ពិព័រណ៍យានយន្តអគ្គិសនី ថ្ងៃសុក្រ ​សប្តាហ៍នេះ ជា​ឱកាសសាកល្បងផលិតផល​ក្រុមហ៊ុន ដោយសេរី

ពិព័រណ៍យានយន្តអគ្គិសនីឆ្នាំ២០២៣ នឹងរៀបចំឡើងនៅថ្ងៃសុក្រ ​សប្តាហ៍នេះ ពោល តែ១ថ្ងៃប៉ុណ្ណោះ ដោយមានការចូលរួមពី វិទ្យាស្ថានបច្ចេកវិទ្យាកម្ពុជា និងក្រុមហ៊ុនចំនួន១៥ ក្នុងគោលបំណងពង្រីងការយល់ដឹងឱ្យកាន់តែច្រើន ស្តីពីការអភិវឌ្ឍនអគ្គិសនីចល័ត តាមរយៈសកម្មភាពជាច្រើន។ ម៉្យាង គឺដើម្បីបើកឱកាសដល់សាធារណជន អាចសាកល្បងផលិតផលរបស់ក្រុមហ៊ុនទាំងនោះ បានដោយផ្ទាល់ ដោយក្រុមហ៊ុនជាអ្នកសម្រេចថាតើ លក្ខខណ្ឌណាខ្លះ អាចបើកសាកល្បងបាន។

បើតាមការភ្នាក់ងាររៀបចំ ពិព័រណ៍យានយន្តអគ្គិសនីឆ្នាំ២០២៣ Electric Mobility Showcase (EMS) បញ្ជាក់ថា សាធារណជន មិនថាសិស្សនិស្សិត អ្នកធ្វើការ ឬអ្នកប្រកបរបរអ្វីឡើយ អាចចូលរួមដោយសេរី ចាប់ពីម៉ោង ៩:00 ព្រឹក ដល់ ៥:00 ល្ងាច នាថ្ងៃសុក្រ ទី១១ ខែសីហា ឆ្នាំ២០២៣ ខាងមុខនេះ នៅទីតាំង វិទ្យាស្ថានបច្ចេកវិទ្យាកម្ពុជា (ITC)។

គូសបញ្ជាក់ដែរថា ការតាំងពិពណ៌នេះ គឺរួមបញ្ចូលសកម្មភាពសំខាន់ៗមួយចំនួន ដោយមានការបើកបរសាកល្បង ការធ្វើបទបង្ហាញពីប្រធានបទរថយន្តអគ្គិសនី ការកែច្នៃថ្ម ការប្រកួតប្រជែង និងឱកាសនៅការបង្កើនផលិតកម្ម។ ក្រៅពីនេះ នៅមានបទបង្ហាញខ្លីស្តីពីប្រវត្តិ និងការវិវត្តន៍នៃយានជំនិះអគ្គិសនី បន្តពិភាក្សាអំពីស្ថានភាពបច្ចុប្បន្ននៃការអនុម័ត និងនិន្នាការដែលកំពុងរីកចម្រើន។

ជាមួយគ្នានេះ សាធារណជនដែលចូលរួម ក្រៅពីអាចស្វែងយល់អំពីការវិវត្តថ្មីៗ នៃបច្ចេកវិទ្យាយានយន្តអគ្គិសនីហើយ គឺមានឱកាសភ្ជាប់ទំនាក់ទំនងជាមួយបុគ្គលសំខាន់ៗក្នុងវិស័យនេះផងដែរ។

គួរបញ្ជាក់ថា ពិព័រណ៍យានយន្តអគ្គិសនីនៅកម្ពុជា ផ្តើមរៀបចំឡើងចាប់តាំងពីឆ្នាំ២០១៩ ដោយនៅឆ្នាំ២០២១ សហការជាមួយក្រសួងបរិស្ថាន, ឆ្នាំ២០២២ ធ្វើនៅ factory phnom penh និងឆ្នាំ២០២៣ ធ្វើនៅវិទ្យាស្ថានបច្ចេកវិទ្យាកម្ពុជា។ ជុំវិញនៃការចូលរួមនេះដែរ គឺតម្រូវឱ្យសាធារណជន ដែលមានបំណងចង់ចូលរួម ត្រូវចុះឈ្មោះជាមុនសិន តាមរយៈលីងរបស់ EnergyLab Cambodia ៕

អត្ថបទដោយ៖ សុធាវី