ស្នងការដ្ឋាននគរបាលខេត្តកណ្តាល ព្រមានចាត់វិធានការជនក្លែងបន្លំទំព័រហ្វេសបុកផ្លូវការរបស់ខ្លួន

ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានឲ្យដឹងថា ថ្មីៗនេះមានជនខិលខូចមួយចំនួនបានបង្កើតគណនីហ្វេសប៊ុកក្លែងបន្លំ ដោយដាក់ឈ្មោះថា ស្នងការដ្ឋាននគរបាលខេត្តកណ្តាល ដែលមិនមែនជាទំព័រហ្វេសបុកផ្លូវការរបស់ស្នងការដ្ឋាននគរបាលខេត្តកណ្តាល នោះទេ។

តាមរយ:ទំព័រហ្វេសបុកផ្លូវការនៅថ្ងៃទី២៨ ខែសីហានេះ ស្នងការដ្ឋាននគរបាលខេត្តកណ្តាល បានបញ្ជាក់ថា ទំព័រហ្វេសបុកផ្លូវការរបស់ស្នងការដ្ឋាននគរបាលខេត្តកណ្តាល គឺមានតែមួយគត់ ដែលមានឡូគោល សញ្ញារូបសឹង មានអក្សរអគ្គស្នងការដ្ឋាននគរបាលជាតិនៅពីលើ និងមានអក្សរស្នងការដ្ឋាននគរបាលខេត្តកណ្តាល នៅពីខាងក្រោម។​​ ទន្ទឹមនោះ ស្នងការដ្ឋាននគរបាលខេត្ត នឹងធ្វើការស្រាវជ្រាវស្វែងរកអត្តសញ្ញាណជនខិលខូចដែលក្លែងបន្លំខាងលើ ដើម្បីអនុវត្តច្បាប់។

ជាមួយគ្នានោះ ស្នងការដ្ឋាននគរបាលខេត្តកណ្តាល បានអំពាវនាវដល់អ្នកដែលមានការពាក់ព័ន្ធត្រូវបញ្ឈប់ និងលុបរាល់គណនីដែលខ្លួនបានបង្កើតជាបន្ទាន់៕