មុខរបរដាំដូងក្រអូប អាចរកប្រាក់ចំណូលខ្ទង់ ១០ម៉ឺនដុល្លារ ក្នុងមួយឆ្នាំ

កសិករមួយគ្រួសារ ដែលស្ថិតនៅស្រុកព្រៃនប់ ខេត្តព្រះសីហនុ បានចាប់យកមុខរបរដាំដូងក្រអូប និងបណ្ដុះពូជដូងលក់ អាចស្វែងរកប្រាក់ចំណូលប្រមាណជាង ១០ម៉ឺនដុល្លារ ក្នុងមួយឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៊ុត គឹម​ឆាយ អាយុ៣១ឆ្នាំ ជា​ម្ចាស់​ចម្ការ​ដូងក្រអូប ​ដែល​គ្របដណ្តប់​លើ​ផ្ទៃដី​៥០​ហិកតា ស្ថិតនៅក្នុងភូមិ​ត្រពាំង​មូល ឃុំ​ជើងគោ ស្រុក​ព្រៃនប់ ខេត្ត​ព្រះសីហនុ​ បានប្រាប់ កម្ពុជាថ្មី ថា គ្រួសាររបស់លោកបានចាប់យកមុខរបរដាំដូងក្រអូបនេះ តាំងពីឆ្នាំ ២០០១ មកម្ល៉េះ។ បើគិតមកទល់ពេលនេះ គឹមឆាយ ប្រាប់ឱ្យដឹងថា វាមានរយៈពេល ៣០មកហើយ។

ម្ចាស់ចម្ការរូបនេះ បានបន្ថែមទៀតថា មុខរបរដាំដូងក្រអូបក្នុងគ្រួសាររបស់លោក បើគិតចំណូលជាប្រចាំឆ្នាំ របរនេះអាចរកប្រាក់ចំណូលបានប្រមាណជាង ១០ម៉ឺនដុល្លារ ពីការលក់ផ្លែដូងស្រស់ទៅកាន់ទីផ្សារក្នុងស្រុក ជាក់ស្ដែង គឹមឆាយ បានបញ្ជាក់ថា ក្នុងមួយឆ្នាំ លោកអាចលក់ចេញផ្លែដូងបានចំនួន ១២ ០០០ គ្រាប់ និងពូជដូង ប្រមាណជាង ១២​ ០០០ដើម ដូចគ្នា ទៅកាន់ទីផ្សារក្នុងស្រុក។

គឹមឆាយ បានបញ្ជាក់ទៀតថា ចំពោះផែនការ និងការពង្រីកទីផ្សារនាំចេញទៅទីផ្សារចិន ឬ ទីផ្សារប្រទេសផ្សេងៗទៀត លោកនៅមិនទាន់មានគម្រោងនាំចេញនោះទេ​ នេះក៏ដោយសារតែការនាំចេញត្រូវផ្ដោតទៅលើស្ដង់ដាត្រឹមត្រូវ ទៅតាមទំហំនៃផ្លែដូងនីមួយៗ។ ដោយឡែក សម្រាប់ចម្ការដូងក្រអូប របស់លោកបច្ចុប្បន្ន ទើបតែអាចផ្គត់ផ្គង់ទីផ្សារក្នុងស្រុក តែប៉ុណ្ណោះ។ លោកអះអាងថា ផ្គត់ផ្គង់ទីផ្សារក្នុងស្រុកក៏សឹងតែមិនទាន់​នោះទេ។ នេះបើតាមការបញ្ជាក់របស់ម្ចាស់ចំការរូបនេះ។

សម្រាប់ការថែទាំវិញ គឹមឆាយ ប្រាប់ឱ្យដឹងថា ដំណាំដូងក្រអូប ជាប្រភេទដំណាំម្យ៉ាងដែលធន់នឹងអាកាសធាតុ ពិសេសជំងឺផ្សេងៗ បើទោះបីជាបច្ចប្បន្ននេះ មានការកើនឡើងកម្ដៅខ្លាំង តែដំណាំដូងរបស់លោកនៅតែទទួលបានផលគួរជាទីគាប់ចិត្ត ដោយគ្រាន់តែចំណាយទៅលើជី និងប្រព័ន្ធទឹកក្នុងចម្ការ ដូចជា៖ ការជីកប្រឡាយ ក្នុងបរិវេណចម្ការដូងទាំងមូល ជាដើម។

គឹមឆាយ បានបន្តទៀតថា បច្ចុប្បន្នចម្ការដូងក្រអូបរបស់លោក មានផ្ទៃដីដាំដុះ ប្រមាណ ៥០ហិកតា និងមានចំនួនដូងសរុប ប្រមាណជាង ២២ ០០០ដើម ក្នុងនោះ ប្រភេទដូងក្រអូបមានចំនួន ១ ៦០០ដើម និងប្រភេទដូង កប៉ាល់តឿ ៦ ពាន់ដើម ភាគច្រើនប្រភេទដូងទាំងនេះ សុទ្ធតែទទួលបានទិន្នផលខ្ពស់​ ហើយក្នុងដូងមួយដើម អាចហុចផ្លែបានចន្លោះ ១០០ ទៅ១៥០ផ្លែ ជាប្រចាំ៕

អត្ថបទ ៖ សួស សិត