ព័ត៌មានជាតិ

គម្រោងអភិវឌ្ឍន៍ប៉ម នៅសហគមន៍បឹងកាឆាង ជួបកង្វះខាតថវិកា មិនអាចសម្រេចតាមផែនការ

បានផុស

១០ ខែ មុន

នៅ

ថ្ងៃចន្ទ ៣ មិថុនា ២០២៤

ដោយ

ថ្លែងប្រាប់ «កម្ពុជាថ្មី» នាព្រឹកថ្ងៃទី០៣ ខែមិថុនា ឆ្នាំ២០២៤ នេះ លោកស្រី អ៉ី រីនូ គណៈកម្មាធិការការពារសហគមន៍បឹងកាឆាង បានលើកឡើងថា គម្រោងអភិវឌ្ឍន៍ប៉ម និងកន្លែងទស្សនាត្រីផ្សោតរួមទាំងការរៀបចំទីតាំងបម្រើសេវាទេសចរណ៍ផ្សេងទៀត នៅមិនទាន់លេចចេញជារូបរាងនិងទទួលបានផ្លែផ្កានៅឡើយ ដោយសារខ្វះខាតថវិកាគាំទ្រគម្រោង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងអភិវឌ្ឍសហគមន៍ការពារធនធានធម្មជាតិបឹងកាឆាង តាមផែនការនឹងសម្រេចនៅពាក់កណ្ដាលឆ្នាំ ២០២៤ ឬចុងឆ្នាំ២០២៤ ប៉ុន្តែរហូតមកដល់ពេលបច្ចុប្បន្ននេះ គម្រោងនៅទ្រឹងមិនទាន់សម្រេចបានជាផ្លែផ្កាដូចការគ្រោងទុក។

សហគមន៍ការពារធនធានធម្មជាតិបឹងកាឆាង គ្រោងរៀបចំប៉មដើម្បីមើលត្រីផ្សោត កន្លែងស្ទូចត្រី និងស្ពានយោល ព្រមទាំងកញ្ចុះអង្គុយចាក់បេតុងនៅក្រោមដើមកោងកាង គួបផ្សំសេវាកម្មដឹកភ្ញៀវទេសចរនិងធ្វើម្ហូបអាហារបម្រើភ្ញៀវនៅលើទូកនៅសហគមន៍ការពារធនធានធម្មជាតិបឹងកាឆាង។

លោកស្រី អ៉ី រីនូ បានឱ្យដឹងថា បានបន្តថា «បច្ចុប្បន្នសម្រាប់គម្រោងនេះ យើងអាចសម្រេចបានត្រឹម ៥០% ប៉ុណ្ណោះ ដោយហេតុថា វាមានបញ្ហាប្រឈមខ្លាំងផ្នែកថវិកា ហើយក៏មិនមានខាងជំនួយណាមកជួយនោះទេ។ ម្យ៉ាងវិញទៀត ប្រសិនបើយើងយកថវិកាបដិភាគនៅក្នុងសហគមន៍ផ្ទាល់យកទៅសាងសង់ ក៏មានតែមួយចំនួនតូច មិនអាចគ្រប់គ្រាន់ដែរ ចឹងទាល់តែមានដៃគូ និងជំនួយពីខាងក្រៅ ទើបគម្រោងអាចដំណើរការទៅបាន»។

គណៈកម្មាធិការការពារសហគមន៍បឹងកាឆាងបានបន្តថា នៅក្នុងសហគមន៍នៅមិនទាន់មានកន្លែងណាដែលទាក់ទាញច្រើនដល់ភ្ញៀវទេសចរ ឬអាចទាក់ចិត្តឱ្យភ្ញៀវមកម្តងហើយចង់មកម្តងទៀត ដូច្នេះសព្វថ្ងៃគឺមានភ្ញៀវទេសចរនៅតាមបណ្ដាខេត្តនានា ក៏ដូចជាអ្នកនៅក្នុងខេត្តផ្ទាល់តិចតួចប៉ុណ្ណោះដែលបានមកលេងកម្សាន្ត សម្រាប់តែថ្ងៃបុណ្យទាន និងថ្ងៃសៅរ៍អាទិត្យ ដែលមកសម្រាកលំហែកាយ និងជួបជុំបែបលក្ខណៈគ្រួសារ។

បើទោះបីជាគម្រោងនេះនៅមិនទាន់អាចសម្រេចបានក៏ពិតមែន ប៉ុន្តែក្នុងនាមជាគណៈកម្មាធិការការពារសហគមន៍បឹងកាឆាង លោកស្រី អ៉ី រីនូ នៅតែរំពឹងយ៉ាងមុតមាំថា នាថ្ងៃខាងមុខលោកស្រីនឹងខិតខំធ្វើយ៉ាងណា បង្កើតកន្លែងទេសចរណ៍បន្ថែមទៀត ដើម្បីអាចទាក់ទាញភ្ញៀវទេសចរមកលេងកម្សាន្តឱ្យបានច្រើនកុះករ៕