អ្នកនាំពាក្យ៖ ក្រសួងនឹងព្យាយាមសម្រួល​ដល់ពលរដ្ឋឱ្យមាន​ទឹកប្រើប្រាស់មិនឱ្យមាន​ការកេងចំណេញឡើយ

អ្នកនាំពាក្យក្រសួងកសិកម្ម កញ្ញា អ៊ឹម រចនា បានលើកឡើងថា រាជរដ្ឋាភិបាល តាមរយៈក្រសួងកសិកម្ម និងស្ថាបនពាក់​ព័ន្ធនឹងព្យាយាមឱ្យអស់លទ្ធភាព ដើម្បីជួយសម្រួលដល់ប្រជាពលរដ្ឋ ជាពិសេសកសិករ ឱ្យទទួលបានទឹកប្រើប្រាស់គ្រប់គ្នា ដោយមិនអនុញ្ញាតឱ្យនរណាម្នាក់កេងចំណេញ ឬរំលោភយកទឹក​ទៅប្រើប្រាស់តែឯងនោះទេ។

ការលើកឡើងរស់អ្នកនាំពាក្យនេះ ឆ្លើយតបទៅនឹងបញ្ហាឱ្យកសិករផ្អាកការបង្កបង្កើនផល ដែលរដ្ឋបាលខេត្តពោធិ៍សាត់ បានចេញប្រកាសនាពេលថ្មីៗនេះ។

ក្នុងប្រកាសចុះថ្ងៃទី ០៣ មករា ឆ្នាំ ២០២៤ របស់រដ្ឋបាលខេត្ត បានបញ្ជាក់ថា យោងតាមផែនការសក្តានុពលទឹក សម្រាប់ស្រោចស្រពលើការងារបង្កបង្កើនផលស្រូវរដូវប្រាំង ឆ្នាំ២០២៣-២០២៤ របស់មន្ទីរធនធានទឹក និងឧតុនិយម​ខេត្ត សម្រាប់ការផ្គត់ផ្គង់ទឹកជូនប្រជាកសិករ ក្នុងឆ្នាំ២០២៤នេះ បានត្រឹមតែ ២០.០០០ហិកតាប៉ុណ្ណោះ ប៉ុន្តែផ្អែក​តាមការចុះពិនិត្យជាក់ស្តែងកន្លងមករបស់ថ្នាក់ដឹកនាំខេត្ត និងការវាយតម្លៃរបស់មន្ទីរកសិកម្ម រុក្ខាប្រមាញ់ និងនេសាទ​ខេត្ត ការបង្កបង្កើនផលរបស់ប្រជាកសិករបានកើនរហូតដល់ជាង ៤ម៉ឺន៦ពាន់ហិកតា លើសផែនការប្រើប្រាស់ទឹកជាង ២ម៉ឺន៦ពាន់ហិកតា។

ក្នុងន័យនេះ រដ្ឋបាលខេត្ត បានណែនាំដល់ប្រជាកសិករទាំងអស់ក្នុងខេត្ត ដែលកំពុងធ្វើស្រូវរដូវប្រាំងឆ្នាំ ២០២៤នេះ ផ្អាកការបង្កបង្កើនផលដំណាំស្រូវលើកទី២ បន្ទាប់ពីប្រមូលផលរួចរាល់នៅក្នុងអំឡុងខែមករា ដល់ខែ​ឧសភា ឆ្នាំ២០២៤ ខាងមុខ។ ប្រជាពលរដ្ឋទូទាំងខេត្ត ត្រូវត្រៀមលក្ខណៈស្តុកទឹកក្នុងស្រះ អណ្តូង ប្រឡាយ ដែលអាច​ស្តុកទឹកបាន សម្រាប់ទុកប្រើប្រាស់ប្រចាំថ្ងៃ និងសត្វពាហនៈជាដើម។

ភ្ជាប់ជាមួយការប្រកាសនេះ អ្នកនាំពាក្យក្រសួងកសិកម្ម បានគូសបញ្ជាក់ថា អាជ្ញាធរខេត្ត បានធ្វើការជាមួយមន្ទីរ​ធនធានទឹកដោយបានគណនាយ៉ាងច្បាស់លាស់ថា ធនធានទឹកដែលមានរាល់ថ្ងៃនេះ អាចផ្គត់ផ្គង់ការបង្កប​ង្កើនផលស្រូវប្រាំងបាននៅក្នុងទំហំប៉ុណ្ណា។ ក្រសួងច្បាស់ណាស់ថា ប្រសិនបើប្រជាកសិករសម្រុកធ្វើទាំងអស់ មិនអាចផ្គត់ផ្គង់បានគ្រប់គ្រាន់ឡើយ ដោយសារធនធានទឹកដែលកំពុងមាននេះ មិនមែនប្រើប្រាស់​តែសម្រាប់បង្ក​បង្កើនផលប៉ុណ្ណោះទេ ពោលគឺត្រូវចែករំលែកមួយផ្នែកសម្រាប់ពលរដ្ឋប្រើប្រាស់ទូទៅប្រចាំថ្ងៃផងដែរ ។ កញ្ញាបន្ត​ដូច្នេះថា« នេះគឺជាការគិតគូរ និងជូនដំណឹងទុកជាមុន ហើយក្រើនរំលឹកក៏ដូចជាផ្តល់​ជាព័ត៌មានដើម្បីឱ្យ​ប្រជាពលរដ្ឋយកទៅពិចារណា»។

លើសពីនេះទៀត អ្នកនាំពាក្យក្រសួងកសិកម្ម បានមើលឃើញថា ការសម្រុកធ្វើត្រូវប្រាំងលើកទី២របស់កសិករនេះ ក៏ដោយសារពួកគាត់សប្បាយចិត្តនឹងការប្រមូលផលស្រូវហើយទទួលបានតម្លៃខ្ពស់ ពោលគឺស្រូវសើមនៅ​ទីវាល​អាចលក់​បានតម្លៃប្រមាណ ១៣០០រៀល ក្នុងមួយគីឡូ ដែលតម្លៃនេះ មិនធ្លាប់មានពីមុនមក។

ទោះយ៉ាងណា បើតាមប្រកាសរបស់រដ្ឋដបាលខេត្តពោធិ៍សាត់បានបញ្ជាក់ថា ក្នុងករណីប្រជាកសិករនៅតែអនុវត្ត មិនទទួលយកការណែនាំរបស់រដ្ឋបាលខេត្តទេនោះ អាជ្ញាធរ​មិនទទួលខុសត្រូវលើការខ្វះទឹកស្រោច​ស្រពដំណាំ​ស្រូវនៅរដូវប្រាំងនេះឡើយ៕