​រមណីយដ្ឋានធម្មជាតិ ៧ កន្លែងនៅខេត្តស្ទឹងត្រែង ​ស្វាគមន៍ទេសចរ​ក្នុងឱកាសបុណ្យឆ្លងឆ្នាំសកល

មន្ត្រីមន្ទីរទេសចរណ៍ខេត្តស្ទឹងត្រែង បានណែនាំឱ្យរមណីយដ្ឋានទេសចរណ៍ធម្មជាតិចំនួន​ ៧ កន្លែង និងរីសត ផ្ទះសំណាក់មួយចំនួន រៀបចំគ្រប់សេវាកម្មឲ្យមាន​គុណភាព ដើម្បីទទួលភ្ញៀវទេសចរមកលេងបានច្រើន ចាប់ពីពេលនេះទៅ​រហូតដល់ថ្ងៃឆ្លងឆ្នាំ​សកលខាងមុខនេះ។

​លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែងបានបញ្ជាក់ថា៖ គ្រប់ម្ចាស់អាជីវកម្មផ្ទះ​សំណាក់​សណ្ឋាគារ ទាំងអស់រួមទាំងទីតាំងរមណីយដ្ឋាននីមួយៗ ត្រូវរៀបចំឲ្យមានភាពបៃតង បរិស្ថានល្អ ម្ហូបអាហារមានរសជាតិឆ្ងាញ់ និងមានអនាម័យ លក់កុំដំឡើងថ្លៃ ត្រូវលក់ក្នុងតម្លៃសមរម្យ។

​លោកប្រធានមន្ទីរទេសចរណ៍បានណែនាំឲ្យសហគមន៍ទេសចរណ៍ ត្រូវរួមគ្នាខិតខំអនុវត្តតាម​ការណែនាំ របស់មន្ទីរទេសចរណ៍ ដើម្បីលើកស្ទួយវិស័យទេសចរណ៍ក្នុងស្រុក ព្រោះការ​ធ្វើបដិ​សណ្ឋាកិច្ច ទទួលភ្ញៀវ ការរៀបចំម្ហូបអាហារ ម្ចាស់រមណីយដ្ឋាន ភោជនីយដ្ឋាន ផ្ទះសំណាក់ សណ្ឋាគារសុទ្ធតែបានឆ្លងការវគ្គបណ្តុះបណ្តាលរួចមកហើយដែរ។

លោក វណ្ណ សេង រស់នៅក្រុងស្ទឹងត្រែងដែលមកកម្សាន្តនៅរមណីយដ្ឋាន​និស្ស័យស្នេហ៍សេសានបានបញ្ជាក់ថា៖ នៅពេលម្ចាស់រៀបចំសេវាកម្មបានល្អ និងសន្តិសុខរឹងមាំ ពិតជាអាចទាក់ទាញភ្ញៀវមកលេងបានច្រើនមកម្ដងហើយចង់មកម្ដងទៀត។

លោកសន្យាថា៖ នឹងជួយផ្សព្វផ្សាយបន្តឲ្យភ្ញៀវមកលេងនៅរមណីយដ្ឋានធម្មជាតិដែលមាននៅក្នុងខេត្តស្ទឹងត្រែង ដែលមាននៅតាមដងទន្លេសេសាន ហើយក៏មានឆ្នេរខ្សាច់នៅតាមដងទន្លេមេគងលើ ដែលអាចមកបោះតង់នៅថ្ងៃឆ្លងឆ្នាំ​សកល​​បានដែរ។

សូមបញ្ជាក់ថា៖ ខេត្តស្ទឹងត្រែងមានកន្លែងបោះតង់តាមឆ្នេរខ្សាច់ដងទន្លេមេគង្គលើ មានសណ្ឋាគារចំនួន ៤ ផ្ទះសំណាក់ចំនួន ២៧ មានបន្ទប់សរុបចំនួន ៨០០ បន្ទប់។

ចំណែករមណីយដ្ឋានយើងមាន៧កន្លែងរីសតចំនួន ២កន្លែងកំពុងដំណើរការទទួលភ្ញៀវទេសចរមកកម្សាន្តមាន៖ ១. រមណីយដ្ឋានអូរឬស្សីកណ្តាល ២. អន្លង់ផ្សោតព្រះរំកិល ៣. អូរស្វាយសែនជ័យ ៤. ភ្នំជំរកសត្វ ៥. សម្រស់កោះហាន ៦កោះព្រះ ៧. ឆ្នេរខ្សាច់សេកុង ១. រីស្សតមេគង្គ និង២. រីសតនិស័យស្នេហ៍សេសាន៕

ងិនលីម