ព័ត៌មានជាតិ

អាជីវកម្ម ៤ ប្រភេទកើបចំណូលច្រើនបំផុតខ្ទង់ពាន់លានដុល្លារនៅកម្ពុជា

បានផុស

៣ years មុន

នៅ

ថ្ងៃចន្ទ ៨ មករា ២០២៤

ដោយ

ផ្អែកតាមរបាយការណ៍ជំរឿនសេដ្ឋកិច្ចឆ្នាំ ២០២២ ដែលទើបតែចេញផ្សាយកាលពីពេលថ្មីៗនេះ បានបង្ហាញពីចំណូលរបស់អង្គភាពសេដ្ឋកិច្ចនៅប្រទេសកម្ពុជា។

ចំណូលពីការលក់ប្រចាំឆ្នាំរបស់អង្គភាពសេដ្ឋកិច្ចនៅប្រទេសកម្ពុជាដែលរួមបញ្ចូលគ្នាសរុបមានចំនួន ៥១ ប៊ីលានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្អែកតាមរបាយការណ៍ជំរឿនបានបែងចែកចំណូលតាមផ្នែកនីមួយៗនៃអង្គភាពសេដ្ឋកិច្ច។ ក្នុងនោះផ្នែក “លក់ដុំ និងលក់រាយ និងជួសជុលយានយន្ត និងទោចក្រយានយន្ត” បានកាន់កាប់ភាគចំណែកចំណូលច្រើនបំផុតប្រមាណ ១៦,១ ប៊ីលានដុល្លារអាមេរិកស្មើនឹង ៣១,៧%។ អង្គភាពសេដ្ឋកិច្ចនៅលំដាប់បន្ទាប់គឺផ្នែក “សកម្មភាពផលិតកម្ម កម្មន្តសាល” ប្រមាណ ១២,៨ ប៊ីលានដុល្លារអាមេរិក ស្មើនឹង ២៥,២%។ អង្គភាពសេដ្ឋកិច្ចស្ថិតក្នុងផ្នែក “សកម្មភាពធានារ៉ាប់រង និង ហិរញ្ញវត្ថុ” ប្រមាណ ១០,៤ ប៊ីលានដុល្លារអាមេរិក ស្មើនឹង ២០,៦%។ អង្គភាពសេដ្ឋកិច្ចស្ថិតក្នុងផ្នែក “សកម្មភាពផ្នែកស្នាក់នៅ និងសេវាចំណីអាហារ” ប្រមាណ ២,៦ ប៊ីលានដុល្លារ អាមេរិក ស្មើនឹង ៥,១% នៃចំណូលសរុប។

របាយការណ៍ជំរឿនក៏លើកបញ្ជាក់ដែរថា សេដ្ឋកិច្ចនៅកម្ពុជាមានរចនាសម្ព័ន្ធចំណាយថ្លៃដើមខ្ពស់។ ចំណូលពីការលក់ប្រចាំឆ្នាំមានប្រមាណ ៥០,៧ ប៊ីលានដុល្លារអាមេរិក ខណៈការចំណាយមានប្រមាណ ៣៨,៦ ប៊ីលានដុល្លារអាមេរិក។

លទ្ធផលនេះបង្ហាញថា ការចំណាយប្រចាំឆ្នាំមានភាគចំណែកប្រមាណ ៧៦,០% នៃចំណូលពីការលក់ប្រចាំឆ្នាំមានន័យថា សេដ្ឋកិច្ចនៅកម្ពុជាមានរចនាសម្ព័ន្ធនៃការចំណាយមានកម្រិតខ្ពស់ជាពិសេសក្នុងវិស័យផ្នែកឧស្សាហកម្ម និងសេវាកម្ម។

រចនាសម្ព័ន្ធចំណាយមានកម្រិតខ្ពស់នេះ អាចបណ្ដាលមកពីមូលហេតុមួយចំនួនភាគច្រើនបំផុតពាក់ព័ន្ធទៅនឹងប្រតិបត្តិការនាំចូលវត្ថុធាតុដើមនិងទំនិញ ហើយផលិតភាពនៃផលិតកម្មក្នុងស្រុកនៅមានកម្រិតទាប៕