​តម្លៃដូងក្រអូបក្នុងស្រុកនៅតែមានហាងឆេងល្អ​

អ្នកនាង កេង សុចិន្តា ​ម្ចាស់ចម្ការដូងក្រអូប នៅស្រុកសំពៅលូន ខេត្តបាត់ដំបង​បានឱ្យដឹងថា ​ទី​ផ្សារ​ដូងក្រអូបដែលអ្នកនាងលក់ផ្គត់ផ្គង់ក្នុងស្រុកមានស្ថានភាពល្អប្រសើ ខណៈនាង​រកដូង​លក់​មិន​គ្រប់ត​ម្រូវការ​បញ្ជាទិញ។ ​

​អ្នកនាង កេង សុចិន្តា ម្ចាស់ចម្ការដូងក្រអូប Daling Farm ​មានផ្ទៃដី ៥ ហិកតា ​បានឱ្យដឹងថា ​បច្ចុប្បន្ន​ចម្ការ​របស់ខ្លួន ​ផ្គត់ផ្គង់តែទីផ្សារក្នុងស្រុក ខណៈនាងមានគំនិតកែច្នៃ និងវិចខ្ចប់ដូង​បាន​យ៉ាង​ល្អបោះ​ដុំ​លក់ក្នុងផ្សារទំនើបៗនៅរាជធានីភ្នំពេញ និងបណ្ដាខេត្តមួយចំនួន។​

​អ្នកនាង កេង សុចិន្តា មានគំនិតច្នៃដូងក្រអូប មានស្ដង់ដាខ្ពស់ទាំងរសជាតិ និងគុណភាព​លក់ក្នុង​តម្លៃ ១ ៥០០ រៀល/ផ្លែ សម្រាប់ដូងចិតស្អាត ​៤១០០ រៀល/ផ្លែ ​និងដូងដុត តម្លៃ ៤ ៥០០ រៀល/ផ្លែ។ នៅក្នុងមួយខែ នាងអាចប្រមូលផលបានប្រមាណជាង ៦ ពាន់ផ្លែ។

​កាលពីថ្ងៃទី ២០ ខែកញ្ញា ឆ្នាំ ២០២៣ អគ្គនាយកដ្ឋានកសិកម្ម នៃក្រសួងកសិកម្មបានប្រកាសឱ្យម្ចាស់ចម្ការដូង និងរោងចក្រកែច្នៃវិចខ្ចប់ផ្លែដូងស្រស់ដែលចង់នាំចេញទៅទីផ្សារចិនដាក់ពាក្យស្នើសុំចុះបញ្ជីចម្ការ។

អគ្គនាយកដ្ឋានកសិកម្ម នឹងចាត់មន្ដ្រីជំនាញចុះវាយតម្លៃស្រប តាមនីតិវិធីបច្ចេកទេសដូចមាន ចែងនៅក្នុងពិធីសារ មុននឹងបញ្ជូនបញ្ជីឈ្មោះចម្ការ និងរោងចក្រកែច្នៃវេចខ្ចប់ផ្លែដូងស្រស់ទៅកាន់ភាគីចិន នៅដើមខែធ្នូ ឆ្នាំ២០២៣ខាងមុខ ដើម្បីភាគីចិនពិនិត្យ និងវាយតម្លៃបញ្ចប់ មុននឹងឈានដល់ការនាំចេញជាផ្លូវការ។

​ម្ចាស់ចម្ការដូងក្រអូបរូបនេះ ​ក៏មានមានបំណងចង់នាំចេញទៅក្រៅប្រទេសដែរ ប៉ុន្តែមិនទាន់ដល់ពេល ​នាងថា បច្ចុប្បន្ននាងមិនទាន់ចុះទេ អាចនឹង ៣ ទៅ ៤ ឆ្នាំខាងមុខទៀតទើបចុះដោយសារតែនាងគិតថា ដូងពិបាកក្នុងការដឹកជញ្ជូនទៅឆ្ងាយ ដែលវាទាមទារស្ដង់ដាខ្ពស់ក្នុងការដឹកជញ្ជូន។​

​អ្នកនាង កេង សុចិន្តាប្រាប់ថា៖ «ការដែលដូងរបស់ខ្ញុំ នៅតែក្នុងស្រុក ​ដើម្បីឱ្យបងប្អូនបានហូបនូវតម្លៃមួយសមរម្យ និងគុណភាព​ផ្លែដូងបានល្អ»។

​អគ្គនាយកដ្ឋានកសិកម្ម(GDA)បានឱ្យដឹងនៅថ្ងៃទី ០៧ ខែវិច្ឆិកា ឆ្នាំ ២០២៣នេះថា បច្ចុប្បន្នទើបទទួលបានការដាក់ពាក្យស្នើសុំចុះបញ្ជីចម្ការចំនួន ៣ក្រុមហ៊ុន ដែលមានផ្ទៃដីដាំដុះ​ចំនួន ២០៦ ហិកតា។

សូមបញ្ជាក់ដែរថា គិតត្រឹមឆ្នាំ២០២២ នៅប្រទេសកម្ពុជាសព្វថ្ងៃ មានផ្ទៃដីដាំដុះដំណាំដូងចំនួន ១ម៉ឺន៧ពាន់ហិកតា ក្នុងនោះ ផ្ទៃដីប្រមូលផលមានចំនួន ១ម៉ឺន៤ពាន់ហិកតា។ ចំណែកទិន្នផលសរុបនៅក្នុងឆ្នាំ២០២២ នៅទូទាំងប្រទេស មានចំនួនសរុប ២៤ម៉ឺន៨ពាន់តោន៕