ពលរដ្ឋច្រើនឡើងៗ ដាក់FrameលើProfile បង្ហាញពីការគាំទ្រគម្រោងព្រែកជីកហ្វូណនតេជោ

ប្រជាពលរដ្ឋគ្រប់ស្រទាប់វណ្ណៈ បានបង្ហាញការគាំទ្រចំពោះគម្រោងព្រែកជីកហ្វូណនតេជោ ដោយបានដាក់ស៊ុម (Frame) នៅលើ Facebook Profile របស់ខ្លួន។

បន្ទាប់ពីប្រមុខរាជរដ្ឋាភិបាលកម្ពុជា បានប្រកាសប្តេជ្ញាថា នឹងសាងសង់ព្រែកជីកហ្វូណនតេជោ ឱ្យបានជាដាច់ខាត បើទោះបីមានការមិនពេញចិត្ត និងប្រឆាំងជំទាស់ពីភាគីណាក៏ដោយនោះ នៅពេលនេះ មានប្រជាពលរដ្ឋគ្រប់ស្រទាប់វណ្ណៈ បាននាំគ្នាដាក់ស៊ុម (Frame) នៅលើ Facebook Profile បង្ហាញពីការគាំទ្រគម្រោងព្រែកជីកមួយនេះ។ ក្នុងនោះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានដាក់ស៊ុម (Frame) បង្ហាញពីការគាំទ្រគម្រោងប្រវត្តិសាស្ត្រ “ព្រែកជីកហ្វូណនតេជោ” នៅលើបណ្តាញសង្គមរបស់សម្តេច ផងដែរ។

មិនតែប៉ុណ្ណោះ មន្ត្រីរាជការ ថ្នាក់ដឹកនាំគ្រប់ជាន់ថ្នាក់ អ្នកសារព័ត៌មាន សិល្បករ​ ប្រជាពលរដ្ឋទាំងក្នុង និងក្រៅប្រទេស ក៏បាននាំគ្នាដាក់ស៊ុម (Frame) នៅលើ Facebook Profileរបស់ខ្លួនយ៉ាងច្រើនផុលផុស ដើម្បីគាំទ្រទៅលើគម្រោងព្រែកជីកហ្វូណនតេជោ ព្រមទាំងបានលើកឡើងពីការអនុវត្តគម្រោងព្រែកជីកហ្វូណនតេជោ ថា នឹងផ្ដល់អត្ថប្រយោជន៏យ៉ាងច្រើនចំពោះសង្គមជាតិ និងប្រជាជនកម្ពុជា។

ការបង្ហាញការគាំទ្រទៅលើកគម្រោងព្រែកជីកហ្វូណនតេជោយ៉ាងភ្លូកទឹកភ្លូកដីបែបនេះ​ គឺដោយសារតែគម្រោងព្រែកជីកមួយនេះ ត្រូវបាន​រារាំងពីសំណាក់​ប្រទេស​វៀតណាម និងសហរដ្ឋអាមេរិក ដោយវៀតណាម​បានបង្ហាញការ​ព្រួយបារម្ភ​ទៅលើ​បរិស្ថាន​ និង​បានលើកឡើងថា​គម្រោងនេះ​នឹង​ធ្វើឱ្យ​ប៉ះពា​ល់ដល់​ចរន្តទឹក​ទន្លេ​មេគង្គ​ និង​បាត់បង់​ជីវចម្រុះ ខណៈ​អាមេ​រិក​​វិញ​បានចោទថា គម្រោង​ព្រែកជីក​ហ្វូ​ណ​ន​តេ​ជោ ធ្វើឡើង​ដើម្បីសម្រួលដល់ការ​ចល័ត​កងទ័ពជើងទឹករបស់ចិន៕