១២៨គម្រោង មានទុនវិនិយោគ២៥០០លានដុល្លារ អាចបង្កើតការងារ១៣ម៉ឺនកន្លែង កើតចេញពីការខិតខំរបស់សម្ដេចធិបតី

នាយករដ្ឋមន្រ្តីកម្ពុជា សម្ដេច ហ៊ុន ម៉ាណែត បានគូសបញ្ជាក់ថា រយៈពេល៤ខែ នៃឆ្នាំ២០២៤ រាជរដ្ឋាភិបាល បានអនុម័តគម្រោងចំនួន១២៨ មានទុនវិនិយោគ២៥០០លានដុល្លារ បង្កើតការងារ១៣ម៉ឺនកន្លែង ដែលគម្រោងទាំងនេះកើតចេញពីការទាក់ទាញវិនិយោគិនរបស់រដ្ឋ និងវិស័យឯកជននៅកម្ពុជា។ សម្ដេច បានលើកឡើងដូច្នេះ ក្នុងពិធីប្រកាសបើកឱ្យដំណើរការជាផ្លូវការសមាគមសហព័ន្ធអ្នកវិនិយោគកម្ពុជា រសៀលថ្ងៃទី០៩ ឧសភា ឆ្នាំ២០២៤។

សម្ដេចធិបតី បានថ្លែងសង្កត់ធ្ងន់ដូច្នេះ «រាប់ពីខែមករា ទៅខែមេសា ឆ្នាំ២០២៤នេះ រាជរដ្ឋាភិបាលយើង តាមរយៈទិន្នន័យរបស់CDC (ក្រុមប្រឹក្សាអភិវឌ្ឍន៍កម្ពុជា) បើយើងនិយាយទិន្នន័យក្នុង CDC គឺការវិនិយោគដែលចុះនៅក្នុងប្រព័ន្ធ នៅក្នុងនោះ… រាជរដ្ឋាភិបាលបានអនុម័តគម្រោងថ្មី និងគម្រោងពង្រីកចំនួន១២៨គម្រោង ដែលក្នុងនោះទុនវិនិយោគមាន២៥០០លានដុល្លារ អាច​បង្កើតការងារ១៣ម៉ឺនកន្លែងនៅពេលដែលគម្រោងនេះចេញ។ នៅក្នុងរយៈពេលដែលយើងចាប់ផ្ដើមត្រឹមតែ៤ខែប៉ុណ្ណោះ នេះហើយគឺជាលទ្ធផលនៃការខិតខំប្រឹងប្រែងទាក់ម៉ូយ ទាំងរាជរដ្ឋាភិបាល ទាំងបងប្អូនវិស័យឯកជនរបស់យើង។»

ក្នុងពិធីដដែល សម្ដេចធិបតី បានបង្ហើបឱ្យដឹងថា កាលពីល្ងាចថ្ងៃទី០៨ ខែឧសភា សម្ដេចធិបតី ក្នុងនាមជាប្រធានក្រុមប្រឹក្សាអភិវឌ្ឍន៍កម្ពុជា បានចុះហត្ថលេខាអនុម័ត​គម្រោងចំនួន១៤ធំៗ ដែលសរុបទុនវិនិយោគប្រមាណ៤៨០លានដុល្លារ។

គួររំលឹកជួនថា ចាប់តាំងពីចូលកាន់តំណែងជានាយករដ្ឋមន្ត្រីកម្ពុជា នៅចុងខែសីហា មកទល់បច្ចុប្បន្ន ជានិច្ចកាលក្នុងពេលសម្ដេចធិបតី អញ្ជើញបំពេញទស្សនកិច្ចនៅក្រៅប្រទេស មិនថាជាទស្សនកិច្ចការងារ ឬទស្សនកិច្ចផ្លូវការ សម្ដេចនាយករដ្ឋមន្ត្រី តែងតែឆ្លៀតពេលដ៏មមាញឹកជួបទាក់ម៉ូយ ជាមួយម្ចាស់ ប្រធានក្រុមហ៊ុនបរទេស ដើម្បីប្រាប់អ្នកទាំងនោះអំពីគោលនយោបាយ ការគាំទ្ររបស់រដ្ឋ ហេដ្ឋារចនាសម្ព័ន្ធ កម្លាំងពលកម្ម កត្តាសន្តិភាព ដែលកម្ពុជាមាន ដើម្បីទាក់ទាញឱ្យវិនិយោគិនបរទេសទាំងនោះមករកស៊ីនៅកម្ពុជា៕