិនបានដោះស្រាយនោះឡើយ។

អ្នកនាំពាក្យក្រសួងសង្គមកិច្ច បាត់ចាត់ទុកការលើកឡើងនៅក្នុងសេចក្តីថ្លែងការណ៍របស់គណៈបក្សកម្លាំងជាតិ ថាគ្រាន់តែជាការកេងចំណេញខាងនយោបាយតែប៉ុណ្ណោះ ធាតុពិតគណៈបក្សកម្លាំងជាតិ គ្មានសមត្ថភាព និងគ្មានលទ្ធភាព ដោះស្រាយបញ្ហាទាំងអស់នេះជូនពលរដ្ឋឡើយ៕

ដោយ៖ ង៉ិល ណារ៉ាត់