ក្រសួងអប់រំ អំពាវនាវដល់គ្រូបង្រៀន និងសិស្ស-និស្សិត កុំចូលរួមសកម្មភាពផ្តួលរំលំរដ្ឋាភិបាលតាមការញុះញង់

ក្រសួងអប់រំ យុវជន និងកីឡា បានចេញការអំពាវនាវនៅព្រឹកថ្ងៃទី១៥ ខែសីហា ឆ្នាំ២០២៤ ឱ្យបុគ្គលិកអប់រំ គ្រូបង្រៀន និងសិស្ស និស្សិត កុំជឿតាមការញុះញង់របស់ក្រុមប្រឆាំងនៅក្រៅប្រទេស ធ្វើសកម្មភាពផ្តួលរំលំរដ្ឋាភិបាលកម្ពុជា។

តាមសេចក្តីថ្លែងការណ៍ចុះថ្ងៃទី១៥ ខែសីហានេះ ក្រសួងអប់រំសង្កត់ធ្ងន់ថា៖ “ក្រសួងអប់រំ យុវជន និងកីឡា សូមអំពាវនាវជូនដល់បុគ្គលិកអប់រំ គ្រូបង្រៀន និងសិស្ស-និស្សិត សូមចៀសឱ្យឆ្ងាយពីសកម្មភាពបះបោរផ្តួលរំលំរាជរដ្ឋាភិបាលស្របច្បាប់ និងជឿជាក់លើរាជរដ្ឋាភិបាល ហើយគាំទ្រកិច្ចសហប្រតិបត្តិការអភិវឌ្ឍន៍ត្រីកោណ CLV-DTA ព្រមទាំងសូមចូលរួមជាមួយរាជរដ្ឋាភិបាល និងអាជ្ញាធរមានសមត្ថកិច្ច ក្នុងការថែរក្សាសុខសន្តិភាព ស្ថិរភាពសង្គម និងសេចក្តីសុខរួមរបស់ប្រជាជន កម្ពុជានៅទូទាំងប្រទេស” ។

ការអំពាវនាវនេះ ធ្វើឡើងបន្ទាប់ពីក្រុមប្រឆាំងក្រៅប្រទេសមួយចំនួន បានធ្វើបដិវត្តន៍ពណ៌នៅក្រៅប្រទេសកាលពីពេលថ្មីៗនេះ ក្នុងគោលបំណងញុះញង់ឱ្យពលរដ្ឋខ្មែរក្នុងស្រុកប្រឆាំងនឹងគម្រោងអភិវឌ្ឍន៍ត្រីកោណ កម្ពុជា វៀតណាម ឡាវ (CLV) ហើយពួកគេក៏បានបំភ្លៃការពិត ដោយមូលបង្កាច់រដ្ឋាភិបាលថា បានកាត់ខេត្តទាំង៤ ទៅឱ្យវៀតណាម ឬ ធ្វើឱ្យបាត់បង់អធិតេយ្យលើខេត្តឦសានទាំង៤នោះ។

ជាមួយគ្នានេះ ក្រសួងអប់រំ បានបញ្ជាក់ដល់បុគ្គលិកអប់រំ គ្រូបង្រៀន និងសិស្ស និស្សិត ឱ្យបានយល់ថា ផែនការអូសទាញពលរដ្ឋខ្មែរក្នុងស្រុកឱ្យប្រឆាំងនឹងគម្រោង CLV នេះ មិនមែនជាការធ្វើឡើងដើម្បីសម្តែងមតិនោះទេ ផ្ទុយទៅវិញ ជាការញុះញង់ អុជអាល បំផុសបំផុល និងការប្រើឧបាយកលនយោបាយបោកបញ្ឆោត អូសទាញប្រមូលកម្លាំងប្រជាជនស្លូតត្រង់ ឱ្យធ្វើបាតុកម្មបះបោរផ្តួលរំលំរាជរដ្ឋាភិបាលស្របច្បាប់៕

ដោយ៖ អុន ស្រីមាន