ខេត្តតាកែវមានស្រុកចំនួន៣កំពុងរងគ្រោះដោយទឹកជំនន់

គិតត្រឹមថ្ងៃទី១៨ ខែតុលា ឆ្នាំ២០២៣ នៅទូទាំងខេត្តតាកែវ មានស្រុកចំនួន៣ បាននិងកំពុងរងគ្រោះដោយទឹកជំនន់ និងធ្វើឲ្យប៉ះពាល់ដល់ផ្ទៃដីកសិកម្មចំនួន ២២០១ហិកតា។ នេះបើតាមការបញ្ជាក់ពីលោក ញ៉ិប ស្រ៊ន ប្រធានមន្ទីរកសិកម្មរុក្ខាប្រមាញ់ និងនេសាទខេត្ត។

ប្រធានមន្ទីរកសិកម្មរុក្ខាប្រមាញ់ និងនេសាទខេត្តបញ្ជាក់ថា ស្រុកចំនួន៣ដែលរងគ្រោះដោយសារទឹកជំនន់បានធ្វើអោយទឹកជន់លិចផ្ទៃដីកសិកម្មរបស់ពលរដ្ឋចំនួន ២២០១ហិកតា មានជាង ២៤១០គ្រួសារ ក្នុងនោះមានស្រុកបាទី មាន២ឃុំ មានឃុំត្រពាំងក្រសាំង និងឃុំកុមារជា បានជន់លិចផ្ទៃដី ១៨៩ហិកតា មានចំនួន ៣៨១គ្រួសារ។ ស្រុកសំរោង មាន៨ឃុំ មានឃុំរវៀង ឃុំខ្វាវ ឃុំជំរះពេន ឃុំសំរោង ឃុំស្លា ឃុំបឹងត្រាញ់ខាងត្បូង និងឃុំលំចង់ បានជន់លិចផ្ទៃដី ១១៧៤​ហិកតា​ មានចំនួន ១៩៧៤គ្រួសារ។ ស្រុកត្រាំកក់ មាន២ឃុំ មានឃុំស្រែរនោង និងឃុំតាភេម បានជន់លិចផ្ទៃដី ៨៣៨ហិកតា។

ឆ្លើយតបនឹងករណីនេះ នៅព្រឹកថ្ងៃទី១៩ ខែតុលានេះ លោក អ៊ូច ភា អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តតាកែវ បានដឹកនាំបញ្ជាផ្ទាល់ កម្លាំងចម្រុះគណបញ្ជាការឯកភាពរដ្ឋបាលខេត្តចុះជួយស្ដារត្រកៀត ស្មៅ និងត្រឹប ដែលបានហូរមកកកស្ទះ នៅចំណុចស្ពានត្នោតទរ ស្ថិតនៅឃុំទ្រា ស្រុកសំរោង ដើម្បីពន្លឿនលំហូរទឹកហូរធ្លាក់ចុះទៅក្រោម កុំឱ្យមានការជន់លិចផ្ទះសម្បែង និងដំណាំកសិកម្មរបស់ពលរដ្ឋ៕