​ទិន្នផលដូងក្រអូប រំពឹងថាឆ្នាំនេះ នឹងមានកំណើនខ្ពស់ ខណៈអាកាសធាតុអំណោយផលល្អ

កសិករដាំដូងក្រអូប ស្ថិតនៅស្រុកសំពៅលូន ខេត្តបាត់ដំបង បានប្រាប់ឱ្យដឹងថា ឆ្នាំនេះ ទិន្នផលដូងក្រអូបក្នុងចម្ការរបស់គាត់​នឹងទទួលបានទិន្នផលខ្ពស់ ខណៈអាកាសធាតុអំណោយផលល្អ។

កញ្ញា កេង សុចិន្តា ជាម្ចាស់កសិដ្ឋានដាំដូងក្រអូប «Darling Farm»បានប្រាប់ កម្ពុជាថ្មី រដូវកាលថ្មីនេះ កញ្ញារំពឹងថាទិន្នផលដូងក្រអូបក្នុងចម្ការរបស់កញ្ញា នឹងទទួលបានទិន្នផលខ្ពស់ជាងឆ្នាំមុន ខណៈអាកាសធាតុអំណោយផលល្អ ពីព្រោះសម្បូរទៅដោយទឹកភ្លៀង រួមផ្សំជាមួយការថែទាំដាក់ជីបានដិតដល់។

ម្ចាស់កសិដ្ឋានរូបនេះ បានឱ្យដឹងដែរថា កាលពីឆ្នាំ២០២៤កន្លងទៅ អាកាសធាតុមិនសូវអំណោយផលល្អ ទិន្នផលដូងក្រអូបរបស់កញ្ញា អាចប្រមូលផលបានត្រឹមតែ ៥ម៉ឺនផ្លែ តែប៉ុណ្ណោះ។ ចំពោះតម្លៃវិញ ដូងក្រអូបស្រស់ អាចលក់ទៅកាន់ទីផ្សារបានចាប់ពី ២០០០រៀល​ ទៅ ២៥០០រៀល ក្នុងមួយផ្លែ។ ចំណែកឯដូងកែច្នៃ អាចមានតម្លៃថ្លៃជាងនេះបន្តិច។

យ៉ាងណាមិញ កញ្ញា កេង សុចិន្តា បញ្ជាក់ថា ចំពោះទីផ្សារលក់ចេញវិញ ដូងក្រអូបរបស់កញ្ញា ត្រឹមតែអាចផ្គត់ផ្គង់បានតែផ្សារមួយចំនួនក្នុងរាជធានីភ្នំពេញ ខេត្តបាត់ដំបង និងសៀមរាបតែប៉ុណ្ណោះ ខណៈតម្រូវការដូងក្រអូបជារៀងរាល់ថ្ងៃហាក់មានតម្រូវការខ្ពស់ ប៉ុន្តែការផ្គត់ផ្គង់វិញនៅមានចំនួនកំណត់នៅឡើយ។

កសិដ្ឋានដាំដូងក្រអូប «Darling Farm» ជាកសិដ្ឋានមួយ ដែលស្ថិតនៅស្រុកសំពៅលូន ខេត្តបាត់ដំបង។ បច្ចុប្បន្នកសិដ្ឋានមានផ្ទៃដីដាំដូងក្រអូបសរុបប្រមាណជាង៥ហិកតា និងអាចផ្គត់ផ្គង់ដូងស្រស់ទៅកាន់ទីផ្សារបានចន្លោះពី ៧០០០ផ្លែ ទៅ៨០០០ផ្លែ ក្នុងមួយខែ៕

អត្ថបទ ៖ សួស សិត