ព័ត៌មានជាតិ

ឧកញ៉ា តែ តាំងប៉ ពន្យល់ពីផលិតផលនាំចូលពីបរទេសវៃស្លាកឈ្មោះខ្មែរ មានដំណើរការយ៉ាងណា?

បានផុស

៣ ខែ មុន

នៅ

ថ្ងៃសុក្រ ៣ មេសា ២០២៦

ដោយ

ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា ក្នុងវេទិកាសារព័ត៌មានក្រោមយុទ្ធនាការ «រួមគ្នាផលិតរួមគ្នាប្រើផលិតផលជាតិ» បានធ្វើការពន្យល់ពីផលិតផលខ្មែរដែលកំពុងចរាចរណ៍លក់នៅក្នុងស្រុក។

លោកបានបកស្រាយពន្យល់ពីផលិតផលក្នុងស្រុកចែកចេញជា ៣ ទម្រង់គឺផលិតផលក្នុងស្រុក ១០០% ដែលមានម៉ាកសញ្ញាខ្មែរ និងមានរោងចក្រផលិតនៅក្នុងស្រុកផ្ទាល់។ ទីពីរ ផលិតផលម៉ាកក្នុងស្រុកតែផលិតនៅក្រៅប្រទេស (OEM) ដែលនេះគឺជាផលិតផលដែលមានស្លាកសញ្ញាជាស្តង់ដារបស់ខ្មែរ ប៉ុន្តែជួលរោងចក្របរទេសឱ្យផលិត និងទី ៣ គឺផលិតផលម៉ាកបរទេសតែផលិតក្នុងស្រុកដូចករណីក្រុមហ៊ុនកូកាកូឡា (Coca-Cola) ដែលមកវិនិយោគ និងបង្កើតរោងចក្រផលិតផ្ទាល់នៅក្នុងប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈដែលពលរដ្ឋកម្ពុជានាំគ្នាធ្វើពហិការផលិតផលថៃ នាំឲ្យជោរជន់ផលិតផលជាច្រើនវៃស្លាកជាយីហោខ្មែរ លោកឧកញ៉ា តែ តាំងប៉ ទទួលស្គាល់ថា មានផលិតផលខ្មែរខ្លះបាននាំចូលពីក្រៅប្រទេស គឺដោយសារការរៀបចំរោងចក្រក្នុងស្រុកមិនទាន់ទាន់ពេលវេលា នៅពេលដែលមានការបិទព្រំដែន។

លោកថា និន្នាការនេះនឹងផ្លាស់ប្តូរ ខណៈការពឹងផ្អែកលើការនាំចូលផលិតផលម៉ាកខ្មែរពីក្រៅប្រទេស នាំឲ្យខាតប្រាក់ចំណេញដោយសារការជាប់ពន្ធ។

«ហេតុនេះហើយវាមិនមែនជារឿងយូរអង្វែងឡើយ។ ផលិតផលខ្មែរមួយចំនួនដែលមានរោងចក្រផលិតនៅក្រៅប្រទេស កំពុងឈានទៅដំណើរការខ្សែសង្វាក់ផលិតកម្មនៅក្នុងស្រុក ព្រមទាំងមានរោងចក្រជាច្រើនទៀតដែលនឹងលេចចេញជារូបរាងនាពេលអនាគត»។

លោកបានលើកឡើងផលិតផលត្រីខរបស់ខ្មែរមួយមានរោងចក្រផលិតនៅក្រៅប្រទេស ហើយនាំចូលមកចែកចាយក្នុងស្រុក ខណៈដែលក្រុមហ៊ុនកំពុងសាងសង់រោងចក្រផលិតនៅក្នុងខេត្តកោះកុង ដែលគ្រោងរួចរាល់ដាក់ឲ្យដំណើរការនៅពេលដ៏ខ្លីខាងមុខនេះ។

លោកឧកញ៉ាដែលធ្វើការដឹកនាំលើវិស័យសហគ្រាសខ្នាតតូច និងមធ្យមប្រមាណជាង ២០ ឆ្នាំ បានមើលឃើញពីការផ្លាស់ប្តូរផ្នត់គំនិតរបស់ពលរដ្ឋ ដែលកាលពីមុនប្រជាជនកម្ពុជាច្រើនតែទិញទំនិញនាំចូលដោយមិនបានគិតច្រើន ប៉ុន្តែបច្ចុប្បន្ន ប្រជាជនមានឆន្ទៈនិងស្មារតីជាតិនិយមខ្ពស់ជាងមុន ដោយសារបញ្ហាបិទព្រំដែននិងកំហឹងទល់នឹងប្រទេសជិតខាង។

ជាក់ស្តែង ប្រជាជនខ្មែរបានចាប់ផ្តើមងាកចេញពីការប្រើប្រាស់សេវាកម្មបរទេសដូចជាស្ថានីយប្រេងឥន្ធនៈ ឬការទៅព្យាបាលជំងឺនៅក្រៅប្រទេស ដែលការផ្លាស់ប្តូរនេះបានជួយទប់ស្កាត់លុយរាប់រយលានមិនឱ្យហូរចេញទៅក្រៅប្រទេស។

បន្ថែមពីនេះ លោកសម្លឹងឃើញពីចក្ខុវិស័យការអភិវឌ្ឍន៍រោងចក្រនៅថ្ងៃអនាគត គឺការបង្កើនខ្សែច្រវាក់ផលិតកម្មក្នុងស្រុកសម្រាប់វិស័យនាំចេញ ដូចជារោងចក្រផលិតកង់នៅខេត្តស្វាយរៀង ដែលនាំចេញបានទឹកប្រាក់រាប់ពាន់លានដុល្លារ ខណៈកម្ពុជាទទួលបានត្រឹមតែថ្លៃពលកម្មប៉ុណ្ណោះ។ គោលដៅបន្ទាប់គឺត្រូវរៀបចំផលិតគ្រឿងបន្លាស់ដូចជាខ្ចៅខ្ចងឱ្យបានពី ៥០% ទៅ ៦០% នៅក្នុងស្រុក ដើម្បីទទួលបានតម្លៃបន្ថែមខ្ពស់៕