ក្រសួងអប់រំមិនបានប្រកាសឱ្យផ្អាកការបើកគ្រឹះស្ថានសិក្សាឯកជនថ្មីនោះទេ

អ្នកនាំពាក្យ ក្រសួងអប់រំ យុវជន និងកីឡា បានអះអាងថា ក្រសួងមិនបានប្រកាសឱ្យផ្អាកការបើកគ្រឹះស្ថានសិក្សាឯកជនថ្មីនោះទេ ពោលគឺគ្រាន់តែណែនាំឱ្យមន្ត្រីជំនាញត្រួតពិនិត្យឱ្យបានច្បាស់លាស់ មុននឹងអនុញ្ញាតឱ្យបើកដំណើរការតែប៉ុណ្ណោះ។

ការលើកឡើងរបស់អ្នកនាំពាក្យអប់រំបែបនេះ បន្ទាប់ពីមានព័ត៌មានមួយចំនួនលើកឡើងថា ក្រសួងអប់រំ យុវជន និងកីឡា បានសម្រេចផ្អាកបើកសាលារៀនឯកជនគ្រប់កម្រិតជាបណ្តោះអាសន្ន ដើម្បីទប់ស្កាត់រំហូរគ្រូ និងសិស្សពីសាលារដ្ឋទៅកាន់សាលាឯកជន។

លោក កាន់ ពុទ្ធី អ្នកនាំពាក្យ ក្រសួងអប់រំ យុវជន និងកីឡា មានប្រសាស នៅរសៀលថ្ងៃទី១៨ ខែមករា នេះថា៖ “ខ្ញុំសូមជម្រាបជូនថា ក្រសួងមិនបានប្រកាសឱ្យផ្អាកការបើកគ្រឹះស្ថានសិក្សាឯកជនថ្មីៗនោះទេ គ្រាន់តែឯកឧត្តមបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ណែនាំឱ្យមន្ត្រីជំនាញ ពិនិត្យឱ្យបានច្បាស់លាស់នូវលក្ខខណ្ឌ និងឯកសារគាំទ្រ ដល់ការស្នើសុំបើកគ្រឹះស្ថានសិក្សាឯកជន ដើម្បីធានានូវគុណភាព នៃការអប់រំ និងទទួលបាននូវទំនុកចិត្ត និងភាពកក់ក្តៅពីមាតាបិតា អ្នកអាណាព្យាបាលដែលបញ្ជូនកូនទៅសិក្សានៅទៅនោះ”។

យ៉ាងណាក៏ដោយ លោក កាន់ ពុទ្ធី បានបន្តថា ថ្មីៗនេះ នៅតែមានគ្រឹះស្ថានសិក្សាឯកជន បន្តដាក់ពាក្យស្នើសុំអាជ្ញាបណ្ណ ហើយចំពោះគ្រឹះស្ថានសិក្សាឯកជនដែលបំពេញបានលក្ខខណ្ឌសមស្រប មន្ត្រីជំនាញរបស់ក្រសួងនឹងចុះពិនិត្យមើល និងសុំគោលការណ៍ទៅ រដ្ឋមន្ត្រី ដើម្បីពិនិត្យ និងសម្រេច។

កន្លងមក បណ្ឌិតសភាចារ្យ ហង់ជូន ណារុន ឧបនាយករដ្ឋមន្ត្រី រដ្ឋមន្ត្រី ក្រសួងអប់រំ យុវជន និងកីឡា ធ្លាប់បានណែនាំឱ្យមន្ត្រីជំនាញសិក្សាវាយតម្លៃមួយទៅលើការបើកសាលាឯកជនឱ្យបានច្បាស់លាស់ មុននឹងអនុញ្ញាតឱ្យបើកបន្ថែម និងត្រូវពង្រឹងសាលារដ្ឋ ដោយសិក្សាទៅលើរំហូរសិស្សពីសាលារដ្ឋទៅឯកជន ហើយអគ្គនាយកដ្ឋានអប់រំ និងអគ្គនាយកដ្ឋានផ្សេងៗត្រូវស្វែងរកបញ្ហា និងដំណោះស្រាយ៕

អត្ថបទ៖ សំអឿន