សម្ដេចធិបតី៖ ក្រសួង៣០ មានកាតព្វកិច្ចរៀងៗខ្លួន តែត្រូវសហការគ្នា ដើម្បីប្រយោជន៍តែមួយ

សម្ដេចធិបតី នាយករដ្ឋមន្ត្រីកម្ពុជា បានថ្លែងថា រាជរដ្ឋាភិបាលមានក្រសួងចំនួន៣០ ជាសេនាធិការ ដែលមានកាតព្វកិច្ចរៀងៗខ្លួន តែត្រូវសហការគ្នា ដើម្បីគោលដៅតែមួយ គឺការបម្រើឱ្យផលប្រយោជន៍ជាតិ និងប្រជាជន។

ថ្លែចេញពីវេទិកាបិទវគ្គបណ្តុះបណ្តាលឆ្នាំ២០២៣ និងបើកវគ្គបណ្តុះបណ្តាលឆ្នាំ២០២៤ របស់សាលាភូមិន្ទរដ្ឋបាល នាព្រឹកថ្ងៃទី១០ ខែមិថុនា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា បើទោះបីជាការអនុវត្តរបស់រាជរដ្ឋាភិបាលមានលក្ខណជាពហុភាគី ដែលត្រូវមានសិទ្ធិ កាតព្វកិច្ច និងតួនាទីដាច់ដោយឡែកពីគ្នាក៏ ដោយ តែត្រូវមានការសហការរវាងគ្នាក្នុងកម្រិតណាមួយ។

សម្តេចធិបតី ហ៊ុន ម៉ាណែត បញ្ជាក់ដូច្នេះថា៖ «យើងធ្វើការជាក្រុម យើងធ្វើការជាលក្ខណពហុភាគី ក្រសួង៣០ ប៉ុន្តែប្រសិនបើគ្មានស្ដង់ដារក្រមប្រតិបត្តិ ពិតណាស់ជំនាញខុសគ្នា ប៉ុន្តែត្រូវមានក្រមប្រតិបត្តិក្នុងការសហការណាមួយ រដ្ឋបាលថ្នាក់ជាតិ ថ្នាក់ក្រោមជាតិ គឺត្រូវមានសិទ្ធិរៀងៗខ្លួន កាតព្វកិច្ចរៀងៗខ្លួន តាមច្បាប់ប្រគល់ឱ្យរៀងៗខ្លួន តែត្រូវមានការសហការកម្រិតណា ខ្សែបណ្ដាយ ខ្សែទទឺង បើមិនអ៊ីចឹង យើងប្របូកច្របល់»។

ក្នុងន័យនេះ សម្ដេចធិបតី ចង់បញ្ជាក់អំពីសារសំខាន់នៃការបណ្ដុះបណ្ដាលក្រុមប្រតិបត្តិការ ពោលគឺការបណ្ដុះបណ្ដាលមន្ត្រីឱ្យបានយល់ពីតួនាទី ភារកិច្ច និងការគិតគូរៀបចំឋានានុក្រមការងារឱ្យបានច្បាស់លាស់៕