រដ្ឋបាលក្រុងព្រះសីហនុ ដាក់គ្រឿងចក្រ​ឈូស​ឆាយ​កែលម្អ​ឆ្នេរព្រែកត្រែង​ទុកជាឆ្នេរសាធារណៈ

លោក សរ កក្កដា អភិបាលក្រុងព្រះសីហនុ នៅព្រឹកថ្ងៃទី១ ខែកញ្ញា ឆ្នាំ២០២៣ បានដឹកនាំកម្លាំងគណ:បញ្ជាការឯកភាពក្រុងព្រះសីហនុ សហការជាមួយអាជ្ញាធរសង្កាត់លេខ១ ធ្វើការឈូសឆាយសំម្អាតឆ្នេរព្រែកត្រែង ដើម្បីយកឆ្នេរនេះមកគ្រប់គ្រងដាក់ជាឆ្នេរសាធារណៈសម្រាប់ភ្ញៀវទេសចរជាតិ អន្តរជាតិមកលេងកម្សាន្ត និងជាការឆ្លើយតបទៅនឹងកំណើន នៃការអភិវឌ្ឍរីកចម្រើនរបស់ខេត្តព្រះសីហនុនាពេលបច្ចុប្បន្ន។

មុនពេលអាជ្ញាធរយកគ្រឿងចក្រចុះឈូសឆាយរំដោះឆ្នេរសមុទ្រព្រែកត្រែង ​យកមក​គ្រប់គ្រង​ជាឆ្នេរសាធារណៈ កាលពីថ្ងៃទី១៤ ខែសីហា ឆ្នាំ២០២៣ រដ្ឋបាលក្រុងព្រះសីហនុបានចេញសេចក្តីជូនដំណឹងស្តីពីការរៀបចំសណ្តាប់ធ្នាប់ របៀបរៀបរយ សោភ័ណភាព និងអនាម័យបរិស្ថាននៅឆ្នេរព្រែកត្រែង​ស្ថិតនៅភូមិ ៣ សង្កាត់លេខ១ ខេត្តព្រះសីហនុ​។

នៅក្នុងសេចក្តីជូនដំណឹង រដ្ឋបាលក្រុងព្រះសីហនុបានជូនដំណឹងដល់បងប្អូនអាជីវកដែលបានសាងសង់រោង​តូប និងដាក់កញ្ចុះចល័តមិនរៀបរយនៅលើដីឆ្នេរសាធារណ: ស្ថិតនៅឆ្នេរព្រែកត្រែងសង្កាត់ លេខ១ ក្រុងព្រះសីហនុត្រូវធ្វើការរុះរើ​ចេញដោយខ្លួនឯង ព្រោះការសាងសង់សំណង់មិនរៀបរយរបស់បងប្អូនអាជីវក​ធ្វើ​ឲ្យ​ប៉ះពាល់​ដល់​សណ្តាប់ធ្នាប់ របៀបរៀបរយ សោភ័ណភាព និងអនាម័យ​បរិស្ថាន​នៅតាម​តំបន់ឆ្នេរ។

ជាការកត់សម្គាល់ សកម្មភាពចុះឈូសឆាយសម្អាតឆ្នេរនេះ​មិនមាន​អាជីវករ​ណាម្នាក់​ចេញមកប្រឆាំង​តវ៉ា​មក​​លើ​អាជ្ញាធរ​នោះ​ទេ។

លោក សរ កក្កដា អភិបាលក្រុងព្រះសីហនុ​បានថ្លែងអំណរគុណដល់ក្រុមអាជីវករ​ជាម្ចាស់តូប​និងកញ្ចុះ ដែលបានចូលរួមសហការជាមួយអាជ្ញាធរ ហើយក៏បានធ្វើការអំពាវនាវដល់បងប្អូនប្រជាពលរដ្ឋ ក៏ដូចជាភ្ញៀវទេសចរជាតិ អន្តរជាតិ ចូលរួមថែរក្សាអនាម័យបរិស្ថានទាំងអស់គ្នានៅពេលញាំអាហាររួច ត្រូវវេចខ្ចប់កាក​សំណល់​ឲ្យ​បានត្រឹមត្រូវយកមកទុកដាក់​ក្នុងធុងសំរាម ដែលរដ្ឋបាលក្រុងបានរៀបចំដាក់ពង្រាយនៅតាមទីតាំងបណ្តោយឆ្នេរសមុទ្រ ដើម្បីភាពស្អាតទាំងអស់គ្នា គឺមានតែការចូលរួមពីយើងទាំងអស់គ្នានោះទេ បើពឹងផ្អែកតែលើអាជ្ញាធរមិនអាចធ្វើឪ្យទីក្រុងរបស់យើងក្លាយជាទីក្រុងដែលមានភាពស្អាត និងបៃតងបានទេ៕

អត្ថបទ៖ ស៊ុយ ចាន់ធា