រដ្ឋមន្ត្រីក្រសួងសុខាភិបាលថ្មី បញ្ចប់បេសកកម្មពិនិត្យការផ្ដល់សេវាសុខាភិបាល ខេត្តជុំវិញបឹងទន្លេសាប

សាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងប្រតិភូក្រសួងសុខាភិបាល បានបញ្ចប់បេសកកម្ម ចុះពិនិត្យការផ្តល់សេវាសុខាភិបាលសាធារណៈ ខេត្តជុំវិញបឹងទន្លេសាប រយៈពេល៤ថ្ងៃ ដោយបញ្ចប់នៅខេត្តកំពង់ធំ។ នេះបើតាមការផ្ដល់ព័ត៌មាន ពីក្រសួងសុខាភិបាល នៅព្រឹកថ្ងៃទី២៩ ខែសីហា ឆ្នាំ២០២៣នេះ។

ក្រសួងសុខាភិបាលបានឱ្យដឹងថា រដ្ឋមន្ត្រីក្រសួងសុខាភិបាលថ្មី រួមជាមួយ អភិបាល នៃគណៈអភិបាលខេត្តកំពង់ធំ នារសៀលថ្ងៃទី២៨ ខែសីហា បានអញ្ជើញចុះពិនិត្យការផ្តល់សេវាសុខភាពជូនប្រជាពលរដ្ឋ និងពិនិត្យហេដ្ឋារចនាសម្ព័ន្ធមូលដ្ឋានសាធារណៈសុខាភិបាល នៅមណ្ឌលសុខភាពប្រឡាយ មន្ទីរពេទ្យបង្អែកខេត្តកំពង់ធំ និងមន្ទីរពេទ្យបង្អែកបារាយណ៍-សន្ទុក។

ជាលទ្ធផល នៃដំណើរបេសកកម្មរយៈពេល ៤ថ្ងៃនេះ ប្រតិភូ និងថ្នាក់ដឹកនាំក្រសួងសុខាភិបាល បានចុះពិនិត្យផ្ទាល់ នៃការផ្តល់សេវាសាធារណៈ យល់ពីសុខទុក្ខមន្រ្តីរាជការ និងតម្រូវការបន្ថែម ដើម្បីកែលម្អ ការផ្តល់សេវាមូលដ្ឋានសាធារណៈដល់ប្រជាពលរដ្ឋ ស្របទៅនឹងគោលនយោបាយបញ្ចកោណរបស់រាជរដ្ឋាភិបាលដំណាក់កាលទី១ ដែលផ្តោតលើកសុខុមាលភាពប្រជាជន​ ទាំងការផ្តល់សេវា​ និងគាំពារសង្គម។

ដំណើរបេសកកម្មលើកទី១ ជុំវិញបឹងទន្លេនេះ ប្រព្រឹត្តទៅដោយរលូន មានការចូលរួមអបអរសាទរពីមន្រ្តីរាជការ បុគ្គលិកសុខាភិបាល ក៏ដូចជាអាជ្ញាធរមូលដ្ឋានគ្រប់លំដាប់ថ្នាក់ និងសាធារណៈជនដែលជាអ្នកជំងឺ និងក្រុមគ្រួសារអ្នកជំងឺ។

សាស្រ្តាចារ្យរដ្ឋមន្រ្តី បានអញ្ជើញជួបសំណេះសំណាល និងពាំនាំការសួរសុខទុក្ខពីសំណាក់ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដល់ថ្នាក់ដឹកនាំ មន្រ្តីរាជការ បុគ្គលិកសុខាភិបាលខេត្ត។ សាស្ដ្រាចារ្យរដ្ឋមន្រ្តី ក៏បានផ្តល់អនុសាសន៍គន្លឹះសំខាន់ៗ ដូចជាការពង្រឹង និងពង្រីកសេវាថែទាំសុខភាព ឱ្យកាន់តែគៀកប្រជាពលរដ្ឋ ដេីម្បីធានាឱ្យបាននូវគុណភាព សុវត្ថិភាព ប្រសិទ្ធភាព ស័ក្តិសិទ្ធភាព និងសមធម៌ ស្របតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលអាណត្តិទី៧។

សាស្ត្រាចារ្យរដ្ឋមន្រ្តី​ ក៏បានណែនាំឱ្យមន្ត្រី​ និងបុគ្គលិកសុខាភិបាលត្រូវចេះស្រលាញ់គ្នា សាមគ្គីគ្នា ធ្វេីការដោយយកចិត្តទុកដាក់ខ្ពស់ គោរពវិន័យការងារ មានក្រមសីលធម៌វិជ្ជាជីវៈ និងត្រូវគិតផលប្រយោជន៍រួម ព្រមទាំងត្រូវគោរពឋានានុក្រមការងារ​ មានភាពបុរេសកម្មក្នុងការបំពេញការងារ​ ហើយពួតដៃគ្នា​ដើម្បីបម្រើប្រជាពលរដ្ឋ។

គួរបញ្ជាក់ថា សាស្រ្តាចារ្យរដ្ឋមន្រ្តី រួមជាមួយប្រតិភូក្រសួងសុខាភិបាល បានអញ្ជើញចុះពិនិត្យស្ថានភាពសុខាភិបាលនៅខេត្តជុំវិញបឹងទន្លេសាប ចាប់ពីថ្ងៃទី២៥ ដល់ថ្ងៃទី២៨ ខែសីហា ឆ្នាំ២០២៣ រួមមាន ខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ៕