នាយឧត្តមសេនីយ៍ សៅ សុខា៖ កងកម្លាំងប្រើអាវុធ សម្រាប់តែវាយបកជនជ្រុលនិយមបង្កអសន្តិសុខ

លោកនាយឧត្តមសេនីយ៍ សៅ សុខា បានថ្លែងបញ្ជាក់ថា កងកម្លាំងប្រើអាវុធ សម្រាប់តែទុកវាយបកចំពោះជនឆ្លៀតឱកាស ដែលមានបំណងប៉ុនប៉ងបង្កភាពវឹកវរដល់សន្តិសុខជាតិ សណ្ដាប់ធ្នាប់សង្គម ពិសេសក្រុមជ្រុលនិយមចង់ធ្វើបដិវត្តន៍ពណ៌ផ្ដួលរំលំរាជរដ្ឋាភិបាល។

មេបញ្ជាការកងរាជអាវុធហត្ថលើផ្ទៃប្រទេស នាយឧត្តមសេនីយ៍ សៅ សុខ​ លើកឡើងដូច្នេះថា៖ «ខ្ញុំកាន់កាំភ្លើងនេះ គឺមិនទៅបាញ់ប្រជាជនខ្លួនឯងទេ តែខ្ញុំមានភារកិច្ចការពារចោរប្លន់ចោរលួច ហើយពិសេសអ្នកដែលឆ្លៀតឱកាសប្រើអាវុធនេះ ប្រឆាំងនឹងរាជរដ្ឋាភិបាល យើងខ្ញុំនឹងប្រើដល់អាហ្នឹង»។ នាយឧត្តមសេនីយ៍ បានបញ្ជាក់ថា នេះមិនមែនជាការគំរាមកំហែងទេ តែជាភារកិច្ចរបស់កងកម្លាំង ដើម្បីការពារអាយុជីវិតប្រជាជន និងរាជរដ្ឋាភិបាលស្របច្បាប់ ដែលកើតចេញពីការបោះឆ្នោត តាមឆន្ទៈរបស់រាស្ត្រ។

លោកនាយឧត្តមសេនីយ៍ បន្តទៀតថា «ព្រោះខ្ញុំទាហាន បើទាហានអត់កាន់កាំភ្លើង មិនមែនទាហានទេ​ ដោះខោអាវហ្នឹងចេញ (ឯកសណ្ឋាន) ជាស៊ីវិលបាត់ ហើយអត់សម្លាប់ប្រជាជនទេ តែមានភារកិច្ចការពារប្រជាជន ហើយមុនគេបំផុត គឺការការពារសុខសន្តិភាព ស្ថិរភាពនយោបាយ»។

ក្នុងនាមជាអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស នាយឧត្តមសេនីយ៍ សៅ​ សុខា ក៏បានអំពាវនាវជាថ្មីម្ដងទៀតដល់ប្រជាជនទាំងអស់ ជាពិសេសយុវជន យុវនារី កុំជឿលង់តាមការញុះញង់របស់ក្រុមជ្រុលនិយមនៅក្រៅស្រុកតូចក្ដាប់តូចឱ្យសោះ ត្រូវតែដកខ្លួនចេញពីចលនាខុសច្បាប់នេះជាបន្ទាន់។

ការថ្លែងខាងលើរបស់លោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ក្នុងឱកាសអញ្ជើញចុះត្រួតពិនិត្យការហ្វឹកហ្វឺនរក្សាសណ្តាប់ធ្នាប់របស់កម្លាំងកងអត្តរាគមន៍​នៃកងរាជអាវុធហត្ថលើផ្ទៃប្រទេស នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ស្ថិតនៅស្រុកសាមគ្គីមានជ័យ ខេត្តកំពង់ឆ្នាំង នាព្រឹកថ្ងៃទី១៧ ខែសីហា ឆ្នាំ២០២៤៕