យុវជនក្រីក្រ ១,៥ លាននាក់នឹងទទួលបានការបណ្តុះបណ្ដាលជំនាញវិជ្ជាជីវៈឥតបង់ថ្លៃនៅដំណាច់ខែវិច្ឆិកាខាងមុខ

រាជរដ្ឋាភិបាលនឹងចាប់ផ្តើមបណ្តុះបណ្តាលជំនាញវិជ្ជាជីវៈដល់យុវជនមកពីគ្រួសារក្រីក្រ និងងាយរងគ្រោះប្រមាណ ១,៥ លាននាក់នាដំណាច់ខែវិច្ឆិកា ឆ្នាំ ២០២៣ ខាងមុខនេះ។

លោក កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍នៅរសៀលថ្ងៃទី ១៧ ខែតុលានេះថា៖ បើគ្មានអ្វីប្រែប្រួលនោះទេ ការបណ្តុះបណ្តាលយុវជនមកពីគ្រួសារក្រីក្រ និងគ្រួសារងាយរងហានិភ័យ ១លាន ៥ សែននាក់ នឹងចាប់ផ្តើមអនុវត្តនៅចុងខែវិច្ឆិកា ឆ្នាំ២០២៣។

លោកបានបន្តថា ផែនការយុទ្ធសាស្ត្រអភិវឌ្ឍន៍ជំនាញដល់យុវជនចេញពីគ្រួសារក្រីក្រនិងងាយរងគ្រោះប្រមាន១​លាន៥លាននាក់នេះបានដាក់ចេញដោយសម្តេចតេជោ ហ៊ុន សែន ដើម្បីចូលរួមដោះស្រាយបញ្ហាកង្វះកម្លាំងពលកម្មផងក៏ដូចជាឱ្យយុវជនមានជំនាញវិជ្ជាជីវៈមួយច្បាស់លាស់សម្រាប់ចិញ្ចឹមជីវិតប្រចាំថ្ងៃ និងចូលរួមដោះស្រាយជីវភាពក្រុមគ្រួសារបានកាន់តែប្រសើរ។

គួរបញ្ជាក់ថា យុវជនក្រីក្រ និងងាយរងគ្រោះប្រមាណ ១,៥ លាននាក់នឹងទទួលបានការបណ្តុះបណ្តាលជំនាញដោយឥតគិតថ្លៃ និងទទួលបានប្រាក់ឧបត្ថម្ភផងដែរដោយក្រសួងការងារនឹងបង្កើតថ្នាក់C1ពិសេសសម្រាប់បណ្តុះបណ្តាលជំនាញវិជ្ជាជីវៈរយៈពេល ៤ ខែដោយប្រើប្រាស់កម្លាំងសរុប និងមធ្យោបាយសរុប ខណៈការបណ្តុះបណ្តាលជំនាញវិជ្ជាជីវៈជាទូទៅសិស្សត្រូវរៀនកម្រិតថ្នាក់ទី៩ទើបអាចចូលរៀនជំនាញ C1 ឆ្នាំទី១ C2 ឆ្នាំទី២ និងC3ឆ្នាំទី៣ដោយប្រើពេល​៣ឆ្នាំទើបក្លាយជាកម្រិតជំនាញ។

ក្រៅពីគ្រឹះស្ថានដែលស្ថិតក្រោមក្រសួងការងារក្រសួងនឹងសហការជាមួយក្រសួងវប្បធម៌ និងវិចិត្រសិល្បៈដើម្បីឱ្យយុវជនប្រមាណពី២ទៅ៤ភាគរយសិក្សាជំនាញវប្បធម៌ដូនតា និងសហការជាមួយសាកលវិទ្យាល័យ និងវិទ្យាស្ថានឯកជននានាជួយបណ្តុះបណ្តាលផងដែរហើយការបណ្តុះបណ្តាលមិនគិតថ្លៃ និងផ្តល់ប្រាក់ឧបត្ថម្ភដល់យុវជនផងដែរដើម្បីឱ្យពួកគេចូលរៀនបានពេញលេញមិនគិតរឿងការរកប្រាក់ដោះស្រាយជីវភាពគ្រួសារ។

លោក កត្តា អ៊ន បានបញ្ជាក់ថាពេលដែលពួកគេរៀនចប់នឹងក្លាយជាធនធានមនុស្សមួយដ៏សំខាន់ដើម្បីឆ្លើយតបទៅនឹងតម្រូវការទីផ្សារការងារ និងអាចដោះស្រាយបញ្ហាប្រឈមខ្វះខាតកម្លាំងពលកម្មច្រើននាពេលបច្ចុប្បន្ននឹងអាចជួយទាក់​ទាញវិនិយោគទុនមកវិនិយោគនៅកម្ពុជាបានកាន់តែច្រើនផងដែរ៕

អត្ថបទ៖ សំអឿន