ចែកបណ្ណ​ក្រីក្រនិងរងហានិភ័យ​ចំនួន ​១.៥០០​ បណ្ណ​ដល់​ពលរដ្ឋ​ក្នុង​ខេត្ត​បន្ទាយមានជ័យ

នៅ​ព្រឹកថ្ងៃទី៨ ខែ មករា ឆ្នាំ ២០២៤ ក្នុងសាលប្រជុំសាលាខេត្តបន្ទាយមានជ័យ ក្រោយ​បើក​វគ្គបណ្តុះបណ្តាលស្តីពីយន្តការអនុវត្តការ​បើកផ្តល់ប្រាក់ឧបត្ថម្ភសម្រាប់កម្មវិធីជាតិជំនួយសង្គមផ្នែកបណ្តុះបណ្តាលជំនាញ ផ្នែកវិជ្ជាជីវៈ និងបច្ចេកទេសសម្រាប់យុវជន​​មកពីគ្រួសារក្រីក្រ និងគ្រួសាររងហានិភ័យ​ មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត​បានចែកបណ្ណក្រីក្រ​ប្រភេទ (ក្រ១.ក្រ២)​ និង​​គ្រួសារងាយរងហានិភ័យចំនួន​ ១.៥០០ បណ្ណ ដល់​ពលរដ្ឋក្នុង​ខេត្ត។

លោកស្រី រស់ សុផានី អភិបាល​រង​ខេត្ត​បានមានប្រសាសន៍ថា រាជរដ្ឋាភិបាលកម្ពុជា នីតិកាលទី ៧ បានផ្តោតយកចិត្តទុកដាក់លើការ​កសាង​និង​ពង្រឹងប្រព័ន្ធគាំពារសង្គមដោយឈរលើស្មារតីមិនបោះបង់ចោល​ពលរដ្ឋណាម្នាក់ឡើយ។

លោកស្រី​បន្ត​ថា មុន​ឈានដល់ការ​ផ្តល់​បណ្ណប្រភេទ (ក្រ១.ក្រ២) ​និងគ្រួសារ​ងាយរងហានិភ័យ ក្រុមការងារបាន​ចុះធ្វើការសម្ភាស និង​ប្រជុំពិនិត្យផ្ទៀងផ្ទាត់កំណត់អត្តសញ្ញាណ​ពលរដ្ឋក្រីក្រ និងងាយ​​រង​ហានិភ័យ​ដើម្បីទទួលបាន​ការ​គាំទ្រ​​​សេវា​សង្គម​កិច្ច​ពីរដ្ឋាភិបាល​ ដែលជា​ចំណែក​ចូលរួមកាត់បន្ថយភាពក្រីក្ររបស់ពលរដ្ឋ៕

អត្ថបទ៖ វ៉ាន់ ណាង