​ផ្លូវ​ប្របមាត់ស្ទឹងសង្កែប៉ែកខាងកើត ក្រឡុកកាន់តែធំ ពលរដ្ឋ​ស្នើ​អាជ្ញាធរមិន​បានធ្វើ​ធំដុំ ជួយ​ឈូសឲ្យស្មើក៏បាន

ផ្លូវមួយខ្សែនៅប្របមាត់ស្ទឹងសង្កែប៉ែកខាងកើត ក្រឡុកកាន់តែធំញឹកដូចរន្ធបាយខុំពិបាកក្នុងការធ្វើដំណើរ ខណះផ្លូវមួយខ្សែនេះចំកណ្តាលក្រុង ហើយការ​ធ្វើដំណើរចរាចរណ៍​ក៏​មមាញឹក​ទាំងថ្ងៃទាំងយប់ ដែលបង្កឲ្យពលរដ្ឋរស់នៅតាមដងផ្លូវព្រួយបារម្មទៅលើអ្នកធ្វើដំណើរ នឹងមានគ្រោះថ្នាក់នៅពេលណាមួយដោយយថាហេតុ។

ប្រជាពលរដ្ឋក្នុងមូលដ្ឋានក៏ដូចជាអ្នកធ្វើដំណើរទាំងរថយន្ត ទាំងម៉ូតូ និងជិះកង់ បាន​ប្រតិកម្មដូចៗគ្នាថា បើ​មានក្រឡុកច្រើនហើយធំៗបែបនេះ អ្នកជិះម៉ូតូពេលយប់ថ្ងៃ​ណាមួយ​ពិតជាជួបគ្រោះថ្នាក់មិនខាន។

ប្រជាពលរដ្ឋរស់នៅតាមផ្លូវនោះសុំមិនបញ្ចេញឈ្មោះបាននិយាយថា ផ្លូវ១ខ្សែដែលស្ថិតនៅប្របមាត់ស្ទឹងត្រើយខាងកើតស្ថិតក្នុងសង្កាត់រតនះ ក្រុងបាត់ដំបង​បានខូចតាំងពីរដូវប្រាំងរហូតដល់រដូវ​វស្សា ហើយ​ក៏គ្មានមន្ត្រីក្នុងខេត្ត​មើលពីផលលំបាកប្រជាពលរដ្ឋនោះទេ។

បើតាមពលរដ្ឋ​ ការខូចខាតនេះមិនមានប្រវែងឆ្ងាយគួរចំណាយលុយច្រើននោះទេ។ ណាមួយជាផ្លូវក្នុងក្រុងផង​នៅមិនឆ្ងាយ​ពីសាលាក្រុងនិងខេត្តប៉ុន្មាននោះដែរ គួរណាស់លោកចៅហ្វាយក្រុងនិងខេត្តបានឃើញ។

ប្រជាពលរដ្ឋបានលើកឡើងទៀតថា “ខ្ញុំដូចជាឆ្ងល់ដែរ គ្រាន់តែបញ្ហាតិចតួចសោះ ដោះជូនពលរដ្ឋមិនបាន ទុកឲ្យបង្ក​ផល​លំបាក។ ពួកខ្ញុំនៅទីនេះឧស្សាហ៍​ឃើញលោកអភិបាលខេត្ត ដើរលើសួនច្បារសម្តេច ស ខេង អមដោយសេនា ឆ្វេងស្តាំជាច្រើនផងដែរ ហេតុអ្វីមើលមិនឃើញផ្លូវខូចនៅក្បែរហ្នឹង?”។

ចំណែកពលរដ្ឋម្នាក់ទៀតបានបន្ថែមថា “បើតាមខ្ញុំមើលលើទំហំខូចខាត អាចប៉ាន់ស្មានថា ចម្ងាយប្រហែលជិត​ ៣០០ ម៉ែត្រចុះ មិនចាំបាច់ជួសជុលទំហំ​ធំក៏បាន គ្រាន់តែសុំឲ្យជួយឈូស​ឲ្យស្មើទៅបានហើយ”។

ពលដ្ឋលើកឡើង​ដោយព្រួយ​បារម្ភថា “ផ្លូវនេះ​បើសិនជាដួលដឹងតែបាក់កស្លាប់ហើយ ព្រោះក្រឡុកជ្រៅៗគួរសមដែរ”។ ពលរដ្ឋ​ក៏​បានអះអាង​ធ្លាប់​ថតជាវីដេអូបង្ហោះឲ្យបាន​ដល់អាជ្ញាធរគ្រប់ជាន់ថ្នាក់ក្នុងខេត្តដែរ តែមិនដឹងថាបាន​ឃើញឬអត់ ព្រោះបារម្មទៅលើអ្នកមិនដែលជិះ​មកផ្លូវនេះអត់ដឹង នឹងជួបគ្រោះថ្នាក់។

យុវសិស្ស​​រៀន​នៅ​វិទ្យាល័យ នេត យ៉ង់ បានឲ្យ​ដឹង​ថា “ពួកខ្ញុំបានជិះកាត់ផ្លូវហ្នឹង​ញឹកញាប់ ដើម្បីទៅហាត់​ប្រាណនៅ​សួន​ច្បារ សម្តេច ស ខេង។ មានថ្ងៃមួយ ដោយ​ជិះ​ភ្លេចខ្លួនក៏ដូលឈាមក្បាលជង្គង់ផងកែង​ដៃ​ផង”។

ពាក់ព័ន្ធការលើកឡើង​របស់ពលរដ្ឋ​ កម្ពុជាថ្មីមិនអាចសាកសួរលោកអភិបាល​ក្រុងបាន​នៅឡើយទេ។ កន្លងទៅលោកអភិបាល​ក្រុងបាត់ដំបង ឆ្លើយការ​សាកសួរ​ជាមួយកម្ពុជាថ្មីថា លោកមិនផ្តល់សម្ភាសន៍​តាមទូរសព្ទឬតេលេក្រាមទេ បើចង់សួរអញ្ជើញ​មកសាលាក្រុង៕

អត្ថបទ៖ សៅ សារិទ្ធ