អ្នកជិះកង់រៃអង្គាសថវិកាដើម្បីកុមារកម្ពុជា នឹងមកដល់គោលដៅមន្ទីរពេទ្យកុមារអង្គរ ចុងសប្តាហ៍នេះ

តាមរយៈការជិះកង់តាមតំបន់ភូមិភាគអាស៊ីអាគ្នេយ៍ ដើម្បីរៃអង្គាសប្រាក់ជួយកុមារកម្ពុជា ក្នុងដំណើរជាង ៩០០០ គីឡូម៉ែត្រ លោក ទីវ តារារិទ្ធ បានឆ្លងកាត់ប្រទេសមួយចំនួនក្នុងតំបន់អាស៊ី និងឧបសគ្គរាប់មិនអស់ ទើបមកដល់ខេត្តកោះកុង ទឹកដី​នៃ​កម្ពុជាវិញ​នៅ​ប៉ុន្មាន​ថ្ងៃមុននេះ។ ដំណើរបេសកកម្មនេះ នៅសល់តែ​ប្រមាណ ៤៥០គីឡូម៉ែត​ទៀតប៉ុណ្ណោះ លោកនឹងទៅ​ដល់គោលដៅ «មន្ទីពេទ្យកុមារអង្គរសៀមរាប» ដែលលោកគ្រោងបញ្ចប់​នៅថ្ងៃសៅរ៍ ទី២៦ ខែសីហា ខាងមុខនេះ។

សម្រាប់ដំណើរបេសកកម្មជិះកង់រៃអង្គាសថវិកាជូនមន្ទីរពេទ្យកុមារអង្គរ យុវជនរូបនេះ បានឆ្លងកាត់ឧបសគ្គជាច្រើន​ ទម្រាំ​បាន​វិលកង់មកដល់ទឹកដីនៃកម្ពុជាវិញ ដែលប្រើពេលអស់ជាង២ខែ ពោលគឺចាប់ពីថ្ងៃទី០១ ខែមិថុនាមក។
កោះកុង ជាខេត្តទី១ ក្នុងដំណើរវិលជុំរបស់លោក​មកកាន់កម្ពុជាវិញ និងទទួលបានការស្វាគមន៍យ៉ាងកក់ក្តៅពីលោកជំទាវ មិថុនា ភូថង និងក្រុមការងារសហភាពសហព័ន្ធយុវជនកម្ពុជា ខេត្តកោះកុង។ ក្នុងនោះ លោកក៏ទទួលបានការបរិច្ចាគថវិកា សរុប ២,៨០០,០០០ រៀល ពីលោកជំទាវ និងសាធារណជន នៅខេត្តកោះកុងផងដែរ។

លោក ទីវ តារារិទ្ធ ក្នុងនាមជាអ្នកបំពេញបេសកកម្ម «កម្មវិធីជិះកង់សប្បុរសធម៌» បានឱ្យដឹងថា ថ្ងៃនេះ លោកចាប់ផ្តើម ជិះកង់ចេញពីខេត្តកោះកុង ដោយបន្តដំណើរកាត់តំបន់មួយចំនួនដូចជា ស្រុកវាលវែង ខេត្តបាត់ដំបង ខេត្តបន្ទាយមានជ័យ ដើម្បីទៅដល់គោលដៅចុងក្រោយរបស់លោក ដែលស្ថិតនៅក្នុងខេត្តសៀមរាប ឱ្យបានទាន់ពេលកំណត់។ លោកថា “ខ្ញុំនឹងជិះកង់ទៅដល់ខេត្តសៀមរាប នៅថ្ងៃសៅរ៍ ទី២៦ សប្តាហ៍នេះ ហើយបិទកម្មវិធីជិះកង់ដើម្បីកុមារកម្ពុជា នឹងប្រារព្ធនៅមុខមន្ទីពេទ្យកុមារអង្គរសៀមរាប Angkor Hospital for Children នៅថ្ងៃអាទិត្យ ទី២៧” ។

បើតាមលោក ទីវ តារារិទ្ធ កត្តា​ដែលជំរុញលោក ក្នុងការធ្វើដំណើរដោយជិះកង់ ដើម្បីរៃអង្គាសប្រាក់ជួយដល់កុមារកម្ពុជា នៅមន្ទីពេទ្យ គឺផ្តើមចេញពីទឹកចិត្តចង់ចូលរួមចំណែកជួយដល់សង្គមជាតិ ជាពិសេសកុមារកម្ពុជា។ លោកបានរៀបរាប់ ឱ្យដឹងថា លោកបានចាប់ផ្តើមធ្វើដំណើរដោយជិះកង់ ចាប់តាំងពីឆ្នាំ ២០១៧ និងបានទៅកន្លែង​ជាច្រើនក្នុងប្រទេស​កម្ពុជា ស្ទើរតែគ្រប់ទីកន្លែងពេញផ្ទៃប្រទេស” ។ លោកបន្តថា លោកបានមើលឃើញភាពស្រស់ស្អាត នៃធនធានធម្មជាតិ ទេសភាពដ៏ស្រស់ត្រកាល នៃមាតុភូមិមួយនេះ និងបានឃើញពីស្ថានភាពជាក់ស្តែង នៃស្ថានភាពកុមារកម្ពុជា ជីវភាព និងការរស់នៅរបស់ពួកគាត់ផងដែរ។

លោកបន្ថែមថា ដោយសារតែកម្ពុជា នៅតែជាប្រទេសកំពុងអភិវឌ្ឍន៍ ដោយវិស័យសុខាភិបាលរបស់យើងនៅខ្សោយ មន្ទីរពេទ្យ សម្រាប់កុមារ គឺមានចំនួនតិចណាស់ ហើយមន្ទីរពេទ្យកុមារទាំងនោះ សុទ្ធតែបើកដំណើរការដោយមានជំនួយ ពីឯកជន និងបរទេសទៅទៀត។ ដោយសារតែបែបនេះ នៅពេលដែលខាងមន្ទីរពេទ្យទាក់ទងលោក ស្របពេលលោក គ្រោងធ្វើដំណើរដោយកង់ តាមតំបន់ភូមិភាគអាស៊ីអាគ្នេយ៍ លោកបានសម្រេចយ៉ាងលឿន ដោយបង្កើតកម្មវិធីជិះកង់ នេះឡើង។ ម៉្យាង លោកក៏មានបំណងប្រាថ្នាចង់ចូលរួមចំណែកជួយដល់សង្គមជាតិមួយនេះ ជាពិសេសកុមារកម្ពុជា ហើយវាគឺជាសេចក្តីសុខមួយរបស់ខ្ញុំ ដែលចង់ធ្វើដំណើរទៅកន្លែងជាច្រើន និងជួបមនុស្សជាច្រើននៅខាងក្រៅផ្ទះ”។

គួររំលឹកថា កម្មវិធីជិះកង់តាមតំបន់ភូមិភាគអាស៊ីអាគ្នេយ៍នេះ ធ្វើឡើងក្នុងគោលបំណង ដើម្បីរៃអង្គាសប្រាក់ជួយកុមារ កម្ពុជា ដែលមានជំងឺមហារីក និងជំងឺផ្សេងៗ កំពុងសម្រាកព្យាបាល និងមានតម្រូវការព្យាបាល នៅមន្ទីពេទ្យកុមារអង្គរ Angkor Hospital for Children ។ គិតមកដល់ពេលនេះ ការជិះកង់ដើម្បីរៃអង្គាសប្រាក់ជួយកុមារកម្ពុជា របស់លោក ទីវ តារារិទ្ធ មានរយៈពេលជាង ២ខែហើយ រាប់ចាប់តាំងពីថ្ងៃដែលលោកចាប់ផ្តើមចេញដំណើរ នៅថ្ងៃទី០១ ខែមិថុនា ឆ្នាំ២០២៣ ដល់ថ្ងៃទី២២ ខែសីហា ឆ្នាំ២០២៣ ៕

អត្ថបទ៖ សុធាវី