ព័ត៌មានជាតិ

យុទ្ធនាការប្រកួតគ្មានសំរាមតាមដងផ្លូវជាតិខេត្តត្បូងឃ្មុំនៅតែបន្តជំរុញតាមផែនការ

បានផុស

២ years មុន

នៅ

ថ្ងៃពុធ ៣១ មករា ២០២៤

ដោយ

លោក ហុក ពេជ្រហោះ អភិបាលរងខេត្តត្បូងឃ្មុំបានគូសបញ្ជាក់មកកាន់ «កម្ពុជាថ្មី» នៅរសៀលថ្ងៃទី៣០ ខែមករា ឆ្នាំ២០២៤ នេះថា យុទ្ធនាការប្រកួតប្រជែងគ្មានសំរាមតាមដងផ្លូវក្នុងខេត្តត្បូងឃ្មុំដែលបានដាក់ចេញដោយអភិបាលនៃគណៈអភិបាលខេត្តនាពេលកន្លងមក បច្ចុប្បន្នកំពុងដំណើរការទៅតាមការផែនការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហុក ពេជ្រហោះ បានលើកឡើងថា ចំពោះវិធានការលើកកម្ពស់ការងារបរិស្ថានដោយលើកទឹកចិត្តឲ្យឃុំសង្កាត់ មានភូមិសាស្ត្រជាប់តាមបណ្តោយផ្លូវជាតិឆ្លងកាត់ប្រកួតប្រជែងគ្នាសម្អាតបរិស្ថាននៅក្នុងខេត្តត្បូងឃ្មុំកំពុងដំណើរការទៅមុខ។ រដ្ឋបាលខេត្តបានរៀបចំឲ្យមានទីលានចាក់សំរាមស្របតាមស្តង់ការអន្តរជាតិ ស្ថិតនៅឃុំកណ្តោលជ្រុំ ស្រុកពញាក្រែក ខេត្តត្បូងឃ្មុំ ដើម្បីបង្កលក្ខណៈងាយស្រួលក្នុងការទុកដាក់សំរាមឲ្យបានត្រឹមត្រូវ។

បន្ថែមពីនេះ លោកបន្តថា រដ្ឋបាលខេត្តក៏បានរៀបចំឲ្យមានរថយន្តដឹកជញ្ជូនទៅដល់ឃុំស្រុក ដើម្បីឲ្យការងារប្រមូលសំរាមកាន់តែងាយស្រួល ក៏ដូចជាលើកទឹកចិត្តឲ្យពលរដ្ឋតាមឃុំសង្កាត់ ដែលជាប់តាមថ្នល់ជាតិប្រមូលសំរាម និងនាំគ្នាធ្វើអនាម័យជាប្រចាំផងដែរ។

អភិបាលរងខេត្តរូបនេះ បានអះអាងដែរថា «ពាក់ព័ន្ធនឹងកិច្ចការនេះ គឺមានការចូលរួមពីប្រជាពលរដ្ឋដែលរស់ក្នុងក្រុងសួង ប៉ុន្តែពលរដ្ឋដែលធ្វើដំណើរតាមដងផ្លូវជាតិ ក៏ដូចជាប្រជាពលរដ្ឋមួយចំនួនហាក់មិនសូវមានការចូលរួមសហការនោះទេ ដោយយើងឃើញថាសំរាមនៅតែមានតាមដងផ្លូវនៅឡើយ»។

យ៉ាងណាមិញ រដ្ឋបាលខេត្តនឹងបន្តផ្សព្វផ្សាយចលនានេះឲ្យកាន់តែផុលផុសបន្ថែមទៀត។ ទៀតសោតរដ្ឋបាលខេត្តក៏កំពុងរៀបចំឲ្យសមាសភាពគណៈកម្មាធិការវាយតម្លៃ ឃុំ សង្កាត់ដែលបានចូលរួមអនុវត្តផែនការខាងលើ ក្នុងការសម្អាតសំរាមបានល្អជាងគេ។

ជាមួយគ្នានេះ បើតាមមន្រ្តីខេត្តរូបនេះ មកទល់ពេលនេះនៅមិនទាន់អាចជម្រាបបានទេថា ឃុំ សង្កាត់មួយណា ដែលនឹងទទួលបានរង្វាន់ពីអភិបាលខេត្ត។

គួរជម្រាបថា កាលពីពេលកន្លងទៅ លោក ជាម ច័ន្ទសោភ័ណ អភិបាលខេត្តត្បូងឃ្មុំបានប្រកាសដាក់ចេញផែនការលើកកម្ពស់ការងារបរិស្ថាន ដោយលើកទឹកចិត្តឲ្យឃុំសង្កាត់មានភូមិសាស្រ្តជាប់តាមបណ្តោយផ្លូវជាតិប្រកួតប្រជែងគ្នាសម្អាតបរិស្ថាន។ ការចូលរួមយុទ្ធនាការនេះ ដោយឃុំសង្កាត់ណាគ្រប់គ្រងសម្រាមសំណល់រឹងសំណល់រាវបានល្អទទួលបានចំណាត់ថ្នាក់លេខ ១ ទទួលបានរង្វាន់ ៥ លានរៀល លេខ ២ ទទួលបាន ៤ លានរៀល និងលេខ ៣ ទទួលបាន ៣ លានរៀល។

នៅខេត្តត្បូងឃ្មុំមានផ្លូវជាតិសំខាន់ៗឆ្លងកាត់មានដូចជា ផ្លូវជាតិលេខ ៧ ផ្លូវជាតិលេខ ៨ ផ្លូវជាតិលេខ ១១ ផ្លូវជាតិលេខ ៧៣ ផ្លូវជាតិលេខ ៧២ និងផ្លូវជាតិលេខ ៧១ សេ។

បើតាមលោកអភិបាលខេត្ត ការដាក់វិធានការនេះដើម្បីចូលរួមថែរក្សាអនាម័យតាមដងផ្លូវ មានបរិស្ថានស្អាតគ្មានសម្រាមជាមុខមាត់របស់ខេត្តផងដែរ៕

Related Topics:ខេត្តត្បូងឃ្មុំ លោក ហុក ពេជ្រហោះ

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា