បទល្មើសជលផល កើតឡើងជាង ៣ ពាន់ ករណី កើនឡើងជិត ៣០០ ករណីនៅឆ្នាំ ២០២៣

នៅក្នុងឆ្នាំ ២០២៣ សំណុំរឿងបទល្មើសជលផលនៅទូរទាំងប្រទេស​កើតឡើង​ចំនួន ៣ ០៥៤ ករណី ចំនួននេះ មានការកើនឡើង ២៧៦ ករណី បើប្រៀប​ធៀប​ឆ្នាំ ២០២២។

បើយោងតាមរបាយការណ៍បូកសរុបលទ្ធផលការងារប្រចាំឆ្នាំ របស់រដ្ឋបាលជលផលចេញផ្សាយនៅថ្ងៃទី ០៩ ខែមករា ឆ្នាំ ២០២៤នេះ បានឱ្យដឹងថា រដ្ឋបាលជលផលបានបង្ក្រាបបទល្មើសជលផលសរុបចំនួន ៣ ០៥៤ ករណី (សមុទ្រ ១៩៧) ដែលរួមមាន៖ បំផ្លាញវត្ថុតាង ២ ៨៤៩ ករណី បង្ក្រាបរបាំងស្បៃមុងជាង ១ លានម៉ែត្រ និងបង្ក្រាបឧបករណ៍ផ្សេងៗទៀត។

របាយការណ៍ដដែលបង្ហាញថា រដ្ឋបាលជលផលក៏បានពិន័យអន្តរការណ៍ ១១៣ ករណី ដែលមានទំហំទឹកប្រាក់ជាង ៤០០ លានរៀល និងបញ្ជូនជនសង្ស័យ ៦២ នាក់ទៅតុលាកា ខណៈ ៣៨ នាក់តុលាការសម្រេចដាក់ឱ្យជាប់ពន្ធនា​គារ។

ទោះយ៉ាងណា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា បានឱ្យដឹងថា ការបង្ក្រាបបទល្មើសនេសាទនៅជុំវិញបឹងទន្លេសាប មានការថយចុះបន្តិច ខណៈឆ្នាំ ២០២២ រដ្ឋបាលជលផលបង្ក្រាបបានច្រើន ហើយប្រជានេសាទមួយចំនួនបានស្ម័គ្រចិត្តប្រគល់ឧបករណ៍នេសាទមកឱ្យសមត្ថកិច្ច។

បើតាមមន្ត្រីអ្នកនាំពាក្យរូបនេះ ការបង្ក្រាបបទល្មើសជលផល ការអភិរក្សធនធានជលផល ការអភិវឌ្ឍវារីវប្បកម្ម ការពង្រឹងសមត្ថភាព​សហគមន៍​នេសាទ ការគ្រប់គ្រងព្រៃលិចទឹក និងព្រៃកោងកាង ការជំរុញការអភិវឌ្ឍខ្សែច្រវាក់តម្លៃជលផល និងការស្រាវជ្រាវ​បច្ចេកទេសវិទ្យាសាស្ត្រជលផល ដែលរដ្ឋបាលជលផល ត្រូវរកវិធីសាស្ត្រ និងយន្តការសម្រាប់អនុវត្តក្នុង​ការគ្រប់គ្រងធនធានជលផលឱ្យមានប្រសិទ្ធភាព និងនិរន្តរភាព។

របាយការណ៍របស់ក្រសួងកសិកម្មបង្ហាញថា ប្រាក់ចំណូលបានពីវិស័យជលផលមានចំនួនជាង ៨២៨លានរៀល កើនលើសឆ្នាំមុនចំនួនជាង ២០៥លានរៀល ស្មើនឹង ២២៣,៥៩ ភាគរយ៕