រដ្ឋមន្រ្តីក្រសួងសាធារណការ​ ចុះ​ទៅ​ស្រុក​អង្គរបូរី-ដូនកែវ តាមដានពិនិត្យ​គន្លងព្រែកជីកហ្វូណន​តេជោ

កាលពីម្សិលមិញនេះ រដ្ឋមន្រ្តី​ក្រសួង​សាធារណការ​និង​ដឹកជញ្ជូន​ បាន​ដឹកនាំគណៈប្រតិភូអន្តរក្រសួង​ រួមទាំង​​មន្រ្តី​ជំនាញ​ចុះ​​ទៅ​ពិនិត្យ​គន្លងព្រែក​ជីក​ហ្វូណន​តេជោ​ នៅ​ក្នុង​ភូមិសាស្រ្ត​​ស្រុក​អង្គរបូរី-ដូនកែវ ខេត្តតាកែវ។

ដំណើរបេសកកម្ម​នេះ​​ដើម្បី​ពិនិត្យទីតាំងតម្រាយផ្លូវទឹក និងទីតាំងគំរូកំណត់​និយាមការដើម្បី​ធ្វើការផ្ទៀងផ្ទាត់ផែនទីនៃគម្រោងផ្លូវនាវាចរណ៍ “ព្រែកជីក​ហ្វូណន​តេជោ”។

លោក ផន រឹម​ មន្រ្តីអ្នកនាំពាក្យ​ក្រសួង​សាធារណការ​និងដឹកជញ្ជូន​បាន​​ឲ្យ​ដឹង​ថា បេសកកម្ម​នេះ​ដឹកនាំដោយ​​​រដ្ឋមន្ត្រីក្រសួងសាធារណការ និងដឹកជញ្ជូន ដែលមាន​ការ​ចូលរួម​ពី​គណៈប្រតិភូអន្តរក្រសួង និងក្រុមការងារបច្ចេកទេសពិសេសទទួលបន្ទុកលើការកំណត់និយាមកា និងការរៀបចំផែនទីលម្អិតសម្រាប់គម្រោងព្រែកជីកហ្វូណនតេជោ ​ដែល​បាន​ធ្វើ​ឡើង​នៅទីតាំង​ប្រឡាយ ១៥ នៅស្រុកអង្គរបូរី ខេត្តតាកែវ ដោយការ​ជិះកាណូត-អូប័រ​។

ដំណើរ​ចុះពិនិត្យនេះ​ដើម្បីសិក្សាពី​គន្លង​ផ្លូវ​ទឹក​នៃ​គម្រោង​ព្រែកជីកហ្វូណនតេជោ ដែល​បាន​ធ្វើ​ឡើង​នៅ​លើ​គន្លង​ផ្លូវ​ទឹក​ដែលមានស្រាប់​​ ដើម្បីជំរុញ​ដំណើរការ​ស្ថាបនា​​​ឲ្យ​បញ្ចប់តាមការ​គ្រោង​ទុក។

ព្រែកជីកហ្វូណនតេជោ ដែលត្រូវតភ្ជាប់ពីទន្លេទៅសមុទ្រ មានប្រវែង ១៨០ គីឡូម៉ែត្រ ទទឹងមុខកាត់ផ្នែកខាងលើប្រវែង ១០០ម៉ែត្រ និងមុខកាត់ផ្នែកខាងក្រោមប្រមាណ ៨០ម៉ែត្រ ជម្រៅទឹកប្រមាណ ៥,៤ ម៉ែត្រ និងមានគន្លងនាវាចរណ៍ចំនួន ២​គន្លង។

ផ្លូវទឹកនេះចាប់ផ្តើមពីព្រែកតាកែវនៃទន្លេមេគង្គ ឆ្លងកាត់តាមព្រែកពោធិ៍ នៃទន្លេបាសាក់ រួចចូលតាមព្រែកតាហ៊ីងនៃទន្លេបាសាក់ និងបន្តរហូតដល់សមុទ្រខេត្តកែប ដោយឆ្លងកាត់ភូមិសាស្ត្រ ខេត្តចំនួន ៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប ដោយនឹងត្រូវសាងសង់ស្ទើរទាំងស្រុងលើតម្រាយខ្សែផ្លូវទឹកធម្មជាតិ និងផ្លូវទឹកបុរាណ ដែលបាន​បន្សល់ទុកស្រាប់តាំងពីសម័យអាណាចក្រហ្វូណនមកម៉្លេះ ក្នុងនោះផ្លូវទឹកធម្មជាតិដែលមានស្រាប់មានប្រវែងប្រមាណ ១៣៥ គីឡូម៉ែត្រ ផ្លូវទឹកត្រូវជីកតម្រង់កុំឱ្យកោងពេក មានប្រវែងប្រមាណ ៣៨ គីឡូម៉ែត្រ និងផ្លូវទឹកជីកថ្មីមានប្រវែងប្រមាណ ៧ គីឡូម៉ែត្រ ដើម្បីកាត់បន្ថយកំណោងនិងកាត់បន្ថយចម្ងាយតភ្ជាប់ទៅកាន់សមុទ្រ។

គម្រោងនេះនឹងសាងសង់សន្ទះផ្លូវទឹកចំនួន ៣ កន្លែង ស្ថិតនៅខេត្តកណ្តាល ខេត្តតាកែវ និងខេត្តកែប ដែលធានាបាននូវប្រសិទ្ធភាព​ក្នុងការទប់ស្កាត់ការជ្រៀតចូលនៃទឹកប្រៃទៅក្នុងបណ្តាញផ្លូវទឹកសាប និងអាចកំណត់បរិមាណនិងអត្រានៃរំហូរ​​ទឹកសាបដែលត្រូវហូរចេញទៅសមុទ្របានប្រកបដោយប្រសិទ្ធភាពខ្ពស់។

គម្រោងនេះនឹងប្រើប្រាស់រយៈពេលសាងសង់ប្រមាណ ៤៨ ខែ និងគ្រោងបញ្ចប់នៅក្នុងអំឡុងឆ្នាំ២០២៨ ខាងមុខ ដោយប្រើប្រាស់ទុនវិនិយោគសរុបប្រមាណ ១,៧ ពាន់លាន ដុល្លារអាម៉េរិក ក្នុងនោះទុនវិនិយោគរបស់សហគ្រាសសាធារណៈ និងក្រុមហ៊ុនក្នុងស្រុកមានចំនួន ៥១% និងទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន (CRBC) មានចំនួន ៤៩% ដោយការវិនិយោគនេះនឹងត្រូវអនុវត្តក្រោមរូបភាពសាងសង់-ប្រតិបត្តិការ-ផ្ទេរ (BOT)៕